ಟ್ರ್ಯಾಕ್ಟರ್ ಚಲಾಯಿಸಿದ ಶಾಸಕಿ ನಿಂಬಾಳ್ಕರ್‌

ಖಾನಾಪುರ: ಈ ಮೊದಲು ಸ್ಕೂಟಿ, ಆಂಬ್ಯುಲೆನ್ಸ್‌ ಚಲಾಯಿಸಿ ಸುದ್ದಿಯಾಗಿದ್ದ ಶಾಸಕಿ ಡಾ| ಅಂಜಲಿ ನಿಂಬಾಳಕರ್‌ ಸೋಮವಾರ ಟ್ರ್ಯಾಕ್ಟರ್‌ ಚಲಾಯಿಸಿ ಸಾಹಸ ಮೆರೆದರು.

ರೈತರಿಗೆ ಬಾಡಿಗೆ ನೀಡುವ ಕೃಷಿ ಯಂತ್ರ ಕೇಂದ್ರ ಉದ್ಘಾಟನೆ ಸಂದರ್ಭದಲ್ಲಿ ಶಾಸಕಿ ಖುದ್ದು ಟ್ರ್ಯಾಕ್ಟರ್‌ ಚಲಾಯಿಸಿ ನೋಡಿದರು. ತಾಲೂಕಿನ ಬೀಡಿ ಗ್ರಾಮದಲ್ಲಿ ಕೃಷಿ ಇಲಾಖೆ ಸಹಯೋಗದಿಂದ ಬೀಡಿ ಹೊಬಳಿ ವ್ಯಾಪ್ತಿಯಲ್ಲಿ ಸೋಮವಾರ ಕೃಷಿಯಂತ್ರ ಧಾರೆ ಬಾಡಿಗೆ ಸೇವಾ ಕೇಂದ್ರ ಉದ್ಭಾಟನೆ ಸಂದರ್ಭದಲ್ಲಿ ಶಾಸಕಿ ಡಾ| ಅಂಜಲಿ ನಿಂಬಾಳಕರ ಟ್ರ್ಯಾಕ್ಟರ್‌ ಚಲಾಯಿಸುವ ಮೂಲಕ ರೈತರಲ್ಲಿ ಹುರುಪು ತುಂಬಿದರು.

ಈ ಸಂದರ್ಭದಲ್ಲಿ ಅವರು ಮಾತನಾಡಿ, ರೈತರಿಗೆ ಕಡಿಮೆ ದರದಲ್ಲಿ ಕೃಷಿ ಯಂತ್ರೋಪಕರಣಗಳನ್ನು ಬಾಡಿಗೆಗೆ ನೀಡಲಾಗುತ್ತಿದ್ದು ಇದರ ಪ್ರಯೋಜನ ಮಾಡಿಕೊಳ್ಳಬೇಕು ಎಂದರು.

ನಂತರ ಅವರು ರೈತರಿಗೆ ಸಹಕಾರಿಯಾಗುವ ಯಂತ್ರೋಪಕರಣಗಳನ್ನು ವೀಕ್ಷಿಸಿದರು. ಜಂಟಿ ಕೃಷಿ ನಿರ್ದೇಶಕ ಶಿವನಗೌಡ ಪಾಟೀಲ, ಉಪ ಕೃಷಿ ನಿರ್ದೇಶಕ ಎಚ್‌.ಡಿ.ಕೊಳೇಕರ, ಸಹಾಯಕ ಕೃಷಿ ನಿರ್ದೇಶಕ ಡಿ.ಬಿ. ಚವ್ಹಾಣ, ಡಿ.ಎಚ್‌.ರಾಠೊಡ, ಆರ್‌.ಜಿ. ಕೋಲಕಾರ, ಮಂಜುನಾಥ ಕುಸಗಲ್‌, ಲಕ್ಷ್ಮೀ ಕಾಡಮನ್ನವರ, ಬೀಡಿ ಗ್ರಾಪಂ ಅಧ್ಯಕ್ಷ ಶಾಂತಾ ಕುಂದೇಕರ, ಉಪಾಧ್ಯಕ್ಷ ಅಬುತಲಿ ಬೈಲಹೊಂಗಲ ಮತ್ತು ಸದಸ್ಯರು ಇದ್ದರು.