ಟಿಕೆಟ್‌ ಕನವರಿಕೆ ಬಿಟ್ಟು ಕೆಲ್ಸ ಮಾಡಿ

ಬೆಂಗಳೂರು: ವಿಧಾನಸಭೆ ಚುನಾವಣೆಗೆ ಸ್ಪರ್ಧಿಸಲು ಆಸಕ್ತರಾಗಿರುವ ಸಂಸದರಿಗೆ ಬಿಜೆಪಿ ರಾಷ್ಟ್ರೀಯ ಅಧ್ಯಕ್ಷ ಅಮಿತ್‌ ಶಾ ನಿರಾಶೆ ಉಂಟು ಮಾಡಿದ್ದಾರೆ. ಜತೆಗೆ, ಟಿಕೆಟ್‌ ಗಾಗಿ ಪೈಪೋಟಿ ನಡೆಸುತ್ತಿರುವವರಿಗೂ ಎಚ್ಚರಿಕೆಯ ಸಂದೇಶ ರವಾನಿಸಿದ್ದು, ಪಕ್ಷದ ಗೆಲುವೊಂದೇ ಎಲ್ಲರಿಗೂ ಮುಖ್ಯವಾಗಬೇಕೆಂಬ ಖಡಕ್‌ ಸೂಚನೆ ನೀಡಿದ್ದಾರೆ.

ಬೆಂಗಳೂರು ಹೊರವಲಯದ ಖಾಸಗಿ ಹೋಟೆಲ್‌ ನಲ್ಲಿ ಭಾನುವಾರ ಸಂಸದರು, ಶಾಸಕರ ಸಭೆಯಲ್ಲಿ ಮಾತನಾಡಿದ ಅಮಿತ್‌ ಶಾ, ವಿಧಾನಸಭೆ ಟಿಕೆಟ್‌ ಹಂಚಿಕೆ ವಿಚಾರ ದಲ್ಲಿ ಹೈಕಮಾಂಡ್‌ ನಿರ್ಧಾರವೇ ಅಂತಿಮ. ಯಾರೂ ಟಿಕೆಟ್‌ ಬಗ್ಗೆ ಬಹಿರಂಗ ಹೇಳಿಕೆ ನೀಡುವಂತಿಲ್ಲ ಮತ್ತು ಅಭ್ಯರ್ಥಿಗಳನ್ನು ಘೋಷಣೆ ಮಾಡುವಂತಿಲ್ಲ ಎಂದು ಸ್ಪಷ್ಟ ಮಾತುಗಳಲ್ಲಿ ಹೇಳಿದ್ದಾರೆ. ಸಭೆಗೆ ಸಂಬಂಧಿಸಿ 
ದಂತೆ ಮೊದಲೇ ತಾವು ಸಂಗ್ರಹಿಸಿದ್ದ ಮಾಹಿತಿಯೊಂದಿಗೆ ಆಗಮಿಸಿದ್ದ ಅಮಿತ್‌ ಶಾ, ಇತರರ ಮಾತು ಕೇಳುವುದಕ್ಕಿಂತ ತಾವೇ ಹೆಚ್ಚಾಗಿ ಮಾತನಾಡಿದರು. ಪ್ರತಿಯೊಬ್ಬರ ಮಾಹಿತಿಯೂ ಶಾ ಬಳಿ ಇದ್ದುದರಿಂದ ಬಹುತೇಕರು ಮೌನವಾಗಿ ಅಮಿತ್‌ ಶಾ ನಿರ್ದೇಶನಗಳನ್ನು ಪಾಲಿಸಿದರು.

