ಜಾತಕ ದೋಷ ನಿವಾರಿಸುವ ನೆಪ: ಸೋದರಮಾವನಿಂದ 4 ವರ್ಷ ಅತ್ಯಾಚಾರ

ಹೊಸದಿಲ್ಲಿ : ಜಾತಕ ದೋಷ ನಿವಾರಿಸುವುದಾಗಿ ಹೇಳಿ ವ್ಯಕ್ತಿಯೊಬ್ಬ ತನ್ನ ಸೋದರ ಸಂಬಂಧಿಯ ಮೇಲೆ ಕಳೆದ ನಾಲ್ಕು ವರ್ಷಗಳಿಂದ ಅತ್ಯಾಚಾರ ನಡೆಸುತ್ತಿದ್ದ ಘಟನೆ ಇದೀಗ ಬಯಲಾಗುವುದರೊಂದಿಗೆ ಪೊಲೀಸರು ಆತನನ್ನು ಬಂಧಿಸಿದ್ದಾರೆ.

23ರ ಹರೆಯದ ಮಹಿಳೆಯ ಸೋದರ ಮಾವನೇ ಜಾತಕ ದೋಷ ನಿವಾರಣೆಯ ನೆಪದಲ್ಲಿ ಆಕೆಯ ಮೇಲೆ ಅತ್ಯಾಚಾರ ನಡೆಸಿಕೊಂಡು ಬಂದಿದ್ದ. ಜಾತಕ ದೋಷ ನಿವಾರಣೆಯಾಗದಿದ್ದರೆ ಆಕೆಯ ತಂದೆ ಸಾಯುವುದಾಗಿ ಆತ ಮಹಿಳೆಗೆ ಹೆದರಿಸುತ್ತಿದ್ದ. ಹಾಗಾಗಿ ಆಕೆ ಆತನ ಅತ್ಯಾಚಾರವನ್ನು ವರ್ಷಾನುಗಟ್ಟಲೆ ಸಹಿಸಿಕೊಂಡಿದ್ದಳು. 

ಅದಾಗಿ ಈಚೆಗೆ ಮಹಿಳೆಗೆ ಮದುವೆಯಾಯಿತು. ಮದುವೆಯ ಬಳಿಕ ಆತ ತನ್ನ ಕಾಮುಕತನ ಈಡೇರಿಕೆಗೆ ಹವಣಿಸಿದಾಗ ಮಹಿಳೆಯು ತನ್ನ ಮಾವನಿಗೆ ವಿಷಯ ತಿಳಿಸಿದಳು. 

ಒಡನೆಯೇ ಮಾವ ತನ್ನ ಸೊಸೆಯನ್ನು ನರೇಲ ಪೊಲೀಸ್‌ ಠಾಣೆಗೆ ಒಯ್ದು ಅಲ್ಲಿ ಆಕೆಯ ಸೋದರ ಮಾವನ ವಿರುದ್ಧ ದೂರು ದಾಖಲಿಸಿದರು.  

ದೂರು ದಾಖಲಿಸಿಕೊಂಡು ಆರೋಪಿಯನ್ನು ಬಂಧಿಸಿದ ಪೊಲೀಸರು ದಿಲ್ಲಿಯ ಮಹಿಳಾ ಆಯೋಗಕ್ಕೆ ವಿಷಯ ತಿಳಿಸಿ ಅತ್ಯಾಚಾರ ಸಂತ್ರಸ್ತೆಗೆ ಆಪ್ತ ಸಲಹೆ ನೀಡುವಂತೆ ಕೋರಿದರು. 

ಈ ನಡುವೆ ರಾಷ್ಟ್ರ ರಾಜಧಾನಿಯಲ್ಲಿ ತನ್ನ ನೆರೆಮನೆಯ 3ನೇ ತರಗತಿ ಓದುತ್ತಿರುವ ಬಾಲಕಿಯ ಮೇಲೆ ಅತ್ಯಾಚಾರಕ್ಕೆ ಯತ್ನಿಸಿ ಸಿಕ್ಕಿಬಿದ್ದ ಘಟನೆ ನಡೆದಿದೆ. 

ಉತ್ತರ ದಿಲ್ಲಿಯ ಸ್ವರೂಪ್‌ ನಗರದಿಂದ ಈ ಘಟನೆಯು ವರದಿಯಾಯಿತೆಂದು ಪೊಲೀಸ್‌ ಉಪ ಆಯುಕ್ತ ಅಸ್ಲಂ ಖಾನ್‌ ತಿಳಿಸಿದ್ದಾರೆ. 

ಪೊಲೀಸರು ಎಫ್ಐಆರ್‌ ದಾಖಲಿಸಿಕೊಂಡು ತನಿಖೆ ನಡೆಸುತ್ತಿರುವುದಾಗಿ ಅವರು ತಿಳಿಸಿದ್ದಾರೆ.