ಮಂಗಳೂರು : ಹಿಂದು ಸಂಘಟನೆಯ ಕಾರ್ಯಕರ್ತನ ಇರಿದು ಕೊಲೆ

ಮಂಗಳೂರು: ಇಲ್ಲಿನ ಮರೋಳಿ ಎಂಬಲ್ಲಿನ ನಿಡ್ಡೇಲು ಪ್ರದೇಶದಲ್ಲಿ  ಹಿಂದು ಜಾಗರಣ ವೇದಿಕೆ ಕಾರ್ಯಕರ್ತನೊಬ್ಬನನ್ನು ಅದೇ ಸಂಘಟನೆಗೆ ಸೇರಿದ ಕಾರ್ಯಕರ್ತರು ಶನಿವಾರ ತಡರಾತ್ರಿ ಇರಿದು ಬರ್ಬರವಾಗಿ ಕೊಲೆಗೈದಿರುವ ಘಟನೆ ನಡೆದಿದೆ. 

ಪ್ರತಾಪ್‌ (28) ಎಂಬಾತತನ್ನು ದುಷ್ಕರ್ಮಿಗಳು ಚೂರಿಯಿಂದ ಇರಿದು ಹತ್ಯೆಗೈದಿದ್ದಾರೆ. ಈ ವೇಳೆ ಜೊತೆಯಲ್ಲಿದ್ದ ಮಣಿಕಂಠ ಸಣ್ಣ ಪುಟ್ಟಗಾಯಗಳೊಂದಿಗೆ ಪಾರಾಗಿದ್ದು , ಇದೀಗ ಆಸ್ಪತ್ರೆಯಲ್ಲಿ ಚಿಕಿತ್ಸೆ ಪಡೆಯುತ್ತಿದ್ದಾನೆ. ಪ್ರಶಾಂತ್‌ ಸ್ಥಳದಲ್ಲೇ ದಾರುಣವಾಗಿ ಸಾವನ್ನಪ್ಪಿದ್ದಾನೆ. 

ಕಂಕನಾಡಿ ಪೊಲೀಸರು ಸ್ಥಳಕ್ಕಾಗಮಿಸಿ ಪರಿಶೀಲನೆ ನಡೆಸಿದ್ದು ಪ್ರಕರಣ ದಾಖಲಿಸಿದ್ದು ಈ ಗಾಗಲೇ 6 ಮಂದಿ ಆರೋಪಿಗಳನ್ನು ವಶಕ್ಕೆ ಪಡೆದು ತನಿಖೆ ಮುಂದುವರೆಸಿದ್ದಾರೆ. 

ಪ್ರತಾಪ್‌ ಮೈಸೂರಿನಲ್ಲಿ ಉದ್ಯೋಗಿಯಾಗಿದ್ದು ಮನೆಗೆ ರಜೆಯಲ್ಲಿ ಬಂದಿದ್ದ ಎಂದು ತಿಳಿದು ಬಂದಿದೆ.

ಕಳ್ಳತನ ಮಾಹಿತಿ ನೀಡಿದ್ದೆ ಕೊಲೆಗೆ ಕಾರಣ? 
ಈ ಹಿಂದೆ ಹಿಂಜಾವೇಗೆ ಸೇರಿದ ಕಾರ್ಯಕರ್ತರು ಯಕ್ಷಗಾನ ಕಲಾವಿದರೊಬ್ಬರ ಬ್ಯಾಗ್‌ನಿಂದ ಹಣ ಕಳವು ಮಾಡಿದ್ದರು. ಈ ಮಾಹಿತಿಯನ್ನು ಪ್ರತಾಪ್‌ ನೀಡಿದ್ದು ಇದೇ ಸೇಡಿನಲ್ಲಿ ಕೊಲೆಗೈಯಲಾಗಿದೆ ಎಂದು ಹೇಳಲಾಗಿದ್ದು, ಇನ್ನೊಂದೆಡೆ ಪಂಪ್‌ವೆಲ್‌ನಲ್ಲಿ ನಡೆದ ಬ್ಯಾನರ್‌ ವಿವಾದವೂ ಕಾರಣ ಎನ್ನಲಾಗಿದೆ.