ಶ್ರೀಕೃಷ್ಣನಂತೆ ನಾನೂ ಪಕ್ಷಪಾತಿ: ಸಿಎಂ

ಬೆಂಗಳೂರು: ಶ್ರೀಕೃಷ್ಣ ಹೇಗೆ ನ್ಯಾಯಪರ ಪಕ್ಷಪಾತಿಯೋ ಹಾಗೆಯೇ ನಾನು ಕೂಡ ಅಹಿಂದ ಪರ ಪಕ್ಷಪಾತಿ ಎಂದು ಮುಖ್ಯಮಂತ್ರಿ ಸಿದ್ದರಾಮಯ್ಯ ಹೇಳಿದ್ದಾರೆ. ನಗರದ ರವೀಂದ್ರ ಕಲಾಕ್ಷೇತ್ರದಲ್ಲಿ ಕನ್ನಡ ಮತ್ತು ಸಂಸ್ಕೃತಿ ಇಲಾಖೆ ವತಿಯಿಂದ ಆಯೋಜಿಸಿದ್ದ ಶ್ರೀಕೃಷ್ಣ ಜಯಂತಿ ಉದ್ಘಾಟಿಸಿ ಮಾತನಾಡಿದ ಅವರು, ಶ್ರೀಕೃಷ್ಣ ಅವತಾರ ಪುರುಷ. ದೃಷ್ಟ ಶಿಕ್ಷಕ, ಶಿಷ್ಟ ಪರಿಪಾಲಕನಾಗಿದ್ದು, ಕೆಟ್ಟದನ್ನು ಶಿಕ್ಷಿಸಬೇಕು. ಒಳ್ಳೆಯದ್ದಕ್ಕೆ ರಕ್ಷಣೆ ಕೊಡಬೇಕು ಎಂದು ಹೇಳಿದ್ದಾನೆ ಎಂದು ತಿಳಿಸಿದರು.

ಮಹಾಭಾರತದಲ್ಲಿಯೂ ಕೂಡ ಶ್ರೀಕೃಷ್ಣ ಅರ್ಜುನನಿಗೆ ರಾಜಧರ್ಮದ ನೀತಿ ಹೇಳಿ, ಧರ್ಮದ ಪರವಾಗಿ ನಿಂತಿದ್ದನು. ಆದ್ದರಿಂದ ಶ್ರೀಕೃಷ್ಣ ಪಕ್ಷಪಾತಿ ಎಂದು ಹೇಳುವವರೂ ಇದ್ದಾರೆ. ಶೋಷಿತ ವರ್ಗಗಳಿಗೆ ಸಾಮಾಜಿಕವಾಗಿ ನ್ಯಾಯ ಸಿಗಬೇಕು ಎಂಬ ಸಿದ್ಧಾಂತವನ್ನು ನಾನು ನಂಬಿದ್ದು, ಕೃಷ್ಣನಂತೆ ನಾನು ಕೂಡ ಅಹಿಂದ ಪರ ಪಕ್ಷಪಾತಿಯಾಗಿದ್ದೇನೆ. ಶೋಷಿತರಿಗೆ ಜಾತಿ ಸಮೀಕ್ಷೆ ವರದಿ ಬಂದ ನಂತರ ಚರ್ಚಿಸಿ ಸರ್ಕಾರ ಅಗತ್ಯ ಸೌಲಭ್ಯ ಒದಗಿಸುತ್ತದೆ ಎಂದು ಭರವಸೆ ನೀಡಿದರು. 

