ಕುಷ್ಟಗಿ: ಹಳ್ಳದ ಪ್ರವಾಹ ದಾಟಲು ಜೆಸಿಬಿ ಬಳಸಿದ ಗ್ರಾಮಸ್ಥರು; ವಿಡಿಯೋ ವೈರಲ್‌

ಕುಷ್ಟಗಿ: ಹಳ್ಳದ ಪ್ರವಾಹ ದಾಟಲು ಕೆಲ ಗ್ರಾಮಸ್ಥರು ಜೆಸಿಬಿ ಬಳಸಿ ಹುಚ್ಚು ಸಾಹಸ ಪ್ರದರ್ಶಿಸಿದ ಘಟನೆ ಬಂಡ್ರಗಲ್ ಹಳ್ಳದಲ್ಲಿ ನಡೆದಿದೆ.

ಕಾಟಾಪೂರ, ಕಬ್ಬರಗಿ, ಬೀಳಗಿ, ಬಂಡ್ರಗಲ್ ಪ್ರದೇಶದಲ್ಲಿ ಅ.12ರ ಬುಧವಾರ ಮಧ್ಯಾಹ್ನ ಗುಡುಗು ಸಿಡಿಲಬ್ಬರದ ಜೊತೆಗೆ ಭಾರಿ ಮಳೆಯಾಗಿದೆ. ಈ ಮಳೆಗೆ ಕಬ್ಬರಗಿಯ ಜಾತಿಗ್ಯಾನ, ಬಂಡ್ರಗಲ್ ಹಳ್ಳಗಳಲ್ಲಿ ನೀರು ಉಕ್ಕಿ ಹರಿದಿವೆ. ಬಂಡ್ರಗಲ್ ಹಳ್ಳ ಏರಿ ಬಂದ ಹಳ್ಳದ‌ ಪ್ರವಾಹದಲ್ಲಿ ಕೆಲವರು ಜೆಸಿಬಿ ಬಕೇಟ್‌ನಲ್ಲಿ ಹಳ್ಳದ ಪ್ರವಾಹ ಲೆಕ್ಕಿಸದೇ ಹಳ್ಳದಾಟಿದ್ದಾರೆ.

ಜೆಸಿಬಿಯಲ್ಲಿ‌ ಹಳ್ಳ ದಾಟುವುದನ್ನು ಹಳ್ಳದ ದಡದಲ್ಲಿದ್ದವರು ವಿಡಿಯೋ ಮಾಡಿದ್ದು, ಸದ್ಯ ಈ ವಿಡಿಯೋ ಈಗ ಸಾಮಾಜಿಕ ಜಾಲತಾಣಗಳಲ್ಲಿ ವೈರಲ್ ಆಗಿದೆ.

ಇತ್ತೀಚೆಗೆ ಯಲಬುರ್ಗಾ ತಾಲೂಕಿನ ಪ್ರತ್ಯೇಕ ಘಟನೆಗಳಲ್ಲಿ ಇಬ್ಬರು ಪೊಲೀಸರು ಹಾಗೂ ನಾಲ್ವರು ಮಹಿಳೆಯರು ಹಳ್ಳ ದಾಟುವ ಪ್ರಯತ್ನ‌ ಮಾಡಿ ಹಳ್ಳದ ಪ್ರವಾಹಕ್ಕೆ ಸಿಲುಕಿ ದುರಂತ ಸಾವಿಗೆ ಕಾರಣವಾಗಿತ್ತು. ಈ ದುರಂತ ಮಾಸುವ ಮುನ್ನವೇ ಕುಷ್ಟಗಿ ತಾಲೂಕಿನ ಬಂಡ್ರಗಲ್ ಹಳ್ಳದಲ್ಲಿ ಸ್ಥಳೀಯರು ಹುಚ್ಚು ಸಾಹಸಕ್ಕೆ ಕೈ ಹಾಕಿದ್ದು, ಯಾವುದೇ ದುರಂತ ನಡೆಯದೇ ಇರುವುದು ಸಮಧಾನಕರ ವಿಷಯ ಎನ್ನಬಹುದು.