ನಿಯಮ ಉಲ್ಲಂಘನೆ: ತಂಡದಿಂದ ದೂರ ಉಳಿಯುವಂತೆ ಹಫೀಜ್ ಗೆ ಸೂಚಿಸಿದ ಪಾಕ್ ಮಂಡಳಿ

ಸೌಥಂಪ್ಟನ್: ಕೋವಿಡ್ ನಿಯಮಾವಳಿಯನ್ನು ಗಾಳಿಗೆ ತೂರಿ ಹಿರಿಯ ಮಹಿಳೆಯೊಂದಿಗೆ ಫೋಟೋ ತೆಗೆದುಕೊಂಡ ಕಾರಣಕ್ಕೆ ಹಿರಿಯ ಆಟಗಾರ ಮೊಹಮ್ಮದ್ ಹಫೀಜ್ ಅವರನ್ನು ತಂಡದಿಂದ ದೂರ ಉಳಿಯುವಂತೆ ಪಾಕ್ ಮಂಡಳಿ ಸೂಚಿಸಿದೆ.

ಇಂಗ್ಲೆಂಡ್ ವಿರುದ್ಧದ ಎರಡನೇ ಟೆಸ್ಟ್ ಪಂದ್ಯದ ಆರಂಭಕ್ಕೆ ಒಂದು ದಿನ ಮೊದಲು ಈ ಬೆಳವಣಿಗೆ ನಡೆದಿದೆ.

ಏಜಸ್ ಬೌಲ್ ನ ಗಾಲ್ಫ್ ಕೋರ್ಟ್ ಗೆ ಹೋಗಿದ್ದ ಮೊಹಮ್ಮದ್ ಹಫೀಜ್ ಅಲ್ಲಿ ಹಿರಿಯ ಮಹಿಳೆಯೊಂದಿಗೆ ಫೋಟೋ ತೆಗೆದುಕೊಂಡಿದ್ದರು. ಅಷ್ಟೇ ಅಲ್ಲದೆ ಆ ಫೋಟೋವನ್ನು ಟ್ಟಿಟ್ಟರ್ ನಲ್ಲಿ ಪೋಸ್ಟ್ ಮಾಡಿದ್ದರು. ಈ ಪೋಸ್ಟ್ ವೈರಲ್ ಆಗುತ್ತಿದ್ದಂತೆ ಪಿಸಿಬಿ ಶಿಸ್ತುಕ್ರಮ ಕೈಗೊಂಡಿದೆ.

ಈ ಘಟನೆಯ ನಂತರ ಹಫೀಜ್ ಗೆ ಕೋವಿಡ್ ಪರೀಕ್ಷೆ ನಡೆಸಿದ್ದು, ಗುರುವಾರ ಪರೀಕ್ಷಾ ಫಲಿತಾಂಶ ವರದಿ ಬರುವ ನಿರೀಕ್ಷೆಯಿದೆ. ಸದ್ಯ ಹಫೀಜ್ ರನ್ನು ತಂಡದಿಂದ ದೂರ ಉಳಿಸಿದ್ದು, ಎರಡು ಬಾರಿಯ ಕೋವಿಡ್ ಪರೀಕ್ಷೆಯಲ್ಲಿ ನೆಗೆಟಿವ್ ಫಲಿತಾಂಶ ಬಂದ ನಂತರ ಮಾತ್ರವೇ ಅವರು ತಂಡ ಸೇರಲು ಸಾಧ್ಯ.