ಕೊಚ್ಚಿ: ಮಾಲಿವುಡ್‌ ಸಿನಿರಂಗದ ಖ್ಯಾತ ನಟಿಯೊಬ್ಬರು ಹಠಾತ್‌ ಹೃದಯಾಘಾತದಿಂದ ನಿಧನರಾಗಿದ್ದು, ಮಾಲಿವುಡ್‌ ರಂಗಕ್ಕೆ ಆಘಾತನ್ನುಂಟು ಮಾಡಿದೆ.
ಲಕ್ಷ್ಮಿಕಾ ಸಜೀವನ್ (24) ಯುನೈಟೆಡ್ ಅರಬ್ ಎಮಿರೇಟ್ಸ್‌ನ ಶಾರ್ಜಾದಲ್ಲಿ ಶುಕ್ರವಾರ(ಡಿ.8 ರಂದು) ನಿಧನರಾಗಿದ್ದಾರೆ ಎಂದು ವರದಿಯಾಗಿದೆ. ಶಾರ್ಜಾದಲ್ಲಿರುವ ಬ್ಯಾಂಕ್‌ ವೊಂದರಲ್ಲಿ ಇದ್ದಾಗ ಅವರಿಗೆ ಹಠಾತ್‌ ಹೃದಯಾಘಾತವಾಗಿದೆ ಎಂದು ವರದಿ ತಿಳಿಸಿದೆ.
ಮಾಲಿವುಡ್‌ ಸಿನಿಮಾರಂಗದಲ್ಲಿ ಗುರುತಿಸಿಕೊಂಡಿದ್ದ ಅವರು, ʼಕಾಕ್ಕʼ ಎನ್ನುವ ಕಿರುಚಿತ್ರದಲ್ಲಿ ʼಪಂಚಮಿʼಯ ಪಾತ್ರವನ್ನು ಮಾಡಿ ಗಮನ ಸೆಳೆದಿದ್ದರು. ಕಿರುಚಿತ್ರದಲ್ಲಿನ ಅವರ ನಟನೆಗೆ ಅಪಾರ ಮೆಚ್ಚುಗೆ ವ್ಯಕ್ತವಾಗಿತ್ತು.
ಇದಾದ ಬಳಿಕ ಅವರು ಮಾಲಿವುಡ್‌ ನಲ್ಲಿ ಅನೇಕ ಸಿನಿಮಾದಲ್ಲಿ ಕಾಣಿಸಿಕೊಂಡಿದ್ದರು. ಮುಖ್ಯವಾಗಿ ʼಪೂಜ್ಯಮ್ಮʼ, ʼಪಂಚವರ್ಣತಥಾʼ, ʼಸೌದಿ ವೆಲ್ಲಕ್ಕʼ, ʼಉಯರೆʼ, ʼಒರು ಕುಟ್ಟನಾಡನ್ ಬ್ಲಾಗ್ʼ, ʼಒರು ಯಮಂದನ್ ಪ್ರೇಮಕಥಾʼ, ʼನಿತ್ಯಹರಿತ ನಾಯಗನ್ʼ ಮುಂತಾದ ಸಿನಿಮಾದಲ್ಲಿ ಅವರು ನಟಿಸಿದ್ದರು.
ಕೊನೆಯ ಬಾರಿ ಅವರು, 2021 ರಲ್ಲಿ ತೆರೆಕಂಡ ʼಕೂನ್ʼ ಸಿನಿಮಾದಲ್ಲಿ ಕಾಣಿಸಿಕೊಂಡಿದ್ದರು. ʼಪೂಜ್ಯಮ್ಮʼ ಚಿತ್ರದಲ್ಲಿ ʼದೇವಯಾನಿʼ ಎನ್ನುವ ಶಿಕ್ಷಕಿಯ ಪಾತ್ರವನ್ನು ಪ್ರೇಕ್ಷಕರು ಮೆಚ್ಚಿಕೊಂಡಿದ್ದರು.
ಅವರ ನಿಧನಕ್ಕೆ ಮಾಲಿವುಡ್‌ ಕಂಬನಿ ಮಿಡಿದಿದೆ.