ಅಭ್ಯರ್ಥಿಗಳ ಆಯ್ಕೆ ಕುರಿತಂತೆ ವಿಷಯ ಪ್ರಸ್ತಾಪಿಸಿದ ಕೆಲವು ಸಂಸದರು, ಶಾಸಕರು, ಸಾಮಾನ್ಯವಾಗಿ ಚುನಾವಣೆಗೆ ನಾಲ್ಕಾರು ತಿಂಗಳಿರುವಾಗಲೇ ಅಭ್ಯರ್ಥಿಗಳು ಯಾರು ಎಂಬುದು ಬಹುತೇಕ ನಿರ್ಧಾರವಾಗುತ್ತದೆ. ಇದರಿಂದ ಅವರು ಕ್ಷೇತ್ರದಲ್ಲಿ ಕೆಲಸ ಮಾಡಿ ಮತಗಳನ್ನು ಕ್ರೋಢೀಕರಿ ಸುತ್ತಾರೆ. ಆದ್ದರಿಂದ ಬಿಜೆಪಿ ಅಭ್ಯರ್ಥಿಗಳ ಪಟ್ಟಿ ವಿಳಂಬ ವಾದರೂ ಯಾರಿಗೆ ಟಿಕೆಟ್‌ ಎಂಬ ಮುನ್ಸೂಚನೆ ನೀಡು ವುದು ಸೂಕ್ತ ಎಂದು ಸಲಹೆ ಮಾಡಿದರು. ಅಲ್ಲದೆ, ಕೆಲವು ಕ್ಷೇತ್ರಗಳಲ್ಲಿ ಬಿಜೆಪಿ ರಾಜ್ಯಾಧ್ಯಕ್ಷ ಬಿ.ಎಸ್‌.ಯಡಿಯೂರಪ್ಪ ಅವರು ಈಗಾಗಲೇ ಅಭ್ಯರ್ಥಿಗಳ ಹೆಸರು ಘೋಷಣೆ ಮಾಡಿದ್ದನ್ನೂ ಪ್ರಸ್ತಾಪಿಸಿದರು ಎನ್ನಲಾಗಿದೆ. ಇದಕ್ಕೆ ಪ್ರತಿಕ್ರಿಯಿಸಿದ ಅಮಿತ್‌ ಶಾ, ಟಿಕೆಟ್‌ ಹಂಚಿಕೆ ವಿಚಾರದಲ್ಲಿ ಹೈಕಮಾಂಡ್‌ ಅಂತಿಮ ತೀರ್ಮಾನ ಕೈಗೊಳ್ಳುತ್ತದೆ. ಈ ತೀರ್ಮಾನ ಹೊರಬೀಳದೆ ಯಾರೂ
ಅಭ್ಯರ್ಥಿ ಘೋಷಣೆ ಮಾಡುವಂತಿಲ್ಲ ಎಂದು ತಾಕೀತು ಮಾಡಿದರು. ಸಂಸದರಿಗೆ ವಿಧಾನಸಭೆ ಚುನಾವಣೆಯಲ್ಲಿ ಸ್ಪರ್ಧಿಸುವ ವಿಚಾರಕ್ಕೂ ಅಷ್ಟೇ ಕಠಿಣವಾಗಿ ಪ್ರತಿಕ್ರಿಯಿಸಿದ ಶಾ, ಶೋಭಾ ಕರಂದ್ಲಾಜೆಗೆ ಟಿಕೆಟ್‌ ನೀಡಲಾಗುವುದು ಎಂದು ಅನಂತ ಕುಮಾರ್‌ ಹೇಳಿದರೆ ಅದು ಭರವಸೆ ಅಷ್ಟೇ ಹೊರತು ಖಚಿತ ಅಲ್ಲ ಎಂದು ಹೇಳುವ ಮೂಲಕ ಶೋಭಾ ಕರಂದ್ಲಾಜೆ ಅವರ ವಿಧಾನಸಭೆ ಚುನಾವಣೆಗೆ ಸ್ಪರ್ಧಿಸುವ ಆಕಾಂಕ್ಷೆಗೆ ತಣ್ಣೀರೆರಚಿದರು. ಸಂಸದರಿಗೆ ನಿರಾಸೆ ಕಾದಿದೆ ಎಂಬ ಮುನ್ಸೂಚನೆಯನ್ನೂ ನೀಡಿದರು.
ಜತೆಗೆ ಪರಿವರ್ತನಾ ಯಾತ್ರೆಯಲ್ಲಿ ಬಹಿರಂಗವಾಗಿ ಅಭ್ಯರ್ಥಿ ಘೋಷಣೆ ಮಾಡುತ್ತಿರುವ ಯಡಿಯೂರಪ್ಪ ಅವರಿಗೂ ಹೇಳಬೇಕಾದ ಸಂದೇಶವನ್ನು ರವಾನಿಸಿದರು.

