ರಾಷ್ಟ್ರೀಯ ರೆಸ್ಲಿಂಗ್‌ ಕೂಟಗಳಿಗೆ ಆಧಾರ್‌ ಕಡ್ಡಾಯ

ಹೊಸದಿಲ್ಲಿ: ರಾಜ್ಯ ಮತ್ತು ರಾಷ್ಟ್ರೀಯ ಮಟ್ಟದ ರೆಸ್ಲಿಂಗ್‌ ಟೂರ್ನಿಗಳಲ್ಲಿ ವಯೋಮಿತಿಗೆ ಸಂಬಂಧಿಸಿ ವಂಚನೆಯನ್ನು ತಡೆಯಲು ರೆಸ್ಲಿಂಗ್‌ ಫೆಡರೇಶನ್‌ ಆಫ್ ಇಂಡಿಯಾ (ಡಬ್ಲ್ಯುಎಫ್ಐ) ಆಧಾರ್‌ ಕಾರ್ಡ್‌ಗಳನ್ನು ಕಡ್ಡಾಯಗೊಳಿಸಿದೆ. ಸೀನಿಯರ್‌, ಜೂನಿಯರ್‌, ಸಬ್‌ ಜೂನಿಯರ್‌ ಸೇರಿದಂತೆ ಎಲ್ಲ ವಿಭಾಗಗಳಿಗೂ ಈ ನಿಯಮ ಅನ್ವಯಿಸಲಿದೆ.

ಈ ನಿಯಮ ಜಾರಿಯಿಂದ ವಯೋಮಿತಿಯಲ್ಲಿನ ಮೋಸದ ಜತೆಗೆ ರಾಷ್ಟ್ರೀಯ ಮಟ್ಟದ ಟೂರ್ನಿಗಳಲ್ಲಿ ಕೆಲ ಅಪ್ರಾಮಾಣಿಕ ಕ್ರೀಡಾಪಟುಗಳು ತಮ್ಮ ರಾಜ್ಯದಿಂದ ನಿರಾಕ್ಷೇಪಣಾ ಪತ್ರ  (ಎನ್‌ಒಸಿ) ಪಡೆಯದೆ, ರಾಜ್ಯವನ್ನು ಬದಲಿಸಿ ಸ್ಪರ್ಧಿಸಿ ಪ್ರಶಸ್ತಿಪತ್ರ ಪಡೆಯುವುದನ್ನೂ ತಪ್ಪಿಸಬಹುದು ಎಂದು ಡಬ್ಲ್ಯುಎಫ್ಐ ಹೇಳಿದೆ.