ಮಂಗಳೂರು: ಮಂಗಳೂರು ದಕ್ಷಿಣ ಕ್ಷೇತ್ರದಲ್ಲಿ ಪತಿ-ಪತ್ನಿ ಪಕ್ಷೇತರ ಅಭ್ಯರ್ಥಿಗಳಾಗಿ ನಾಮಪತ್ರ ಸಲ್ಲಿಸಿ ಅಚ್ಚರಿ ಮೂಡಿಸಿದ್ದಾರೆ. ಜತೆಗೆ ಇವರಿಬ್ಬರಲ್ಲಿ ಒಬ್ಬರು ಮಂಗಳೂರು ನಗರ ಉತ್ತರ ಹಾಗೂ ಇನ್ನೊಬ್ಬರು ಮೂಡಬಿದಿರೆ ಕ್ಷೇತ್ರದಲ್ಲೂ ನಾಮಪತ್ರ ಸಲ್ಲಿಸಿರುವುದು ವಿಶೇಷ.
ಬಜಪೆ ಸಮೀಪದ ಕೊಳಂಬೆ ಗ್ರಾಮದ ಮುರನಗರ ನಿವಾಸಿ ಮ್ಯಾಕ್ಸಿಂ ಪಿಂಟೊ ಹಾಗೂ ರೀನಾ ಪಿಂಟೊ ದಂಪತಿ ಈ ರೀತಿ 3 ಕ್ಷೇತ್ರಗಳಲ್ಲಿ ನಾಮಪತ್ರ ಸಲ್ಲಿಸಿದವರು. ಮ್ಯಾಕ್ಸಿಂ ಪಿಂಟೊ ಮಂಗಳೂರು ದಕ್ಷಿಣ ಹಾಗೂ ಮಂಗಳೂರು ಉತ್ತರದಲ್ಲಿ ನಾಮಪತ್ರ ಸಲ್ಲಿಸಿದ್ದಾರೆ. ಪತ್ನಿ ರೀನಾ ಪಿಂಟೊ ಮಂಗಳೂರು ದಕ್ಷಿಣ ಹಾಗೂ ಮೂಡಬಿದಿರೆ ಕ್ಷೇತ್ರದಲ್ಲಿ ನಾಮಪತ್ರ ಸಲ್ಲಿಸಿದ್ದಾರೆ.
ಈ ರೀತಿ ಸ್ಪರ್ಧಿಸುತ್ತಿರುವ ಕುರಿತು ಮ್ಯಾಕ್ಸಿಂ ಪಿಂಟೊ ಮಾತನಾಡಿ, ನಾವು ನಾಮಪತ್ರ ಹಿಂಪಡೆಯುವುದಿಲ್ಲ. ಭವಿಷ್ಯದಲ್ಲಿ ಕರಾವಳಿ ಪ್ರಜಾ ಸೇನೆ ಎಂಬ ಪಕ್ಷ ಆರಂಭಿಸಲಿದ್ದೇವೆ. ಚುನಾವಣೆ ಎದುರಿಸುವ ಕುರಿತು ಮಾಹಿತಿ ಪಡೆಯುವುದಕ್ಕಾಗಿ ಹೀಗೆ ಸ್ಪರ್ಧೆ ಎಂದು ವಿವರಿಸುತ್ತಾರೆ.
ಇದೇ ಮೊದಲಲ್ಲ
ಈ ದಂಪತಿಗೆ ಇದೇ ಮೊದಲ ಚುನಾವಣೆಯಲ್ಲ. ಮ್ಯಾಕ್ಸಿಂ ಪಿಂಟೊ ಪ್ರಕಾರ, ಅವರು ವಿಧಾನಸಭೆ, ಲೋಕಸಭೆ, ಜಿ.ಪಂ., ಗ್ರಾ.ಪಂ. ಸೇರಿದಂತೆ ಒಟ್ಟು 12 ಚುನಾವಣೆ ಎದುರಿಸಿದ್ದಾರೆ. ಪತ್ನಿ ರೀನಾ ಹಿಂದಿನ ಜಿ.ಪಂ. ಚುನಾವಣೆಯಲ್ಲಿ ನೀರುಮಾರ್ಗ ಮೀಸಲು ಕ್ಷೇತ್ರದಿಂದ ಸ್ಪರ್ಧಿಸಿದ್ದರು.
ಸಮಾಜಸೇವೆ ಮಾಡುತ್ತಾ ಬಂದವರು. ಆದರೆ ಪ್ರಚಾರ ಬಯಸಿಲ್ಲ. ಆದರೆ ನಮ್ಮ ಕೆಲಸ ಜನರಿಗೆ ಗೊತ್ತಿದೆ. ಆದರೆ ಇತರ ಪಕ್ಷಗಳ ಹಣ ಬಲದ ಹಿನ್ನೆಲೆಯಲ್ಲಿ ನಮಗೆ ಗೆಲ್ಲಲು ಸಾಧ್ಯವಾಗಿಲ್ಲ ಎಂದು ಮ್ಯಾಕ್ಸಿಂ ವಿವರಿಸಿದ್ದಾರೆ.