15ರೊಳಗೆ ವರದಿ ನೀಡಲು ಸೂಚನೆ
ಬೆಂಗಳೂರು: ಸಂಸದರು ಮತ್ತು ಶಾಸಕರು ತಮಗೆ ವಹಿಸಿದ್ದ ವಿಧಾನಸಭಾ ಕ್ಷೇತ್ರಗಳಲ್ಲಿ ಸರಿಯಾಗಿ ಕಾರ್ಯನಿರ್ವಹಿಸದ ಬಗ್ಗೆ ಅಸಮಾಧಾನ ವ್ಯಕ್ತಪಡಿಸಿದ ಬಿಜೆಪಿ ರಾಜ್ಯ ಚುನಾವಣಾ ಉಸ್ತುವಾರಿ ಪ್ರಕಾಶ್‌ ಜಾವಡೇಕರ್‌ ಮತ್ತು ರಾಜ್ಯಾಧ್ಯಕ್ಷ ಬಿ. 
ಎಸ್‌.ಯಡಿಯೂರಪ್ಪ, ನೆಪಗಳನ್ನು ಹೇಳದೆ ಜ. 15ರೊಳಗೆ ಉಸ್ತುವಾರಿ ಕ್ಷೇತ್ರಗಳಿಗೆ ತೆರಳಿ ಕಾರ್ಯಕರ್ತರೊಂದಿಗೆ ಚರ್ಚಿಸಿ ವರದಿ ಸಲ್ಲಿಸುವಂತೆ ತಾಕೀತು ಮಾಡಿದ್ದಾರೆ. ಬಿಜೆಪಿ ರಾಷ್ಟ್ರೀಯ ಅಧ್ಯಕ್ಷ ಅಮಿತ್‌ ಶಾ ಆಗಮನ ವಿಳಂಬ  ವಾದ ಹಿನ್ನೆಲೆಯಲ್ಲಿ ಸಂಸದರು, ಶಾಸಕರೊಂದಿಗೆ ಅನೌಪ  ಚಾರಿಕ ಸಭೆ ನಡೆಸಿದ ಜಾವಡೇಕರ್‌ ಮತ್ತು ಯಡಿಯೂರಪ್ಪ, ಈ ಹಿಂದೆ ಅಮಿತ್‌ ಶಾ ಅವರು ಸಂಸದರು, ಶಾಸಕರಿಗೆ ವಹಿ ಸಿದ್ದ ಕ್ಷೇತ್ರ ಉಸ್ತುವಾರಿ ಕುರಿತು ಮಾಹಿತಿ ಪಡೆದರು. ಈ ವೇಳೆ ಒಮ್ಮೆಯೂ ಉಸ್ತುವಾರಿ ಹೊಂದಿದ್ದ ಕ್ಷೇತ್ರದತ್ತ ತಲೆ ಹಾಕದ ಕೊಪ್ಪಳ ಸಂಸದ ಕರಡಿ ಸಂಗಣ್ಣ, ಬೆಳಗಾವಿ ಸಂಸದ ಸುರೇಶ್‌ ಅಂಗಡಿ, ಅರಭಾವಿ ಶಾಸಕ ಬಾಲಚಂದ್ರ ಜಾರಕಿಹೊಳಿ ಮತ್ತು ಬೆಂಗಳೂರು ದಕ್ಷಿಣ ಶಾಸಕ ಎಂ. ಕೃಷ್ಣಪ್ಪ ಅವರಿಂದ ವಿವರಣೆ ಪಡೆದರು. ಈ ವೇಳೆ ಸಂಸದರು ಮತ್ತು ಶಾಸಕರು ಪರಿವರ್ತನಾ ಯಾತ್ರೆ, ಮದುವೆ, ಅನಾರೋಗ್ಯದ ನೆಪ ಹೇಳಿದ್ದು, ಇದರಿಂದ ಅಸಮಾಧಾನಗೊಂಡ ಇಬ್ಬರೂ, ಜನವರಿ 15 ರೊಳಗೆ ಜವಾಬ್ದಾರಿ ಪಡೆದಿರುವ ಕ್ಷೇತ್ರಗಳಿಗೆ ತೆರಳಿ ಮತದಾರರು ಮತ್ತು ಕಾರ್ಯಕರ್ತರನ್ನು ಭೇಟಿ ಮಾಡಬೇಕು ಮತ್ತು
ಈ ಕುರಿತು ವರದಿ ಸಲ್ಲಿಸಬೇಕೆಂದು ತಾಕೀತು ಮಾಡಿದರು.

