ಮೋಹನ್‌ ಬಗಾನ್‌ಗೆ ಸಿಗಲಿದೆ ಸೋನಿ ತಾಕತ್ತು

ಕೋಲ್ಕತಾ: ಇದೇ ಭಾನುವಾರ ನಡೆಯಲಿರುವ ಐ ಲೀಗ್‌ ಫ‌ುಟ್ಬಾಲ್‌ ಪಂದ್ಯಾವಳಿಯ ತನ್ನ ಪಂದ್ಯದಲ್ಲಿ ರಿಯಲ್‌ ಕಾಶ್ಮೀರ್‌ ಎಫ್ಸಿ ತಂಡವನ್ನು ಎದುರಿಸಲಿರುವ ಮಾಜಿ ಚಾಂಪಿಯನ್‌ ಮೋಹನ್‌ ಬಗಾನ್‌ ತಂಡಕ್ಕೆ ಗಾಯದ ಸಮಸ್ಯೆಯಿಂದ ದೂರಾಗಿದ್ದ ಸ್ಟಾರ್‌ ಆಟಗಾರ ಸೋನಿ ನೋರ್ದೆ ಅವರು ಸೇರ್ಪಡೆಗೊಳ್ಳುವುದು ಬಹುತೇಕ ಖಚಿತವಾಗಿದೆ. 

ಸ್ನಾಯು ಸೆಳೆತದಿಂದಾಗಿ ಸತತ ನಾಲ್ಕು ಪಂದ್ಯಗಳಿಂದ ದೂರ ಉಳಿದಿದ್ದ ಸೋನಿ, ಶನಿವಾರ ಮಧ್ಯಾಹ್ನ ತಂಡದ ಇತರ ಆಟಗಾರರ ಜತೆಗೆ ತರಬೇತಿ ಪಡೆದರು. ಅವರ ವಾಪಸಾತಿ ಬಗ್ಗೆ ಮಾಹಿತಿ ನೀಡಿದ ತಂಡದ ತರಬೇತುದಾರ ಶಂಕರ್‌ಲಾಲ್‌ ಚಕ್ರಬೊರ್ತಿ, “”ಸೋನಿಯವರು ಫಿಟ್‌ ಆಗಿದ್ದಾರೆ. ಭಾನುವಾರದ ಪಂದ್ಯದಲ್ಲಿ ಅವರು ತಂಡವನ್ನು ಸೇರ್ಪಡೆಗೊಳ್ಳಲಿದ್ದಾರೆ. ಅಂಕಪಟ್ಟಿಯಲ್ಲಿ ತುಸು ಹಿನ್ನಡೆ ಕಂಡಿರುವ ಮೋಹನ್‌ ಬಗಾನ್‌ ಮುಂದಿನ ಪಂದ್ಯದಿಂದ ಕನಿಷ್ಟ 3 ಅಂಕಗಳನ್ನಾದರೂ ಗಳಿಸುವುದು ಅತ್ಯಗತ್ಯವಾಗಿದೆ” ಎಂದು ತಿಳಿಸಿದ್ದಾರೆ.