ಸರ್ಕಾರದಿಂದ ಆಚರಣೆ: ಯಾದವ ಸಂಘದಿಂದ ನಡೆಸುವ ಶ್ರೀಕೃಷ್ಣ ಜನ್ಮಾಷ್ಠಮಿಯನ್ನು ಸರ್ಕಾರದಿಂದ ಆಚರಿಸಬೇಕು ಮತ್ತು ಅಂದು ರಜೆ ನೀಡಬೇಕು ಎಂಬ ಬೇಡಿಕೆ ಇತ್ತು. ಹಾಗೆಯೇ ಕೃಷ್ಣ ಜನ್ಮಾಷ್ಠಮಿಯನ್ನು ಸರ್ಕಾರವೇ ಆಚರಿಸುತ್ತಿದೆ ಎಂದ ಅವರು, ರಜೆ ಘೋಷಣೆ ಮಾಡುವುದರಿಂದ ಸರ್ಕಾರಿ ನೌಕರರಿಗೆ ಒಂದು ರಜೆ ಸಿಗುತ್ತದೆ ಹೊರತು ಯಾದವ ಸಮಾಜಕ್ಕೆ ಯಾವುದೇ ಪ್ರಯೋಜನವಾಗುವುದಿಲ್ಲ. ಮಹಾತ್ಮರನ್ನು ಪ್ರತಿಯೊಬ್ಬರು ಸ್ಮರಿಸಬೇಕೇ ಹೊರತು, ರಜೆಯಲ್ಲಿ ಮಜಾ ಮಾಡುವುದಲ್ಲ ಎಂದರು. 

ಮೌಡ್ಯದಿಂದಲೇ ಶೋಷಣೆ: ನಮ್ಮಲ್ಲಿ ಮೌಡ್ಯಗಳಿದ್ದು, ಅವುಗಳನ್ನು ತೊಡೆದು ಹಾಕಬೇಕು. ಯಾವ ಸಮುದಾಯಗಳಲ್ಲಿ ಮೌಡ್ಯ, ಕಂದಾಚಾರ ಇರುವುದಿಲ್ಲವೋ ಅಲ್ಲಿ ಶೋಷಣೆ ಇರುವುದಿಲ್ಲ. ಶಿಕ್ಷಣದಿಂದ ವೈಚಾರಿಕತೆ ಬೆಳೆಸಿಕೊಂಡು ಜನರಲ್ಲಿ ಜಾಗೃತಿ ಮೂಡಿಸುವ ಕೆಲಸ ಮಾಡಬೇಕು. ಶಿಕ್ಷಣ, ಸಂಘಟನೆ, ಹೋರಾಟ ಎಂಬ ಮೂರು ಮಂತ್ರಗಳನ್ನು ಎಲ್ಲಾ ಶೋಷಿತ ವರ್ಗಗಳು ಪಾಲನೆ ಮಾಡಿದರೆ, ಯಾವುದೇ ಸಮುದಾಯ ಶೋಷಿತವಾಗುವುದಿಲ್ಲ.

“ಯಾವ ವ್ಯವಸ್ಥೆಗೆ ಚಲನೆ ಇಲ್ಲವೋ ಆ ವ್ಯವಸ್ಥೆ ಬದಲಾಗುವುದಿಲ್ಲ” ಎಂದು ರಾಮಮನೋಹರ ಲೋಹಿಯಾ ಹೇಳಿದ್ದು, ಶಿಕ್ಷಣದಿಂದ ಚಲನಶೀಲತೆ ರೂಢಿಸಿಕೊಂಡು ಪ್ರಗತಿ ಸಾಧಿಸಬೇಕು ಎಂದ ಸಲಹೆ ನೀಡಿದರು.  ಕಾರ್ಯಕ್ರಮದಲ್ಲಿ ಯಾದವವಾಣಿ ಪತ್ರಿಕೆ ಬಿಡುಗಡೆ ಮಾಡಲಾಯಿತು. ನಂತರ ಮಾತನಾಡಿದ ಯಾದವ ಸಂಘದ ರಾಜ್ಯಾಧ್ಯಕ್ಷ ಲಕ್ಷ್ಮೀಪತಿ, ಆರ್ಥಿಕ, ಸಾಮಾಜಿಕ, ರಾಜಕೀಯ ಮತ್ತು ಶೈಕ್ಷಣಿಕವಾಗಿ ಹಿಂದುಳಿದಿರುವ ಯಾದವ ಸಮುದಾಯವನ್ನು ಪರಿಶಿಷ್ಟ ಪಂಗಡಕ್ಕೆ ಸೇರಿಸಲು ಕೇಂದ್ರ ಸರ್ಕಾರಕ್ಕೆ ಶಿಫಾರಸ್ಸು ಮಾಡಬೇಕು.

