Naxal Vikram Gowda: ಮನೆಯವರಿಂದ ಶವ ಸ್ವೀಕಾರ; ಮನೆ ಪಕ್ಕದಲ್ಲೇ ಅಂತ್ಯಸಂಸ್ಕಾರ

ಹೆಬ್ರಿ: ವಿಕ್ರಂ ಗೌಡನ ಅಂತ್ಯ ಸಂಸ್ಕಾರದಲ್ಲಿ ಭಾಗವಹಿಸುವುದಿಲ್ಲ ಎಂದಿದ್ದ ಕುಟುಂಬಿಕರ ಮನವೊಲಿಸುವಲ್ಲಿ ಅಧಿಕಾರಿಗಳು ಸಫ‌ಲರಾಗಿದ್ದು, ಬುಧವಾರ ಮಧ್ಯಾಹ್ನ ಕೂಡ್ಲುವಿನ ಮನೆ ಪರಿಸರದಲ್ಲಿ ಅಂತ್ಯಕ್ರಿಯೆ ನಡೆಸಲಾಯಿತು.

ಕುಟುಂಬದವರು, ಊರಿನವರ ಸಹಿತ ಸುಮಾರು 150ಕ್ಕೂ ಹೆಚ್ಚು ಜನರ ಸಮ್ಮುಖದಲ್ಲಿ ವಿಕ್ರಂ ಗೌಡನ ಸಹೋದರ ಸುರೇಶ್‌ ನೇತೃತ್ವ, ತಂಗಿ ಸುಗುಣಾ ಉಪಸ್ಥಿತಿಯಲ್ಲಿ ಅಂತ್ಯಸಂಸ್ಕಾರ ನಡೆಯಿತು.

ನಿರಾಕರಣೆ ಬಳಿಕ ಒಪ್ಪಿಗೆ
ಎನ್‌ಕೌಂಟರ್‌ ನಡೆದ ಮಾಹಿತಿ ದೊರೆತ ಆರಂಭದಲ್ಲಿ ಸಹೋದರ ಹೊರತು ಪಡಿಸಿ ತಂಗಿ, ಕುಟುಂಬಿಕರು ಯಾರೂ ಘಟನೆ ನಡೆದ ಸ್ಥಳ ಹಾಗೂ ಶವವಿರಿಸಿದ್ದ ಆಸ್ಪತ್ರೆಗೆ ತೆರಳಿರಲಿಲ್ಲ. ಆರಂಭದಲ್ಲಿ ಶವಸಂಸ್ಕಾರ ನಡೆಸಲು ಹಿಂದೇಟು ಹಾಕಿದ್ದರು. ಅನಂತರದಲ್ಲಿ ಪೊಲೀಸರ ಮನವಿಗೆ ಸ್ಪಂದಿಸಿ ಶವಸಂಸ್ಕಾರ ಮನೆಯ ಕೃಷಿ ಭೂಮಿಯಲ್ಲಿ ನಡೆಸಲು ನಿರ್ಧರಿಸಲಾಯಿತು. ಅದಕ್ಕೂ ಮೊದಲು ಉಡುಪಿಯ ಬೀಡಿನಗುಡ್ಡೆಯಲ್ಲಿ ಶವಸಂಸ್ಕಾರ ನಡೆಸುವ ಬಗ್ಗೆಯೂ ನಿರ್ಧರಿಸಲಾಗಿತ್ತು.

ಮರಣೋತ್ತರ ಪರೀಕ್ಷೆ
ವಿಕ್ರಂ ಗೌಡನ ಮೃತದೇಹವನ್ನು ಮಂಗಳವಾರ ಸಂಜೆ ಮಣಿಪಾಲದ ಕೆಎಂಸಿ ಆಸ್ಪತ್ರೆಗೆ ತರಲಾಗಿತ್ತು. ತಡರಾತ್ರಿ 12 ಗಂಟೆ ಬಳಿಕ ಅಧಿಕಾರಿಗಳ ಸಮ್ಮುಖದಲ್ಲಿ ಮರಣೋತ್ತರ ಪರೀಕ್ಷೆ ಆರಂಭಗೊಂಡು ಬುಧವಾರ ಬೆಳಗ್ಗಿನ ಜಾವ 5 ಗಂಟೆ ತನಕವೂ ಮುಂದುವರಿದಿತ್ತು ಎಂದು ಮೂಲಗಳು ತಿಳಿಸಿವೆ. ಶವಾಗಾರಕ್ಕೆ ಆಗಮಿಸಿದ್ದ ವಿಕ್ರಂ ಗೌಡ ಸಹೋದರ, ಸಹೋದರಿ ಹಾಗೂ ಕುಟುಂಬಸ್ಥರಿಗೆ ಮೃತದೇಹವನ್ನು ತೋರಿಸಿ ಪೊಲೀಸರ ಸರ್ಪಗಾವಲಿನ ನಡುವೆ ಕುಟುಂಬಸ್ಥರಿಗೆ ಹಸ್ತಾಂತರಿಸಲಾ ಯಿತು. ಮೃತದೇಹವನ್ನು ಸಂಪೂರ್ಣವಾಗಿ ಮುಚ್ಚಲಾಗಿತ್ತು.

ಮನೆಯಲ್ಲಿ ಅಣ್ಣ ಮಾಡಿದ ಜಾಗವಿದೆ. ನಾವು ಮೂವರು ಹುಟ್ಟಿ ಬೆಳೆದ ಮನೆ ಅದು. ನಾವೆಲ್ಲರೂ ಇರುವಾಗ ಅನಾಥ ಶವವಾಗಿ ಯಾಕೆ ಸುಟ್ಟು ಹಾಕಬೇಕು? ಯೌವ್ವನದಲ್ಲಿ ಹೇಗೋ ನಮ್ಮ ಜತೆಗೆ ಇರಲಿಲ್ಲ. ಕೊನೆ ಗಳಿಗೆಯಲ್ಲಿ ಮೋಕ್ಷ ನೀಡಬೇಕಾಗಿದೆ. ಪೊಲೀಸರು ನಮ್ಮನ್ನು ಕರೆದಿದ್ದು, ಅದರಂತೆ ಮನೆ ಪರಿಸರದಲ್ಲೇ ಅಂತ್ಯಸಂಸ್ಕಾರ ಪ್ರಕ್ರಿಯೆ ನಡೆಸಲಿದ್ದೇವೆ. – ಸುಗುಣಾ, ವಿಕ್ರಂ ಗೌಡ ಸಹೋದರಿ