ಮನಸು ಮಲ್ಲಿಗೆ ಹಿಂದೆ ನಾರಾಯಣ್‌

ನಿರ್ದೇಶಕ ಎಸ್‌.ನಾರಾಯಣ್‌ ಅವರು ಮರಾಠಿಯ ಸೂಪರ್‌ ಹಿಟ್‌ ಚಿತ್ರ “ಸೈರಾತ್‌’ ಸಿನಿಮಾವನ್ನು ಕನ್ನಡದಲ್ಲಿ ನಿರ್ದೇಶಿಸುತ್ತಿದ್ದಾರೆ ಎಂಬ ಸುದ್ದಿಯನ್ನು ಇದೇ ಬಾಲ್ಕನಿಯಲ್ಲಿ ಹೇಳಲಾಗಿತ್ತು. ಆ ಚಿತ್ರಕ್ಕೆ “ಮನಸು ಮಲ್ಲಿಗೆ’ ಎಂದು ನಾಮಕರಣ ಮಾಡಿದ್ದಾರೆ. ನಾಯಕಿ ರಿಂಕು, ತೆಲುಗು ನಟ ಸತ್ಯಪ್ರಕಾಶ್‌ ಅವರ ಪುತ್ರ ನಿಶಾಂತ್‌ ಹೀರೋ.

ಅಂದಹಾಗೆ, ಈ ಚಿತ್ರದಲ್ಲಿ ಮರಾಠಿಯ “ಸೈರಾತ್‌’ ಚಿತ್ರದ ನಾಯಕಿ ರಿಂಕು ಅವರೇ ಸ್ವತಃ ಡಬ್ಬಿಂಗ್‌ ಮಾಡಿರುವುದು ಇನ್ನೊಂದು ವಿಶೇಷ. ನಾಯಕ ನಿಶಾಂತ್‌ ಹಾಗೂ ನಾಯಕಿ ರಿಂಕು ಇವರಿಬ್ಬರಿಗೂ ಇದು ಕನ್ನಡದ ಮೊದಲ ಸಿನಿಮಾ. ಈಗಾಗಲೇ ಸಿನಿಮಾ ರಿಲೀಸ್‌ಗೆ ರೆಡಿಯಾಗಿದ್ದು, ಫೆಬ್ರವರಿ 14 ರ ಪ್ರೇಮಿಗಳ ದಿನದಂದು ತೆರೆಗೆ ಬರಲಿದೆ.

ಮೊದಲೇ ಹೇಳಿದಂತೆ, ಇದು ಮನಕಲಕುವ ಪ್ರೇಮಿಗಳಿಬ್ಬರ ಕಥೆ ಆಗಿರುವುದರಿಂದ ಈ ಚಿತ್ರವನ್ನು ಪ್ರೇಮಿಗಳ ದಿನದಂದೇ ತೆರೆಗೆ ತರಲು ನಿರ್ಮಾಪಕ ರಾಕ್‌ಲೈನ್‌ ವೆಂಕಟೇಶ್‌ ತಯಾರಿ ನಡೆಸಿದ್ದಾರೆ. ಚಿತ್ರಕ್ಕೆ ಮನೋಹರ ಜೋಶಿ ಕ್ಯಾಮೆರಾ ಹಿಡಿದಿದ್ದಾರೆ. ಶ್ರೀಕಾಂತ್‌, ಆಕಾಶ್‌ ಚಾವ್ಲಾ, ಚೆನ್ನಾರೆಡ್ಡಿ ಇಟಗಿ ಇತರರು “ಮನಸು ಮಲ್ಲಿಗೆ’ಯ ಹಿಂದೆ ನಿಂತಿದ್ದಾರೆ.