Padubidri; ಪಂಚಾಯತ್ ಅಭಿವೃದ್ಧಿ ಅಧಿಕಾರಿ ಕರ್ತವ್ಯಕ್ಕೆ ಅಡ್ಡಿ, ಜೀವ ಬೆದರಿಕೆ: ದೂರು ದಾಖಲು

ಪಡುಬಿದ್ರಿ: ಕಚೇರಿಯಲ್ಲಿ ಕರ್ತವ್ಯ ನಿರತರಾಗಿದ್ದ ವೇಳೆ ನ. 17ರಂದು ಗ್ರಾ. ಪಂ. ಸದಸ್ಯ ಮಯ್ಯದಿ ಎಂಬಾತನು ಪಡುಬಿದ್ರಿ ಗ್ರಾ. ಪಂ. ಅಭಿವೃದ್ಧಿ ಅಧಿಕಾರಿ ಮಂಜುನಾಥ ಶೆಟ್ಟಿ ಎಂಬವರ ಕಚೇರಿ ಕರ್ತವ್ಯಗಳಿಗೆ ಅಡ್ಡಿಪಡಿಸಿ, ಕೈಯಿಂದ ದೂಡಿ, ಜೀವಬೆದರಿಕೆ ಒಡ್ಡಿರುವ ಘಟನೆಯು ನಡೆದಿದೆ. ಈ ಕುರಿತಾಗಿ ಪಡುಬಿದ್ರಿ ಪೊಲೀಸ್ ಠಾಣೆಯಲ್ಲಿ ಪ್ರಕರಣವು ದಾಖಲಾಗಿದೆ.

ಪಿಡಿಒ ಅವರು ಕಚೇರಿಯಲ್ಲಿದ ವೇಳೆ ಕಡತವೊಂದರ ಸಹಿತ ಅಲ್ಲಿಗೆ ಬಂದಿದ್ದ ಆರೋಪಿ ಪಂಚಾಯತ್ ಸದಸ್ಯನು ತನ್ನ ಕೆಲಸವನ್ನು ಈಗಲೇ ಮಾಡಿಕೊಡುವಂತೆ ಅಭಿವೃದ್ಧಿ ಅಧಿಕಾರಿ ಮಂಜುನಾಥ ಶೆಟ್ಟಿ ಅವರನ್ನು ಒತ್ತಾಯಿಸಿದ್ದಾನೆ. ಪರಿಶೀಲಿಸಿ ಮಾಡಿಕೊಡುತ್ತೇನೆ ಹೊರಗೆ ಹೋಗಿ ಎಂದಾಗ ಆರೋಪಿಯು ನಾನು ಗ್ರಾ. ಪಂ. ಸದಸ್ಯನಿದ್ದೇನೆ. ಹೊರ ತೆರಳು ಎನ್ನಲು ನೀವ್ಯಾರು ಎಂಬಿತ್ಯಾದಿಯಾಗಿ ಗದರಿಸಿದ್ದಾನೆ.

ಅಲ್ಲದೆ ನಿಮ್ಮನ್ನು ಲೋಕಾಯುಕ್ತಕ್ಕೆ ಹಿಡಿಸಿಕೊಡುತ್ತೇನೆ. ಕೆಲಸ ಕಳೆದು ಕೊಳ್ಳುವಂತೆ ಮಾಡುತ್ತೇನೆ ಎಂದಿದ್ದಲ್ಲದೇ ಮಂಜುನಾಥ ಶೆಟ್ಟಿ ಅವರ ಎದೆಗೆ ಕೈ ಹಾಕಿ ದೂಡಿ ಜೀವ ಬೆದರಿಕೆ ಒಡ್ಡಿರುವುದಾಗಿ ದೂರಲ್ಲಿ ತಿಳಿಸಲಾಗಿದೆ.