ಆನ್‌ಲೈನ್‌ ವಂಚನೆ ಜಾಲ ಲಕ್ಷಾಂತರ ರೂ. ಕಳೆದುಕೊಂಡ ಯುವಕ

 ಕಾರ್ಕಳ: ಆನ್‌ಲೈನ್‌ ಮೋಸದ ಬಗ್ಗೆ ಪೊಲೀಸರು ಎಷ್ಟೆ ಎಚ್ಚರಿಕೆ, ಜಾಗ್ರತಿ ನೀಡುತ್ತ ಬಂದರೂ ಈ ಮೋಸದ ಜಾಲಕ್ಕೆ ಬೀಳುವವರ ಸಂಖ್ಯೆ ಕಡಿಮೆಯಾಗಿಲ್ಲ. ವಂಚನೆಗೆ ಒಳಗಾಗುವವರ ಸಂಖ್ಯೆ ಹೆಚ್ಚುತ್ತಲೇ ಇದೆ. ಆನ್‌ಲೈನ್‌ ಮೂಲಕ ಗೂಗಲ್‌ ಆ್ಯಪ್‌ನಲ್ಲಿ ಸಾಲ ಪಡೆಯಲು ಯತ್ನಿಸಿ ಕಾರ್ಕಳ ಯುವಕನೋರ್ವ ಮೋಸಕ್ಕೆ ಒಳಗಾಗಿ ಲಕ್ಷಾಂತರ ರೂ ಕಳೆದುಕೊಂಡಿದ್ದಾನೆ.

ಕಾರ್ಕಳದ ಮುಂಡ್ಕೂರಿನ ಸಿರಾಜ್‌ ಆನ್‌ಲೈನ್‌ನಲ್ಲಿ ಸಾಲ ಪಡೆಯುವ ಬಗ್ಗೆ ಗೂಗಲ್‌ ಲೋನ್‌ ಆ್ಯಪ್‌ನಲ್ಲಿ ಅರ್ಜಿ ಸಲ್ಲಿಸಿದ್ದ. ಈ ವೇಳೆ ಹೆಸರು, ಮೊಬೈಲ್‌ ಸಂಖ್ಯೆಗಳನ್ನು ಅಪ್‌ ಲೋಡ್‌ ಮಾಡಿದ್ದ. ಕೆಲ ದಿನಗಳ ಅನಂತರ ಅಪರಿಚಿತ ನಂಬರಿನಿಂದ ಯುವಕನಿಗೆ ಕರೆ ಬಂದಿದ್ದು, ಮುದ್ರಾ ಲೋನ್‌ನಿಂದ ಕರೆ ಮಾಡುತ್ತಿರುವುದಾಗಿ ಆ ವ್ಯಕ್ತಿ ಹೇಳಿದ್ದಾನೆ.

ಟ್ಯಾಕ್ಸ್‌ ಕಟ್ಟುವಂತೆ ಯುವಕನಿಗೆ ಹೇಳಿ ಹಂತಹಂತವಾಗಿ ಹಣ ಖಾತೆಗೆ ವರ್ಗಾವಣೆ ಗೊಳಿಸಿಕೊಂಡಿದ್ದ. ಸ್ವಲ್ಪ ದಿನಗಳ ಬಳಿಕ ಮತ್ತೋರ್ವ ಅಪರಿಚಿತ ಕರೆ ಮಾಡಿ ಲೋನ್‌ ಕೊಡಿಸುವುದಾಗಿ ಮತ್ತು ಈ ಮೊದಲು ಕಳೆದುಕೊಂಡ ಹಣ ವಾಪಸ್‌ ದೊರಕಿಸಿಕೊಡುವುದಾಗಿ ಹೇಳಿ ತನ್ನ ಖಾತೆಗೆ ಹಣ ವರ್ಗಾವಣೆ ಮಾಡಿಕೊಂಡಿದ್ದ. ಅನಂತರ ಆತ ಮೊಬೈಲ್‌ ಸಂಪರ್ಕಕ್ಕೆ ಸಿಕ್ಕಿಲ್ಲ. ಕರೆ ಮಾಡಿದವರು ಸಾಲವನ್ನು ನೀಡದೆ, ಹಣವನ್ನು ನೀಡದೆ ಮೋಸ ಮಾಡಿದ್ದು, ಯುವಕ ಒಟ್ಟಾರೆ ಈ ಘಟನೆಯಲ್ಲಿ 2.36 ಲಕ್ಷ ರೂ ಕಳೆದುಕೊಂಡಿದ್ದಾನೆ. ಈ ಕುರಿತು ಸೆನ್‌ ಪೊಲೀಸ್‌ ಠಾಣೆಯಲ್ಲಿ ಪ್ರಕರಣ ದಾಖಲಾಗಿದೆ.