ಸುಳ್ಳು ಹೇಳಿ ಸಿಕ್ಕಿಹಾಕಿಕೊಂಡರು: ಬಹುತೇಕ ಶಾಸಕರು ಮತ್ತು ಸಂಸದರು ತಮಗೆ ವಹಿಸಿದ್ದ ಜವಾಬ್ದಾರಿಯನ್ನು ಪೂರ್ಣ ಪ್ರಮಾಣದಲ್ಲಿ ನಿಭಾಯಿಸದ ಬಗ್ಗೆ ಸಭೆಯಲ್ಲಿ ಒಪ್ಪಿಕೊಂಡರು. ಆದರೆ, ಪ್ರಕಾಶ್‌ ಜಾವಡೇಕರ್‌, ಕೆಲವು ಶಾಸಕರು ಜವಾಬ್ದಾರಿ ವಹಿಸಿದ್ದ ಕ್ಷೇತ್ರಗಳಿಗೆ ಒಮ್ಮೆ ಮಾತ್ರ ಹೋಗಿದ್ದ ಬಗ್ಗೆ ತಮ್ಮಲ್ಲಿರುವ ದಾಖಲೆಗಳನ್ನು ತೋರಿಸಿ ಹೇಳಿದರು. ಇದರಿಂದ ಆ ಶಾಸಕರು ಮುಜುಗರಕ್ಕೆ ಒಳಗಾಗಬೇಕಾಯಿತು ಎನ್ನಲಾಗಿದೆ. 

12 ಅಂಶಗಳನ್ನು ಬರೆಸಿದ ಅಮಿತ್‌ ಶಾ
ಸಭೆಯಲ್ಲಿ ವಿಸ್ತಾರಕರು ನೀಡಿದ ಸ್ಥಳೀಯ ವಾಸ್ತವಿಕ ಚಿತ್ರಣ ಆಧರಿಸಿ ಬೂತ್‌ ಸಶಕ್ತೀಕರಣ, ಸಂಘಟನೆ ಮತ್ತಿತರ ವಿಚಾರಗಳ ಕುರಿತು 12 ಅಂಶಗಳನ್ನು ಅಮಿತ್‌ ಶಾ ಸಭೆಯಲ್ಲಿ ಪ್ರಸ್ತಾಪಿಸಿದ್ದು, ಇದನ್ನು ಸಭೆಯಲ್ಲಿ ಕುಳಿತಿದ್ದ ಶಾಸಕರು, ಸಂಸದರಿಂದ ಬರೆಸಿದರು. ಅದರಲ್ಲೂ ದುರ್ಬಲ ಕ್ಷೇತ್ರಗಳಲ್ಲಿ ಪಕ್ಷ ಗೆಲ್ಲಲು ಅನು ಕೂಲವಾಗುವಂತಹ ಅಂಶಗಳಿಗೆ ಹೆಚ್ಚು ಒತ್ತು ನೀಡಿದರು. ಜತೆಗೆ ವಿಸ್ತಾರಕರು ನೀಡುವ ವರದಿ ಆಧರಿಸಿ ವಿಧಾನಸಭಾ ಕ್ಷೇತ್ರ ಮಟ್ಟದಲ್ಲಿ ಕಾರ್ಯ ಚಟುವಟಿಕೆ ರೂಪಿಸಬೇಕು ಎಂದಿರುವುದಾಗಿ ತಿಳಿದು ಬಂದಿದೆ.