ಈ ಬಾರಿಯ ಚುನಾವಣೆಯಲ್ಲಿ 6 ಮಂದಿ ಯಾದವರಿಗೆ ಪಕ್ಷದಿಂದ ಟಿಕೆಟ್‌ ನೀಡಬೇಕು ಎಂಬುದು ಸೇರಿದಂತೆ ವಿವಿಧ ಬೇಡಿಕೆ ಪತ್ರ ಸಲ್ಲಿಸಿದರು. ಸಮಾರಂಭದಲ್ಲಿ ಕನ್ನಡ ಮತ್ತು ಸಂಸ್ಕೃತಿ ಸಚಿವೆ ಉಮಾಶ್ರೀ, ಬೆಂಗಳೂರು ನಗರಾಭಿವೃದ್ಧಿ ಸಚಿವ ಕೆ.ಜೆ.ಜಾರ್ಜ್‌, ವಿಧಾನಪರಿಷತ್‌ ಸದಸ್ಯ ಎಚ್‌.ಎಂ.ರೇವಣ್ಣ, ಮೇಯರ್‌ ಪದ್ಮಾವತಿ, ಬಿಎಂಟಿಸಿ ಅಧ್ಯಕ್ಷ ನಾಗರಾಜ್‌ ಯಾದವ್‌, ಬೆಂಗಳೂರು ಗ್ರಾಮಾಂತರ ಜಿಪಂ ಅಧ್ಯಕ್ಷ ವಿ.ಪ್ರಸಾದ್‌ ಸೇರಿದಂತೆ ಹಲವರು ಉಪಸ್ಥಿತರಿದ್ದರು. 

ನಾನು ಗೋರಕ್ಷಕನಲ್ಲವೇ?
“ಯಾದವರು ಬಿಹಾರ, ಉತ್ತರ ಪ್ರದೇಶ ಸೇರಿದಂತೆ ಹಲವೆಡೆ ಬಲಾಡ್ಯರಾಗಿದ್ದಾರೆ. ರಾಜ್ಯದಲ್ಲಿ ಮಾತ್ರ ಹಿಂದುಳಿದಿದ್ದಾರೆ. ಗೋ ಪಾಲನೆಯನ್ನು ಪುರಾತನ ಕಾಲದಿಂದಲೂ ಮಾಡಿದ್ದಾರೆ. ಪ್ರಸ್ತುತ ಗೋ ರಕ್ಷಣೆ ಹೆಸರಿನಲ್ಲಿ ಕೆಲವರು ನಾಟಕ ಆಡುತ್ತಿದ್ದಾರೆ. ಅವರು ಒಂದು ದಿನವೂ ಸಗಣಿ ಎತ್ತಿಲ್ಲ. ಸರ್ಕಾರ ಒಂದು ಲೀಟರ್‌ ಹಾಲಿಗೆ 5 ರೂ. ಬೆಂಬಲ ಬೆಲೆ ನೀಡುತ್ತಿದೆ. ಹಾಗಾದರೆ ನಾನು ಗೋ ರಕ್ಷಕನಲ್ಲವೇ? ನಿಜವಾಗಿ ಸಗಣಿ ಎತ್ತುವವನೇ ಗೋರಕ್ಷಕ’ ಎಂದು ಮುಖ್ಯಮಂತ್ರಿ ಸಿದ್ದರಾಮಯ್ಯ ಅಭಿಪ್ರಾಯಪಟ್ಟರು.

ಸುಮಾರು 33 ಶೋಷಿತ ಸಮುದಾಯದ ಜಾತಿಗಳಿಗೆ ಬೆಂಗಳೂರಿನಲ್ಲಿ ಒಂದೇ ಕಡೆ ಸಮುದಾಯ ಭವನ ಸ್ಥಾಪನೆಗೆ ಜಾಗ ಕೊಡಲು ನಿರ್ಧರಿಸಲಾಗಿದೆ. ಮುಂದಿನ ಕ್ಯಾಬಿನೆಟ್‌ ಸಭೆಯಲ್ಲಿ ಅದನ್ನು ಪರಿಶೀಲಿಸಿ ಅನುಮೋದನೆ ನೀಡಲಾಗುವುದು.
-ಸಿದ್ದರಾಮಯ್ಯ, ಮುಖ್ಯಮಂತ್ರಿ