ಹೆಂಗಳೆಯರ ಮನ ಗೆದ್ದ ನಿರ್ಮಲಾ ಸೀತಾರಾಮನ್‌ ಸೀರೆ !

ಕೇಂದ್ರ ಹಣಕಾಸು ಸಚಿವೆ ನಿರ್ಮಲಾ ಸೀತಾರಾಮನ್‌ ಅವರು ಸೀರೆ ಪ್ರಿಯೆ. ಸದಾ ವಿಶೇಷ ಸೀರೆಯುಟ್ಟು ಸಿಂಪಲ್‌ ಲುಕ್‌ನಲ್ಲೇ ಕಾಣಿಸಿಕೊಳ್ಳುವ ಅವರು ಈ ಬಾರಿಯ ಬಜೆಟ್‌ ಮಂಡನೆ ವೇಳೆ ಒಡಿಶಾದ “ಬೋಮ್ಕಾಯಿ’ ಸೀರೆ ಉಟ್ಟಿದ್ದು, ಅದು ಅನೇಕ ಹೆಂಗಳೆಯರ ಮನ ಗೆದ್ದಿದೆ.

ಕೆಂಪು ಮತ್ತು ಬೂದು ಬಣ್ಣದಲ್ಲಿದ್ದ ಸೀರೆಗೆ ಬೆಳ್ಳಿ ಬಣ್ಣದ ಡಿಸೈನ್‌ ಇತ್ತು. ಒಡಿಶಾದ ಸೋನೆಪುರ್‌ ಜಿಲ್ಲೆ ಈ ಬೋಮ್ಕಾಯಿ ಸೀರೆಗೆ ಪ್ರಸಿದ್ಧ. ಅದಕ್ಕೆ ಸೋನೆಪುರಿ ಸಿಲ್ಕ್ ಎಂಬ ಹೆಸರೂ ಇದೆ. ಸಚಿವೆ, ಸೀರೆಗೆ ಮ್ಯಾಚ್‌ ಆಗುವಂತೆ ಬಿಂದಿ, ಬಳೆ, ಚಿನ್ನದ ಚೈನ್‌ ಮತ್ತು ಓಲೆ ಧರಿಸಿದ್ದರು.

ನಿರ್ಮಲಾ ಸೀತಾರಾಮನ್‌ ಅವರು ತಮ್ಮ ಮೊದಲ ಬಜೆಟ್‌ ಮಂಡನೆ ವೇಳೆ ಆಂಧ್ರಪ್ರದೇಶದ ಹೆಮ್ಮೆಯಾದ ಮಂಗಳಗಿರಿ ಸೀರೆ ಧರಿಸಿದ್ದರು. ಗುಲಾಬಿ ಬಣ್ಣದ ಸೀರೆಯಲ್ಲಿ ಚಿನ್ನದ ಬಣ್ಣದ ಬಾರ್ಡರ್‌ ಇತ್ತು. 2020ರಲ್ಲಿ ಹಳದಿ ಬಣ್ಣದ ಸೀರೆಯುಟ್ಟಿದ್ದ ಅವರು ಅದೇ ಬಣ್ಣದ ಕುಪ್ಪಸ ಧರಿಸಿದ್ದರು. 2021ರಲ್ಲಿ ತೆಲಂಗಾಣದ ಪೊಚಂಪಲ್ಲಿ ಕೈಮಗ್ಗ ಸೀರೆಯಲ್ಲಿ ಕಾಣಿಸಿಕೊಂಡಿದ್ದರು. ಕೆಂಪು ಬಣ್ಣದ್ದಾಗಿದ್ದ ಆ ಸೀರೆಯ ಸೆರಗಿನಲ್ಲಿ ಇಕ್ಕಟ್‌ ಪ್ಯಾಟರ್ನ್ ಡಿಸೈನ್‌ ಇತ್ತು.