ಕಡಬದ ಪಿಜಕಳ ರಸ್ತೆಯಲ್ಲಿ ಮಳೆನೀರು: ಸ್ಥಳೀಯರಿಂದ ದೂರು

ಕಡಬ : ಕಡಬ-ಪಿಜಕಳ ರಸ್ತೆಯಲ್ಲಿ ಉಜ್ರುಪಾದೆಯ ಬಳಿ ತಿರುವಿನಲ್ಲಿರುವ ರಸ್ತೆಯ ಪಕ್ಕದ ಮೋರಿಯಿಂದ ನೀರು ಹರಿದುಹೋಗುವಲ್ಲಿ ಖಾಸಗಿ ವ್ಯಕ್ತಿಗಳು ರಬ್ಬರ್‌ ತೋಟಕ್ಕೆ ಮಣ್ಣು ಹಾಕಿದ ಪರಿಣಾಮವಾಗಿ ಮಳೆನೀರು ಸಂಗ್ರಹವಾಗಿ ರಸ್ತೆ ಕುಸಿಯುವ ಭೀತಿ ಎದುರಾಗಿರುವ ಕುರಿತು ಜು. 12ರಂದು ಪ್ರಕಟವಾದ ಸುದಿನ ವರದಿಗೆ ಸ್ಪಂದಿಸಿರುವ ಪ್ರಧಾನಮಂತ್ರಿ ಗ್ರಾಮ ಸಡಕ್‌ ಯೋಜನೆಯ ಇಂಜಿನಿಯರ್‌ ರವೀಂದ್ರ ಪುತ್ತೂರು ಅವರು ಗುರುವಾರ ಸ್ಥಳಕ್ಕೆ ಭೇಟಿ ನೀಡಿ ಪರಿಶೀಲಿಸಿದರು.

ಸ್ಥಳೀಯರೊಬ್ಬರು ತಮ್ಮ ರಬ್ಬರ್‌ ತೋಟಕ್ಕೆ ಮಣ್ಣು ಹಾಕಿದ ಪರಿಣಾಮವಾಗಿ ಮೋರಿಯ ಬಳಿ ಕೆರೆಯ ರೀತಿಯಲ್ಲಿ ಮಳೆನೀರು ಸಂಗ್ರಹವಾಗಿ ಒಸರಿನಿಂದಾಗಿ ರಸ್ತೆಯೂ ಕುಸಿಯುವ ಭೀತಿ ಎದುರಾಗಿದೆ. ಅಂಗನವಾಡಿ ಹಾಗೂ ಶಾಲೆಗೆ ಹೋಗುವ ಪುಟ್ಟ ಮಕ್ಕಳು ಈ ದಾರಿಯಾಗಿ ಸಾಗುವುದರಿಂದ ತೆರೆದ ಕೆರೆಯಂತೆ ಸಂಗ್ರಹವಾಗಿರುವ ನೀರಿನಿಂದಾಗಿ ಮಕ್ಕಳಿಗೂ ಅಪಾಯ ಸಂಭವಿಸುವ ಸಾಧ್ಯತೆ ಗಳಿವೆ ಎಂದು ಸ್ಥಳೀಯ ಕುಮಾರಧಾರ ಯುವಕ ಮಂಡಲದ ಪದಾಧಿಕಾರಿಗಳು ಎಂದು ಸ್ಥಳೀಯ ಕುಮಾರಧಾರ ಯುವಕ ಮಂಡಲದ ಪದಾಧಿಕಾರಿಗಳು ಪಂಚಾಯತ್‌ಗೆ ದೂರು ಸಲ್ಲಿಸಿದ್ದರು.

ಸ್ಥಳ ಪರಿಶೀಲನೆಯ ವೇಳೆ ಯುವಕ ಮಂಡಲದ ಅಧ್ಯಕ್ಷ ರಂಜೀವ್‌ ಪಿಜಕಳ, ಮಾಜಿ ಅಧ್ಯಕ್ಷರಾದ ಕಾರ್ತಿಕ್‌ ಪಿ.ಎಸ್‌., ಸುಂದರ ಗೌಡ ಪಾಲೋಳಿ, ದಯಾನಂದ ಗೌಡ ಪೊಯ್ಯತ್ತಡ್ಡ, ಪದಾಧಿಕಾರಿ ಸುರೇಶ ಪಿಜಕಳ ಅವರು ಹಾಜರಿದ್ದರು. 

ಇನ್ನೆರಡು ದಿನಗಳಲ್ಲಿ ಕಾಮಗಾರಿಗೆ ಚಾಲನೆ
ಮೋರಿಯ ಬಳಿ ಮಾತ್ರವಲ್ಲದೇ ಇನ್ನೂ ಕೆಲವೆಡೆ ಚರಂಡಿಗೆ ಮಣ್ಣು ಹಾಕಿದ ಪರಿಣಾಮವಾಗಿ ಮಳೆನೀರು ಹರಿದುಹೋಗಲು ತಡೆಯುಂಟಾಗಿ ರಸ್ತೆಯ ಮೇಲೆ ಹರಿಯುತ್ತಿರುವುದು ಸ್ಥಳ ಪರಿಶೀಲನೆಯ ವೇಳೆ ಕಂಡುಬಂದಿದೆ. ಚರಂಡಿಯನ್ನು ಸರಿಪಡಿಸಿ ನೀರು ಸರಾಗವಾಗಿ ಹರಿದುಹೋಗುವಂತೆ ಮಾಡಿ ಸಮಸ್ಯೆ ಬಗೆಹರಿಸಲು ರಸ್ತೆ ಕಾಮಗಾರಿ ನಿರ್ವಹಿಸಿದ ಗುತ್ತಿಗೆದಾರರಿಗೆ ಸೂಚಿಸಲಾಗಿದೆ. ಇನ್ನೆರಡು ದಿನಗಳಲ್ಲಿ ಕಾಮಗಾರಿ ನಡೆಯಲಿದೆ. ಚರಂಡಿಗೆ ಮಣ್ಣು ತುಂಬಿ ನೀರು ಹರಿಯಲು ತಡೆಯೊಡ್ಡುವವರಿಗೆ ಮುಂದೆ ಆ ರೀತಿ ಮಾಡದಂತೆ ಎಚ್ಚರಿಕೆ ನೀಡಲಾಗಿದೆ.
 – ರವೀಂದ್ರ ಪುತ್ತೂರು,
ಇಂಜಿನಿಯರ್‌, ಪಿಎಂಜಿಎಸ್‌ವೈ