ಚಿರಂಜೀವಿ ಸರ್ಜಾ ಅಭಿನಯದ “ಖಾಕಿ’ ಚಿತ್ರ ಈಗಾಗಲೇ ಟೀಸರ್ ಹಾಗು ಹಾಡುಗಳ ಮೂಲಕ ಭರ್ಜರಿ ಸದ್ದು ಮಾಡಿದೆ. ಈಗ ಚಿತ್ರ ಪ್ರೇಕ್ಷಕರ ಮುಂದೆ ಬರಲು ಸಜ್ಜಾಗಿದೆ. ಹೌದು, ಹೊಸ ವರ್ಷಕ್ಕೆ “ಖಾಕಿ’ ತನ್ನ ಖದರ್‌ ತೋರಿಸಲಿದೆ. ನಿರ್ಮಾಪಕ ತರುಣ್‌ ಶಿವಪ್ಪ ಅವರು “ಖಾಕಿ’ ಚಿತ್ರವನ್ನು ಜನವರಿ 24 ರಂದು ರಾಜ್ಯಾದ್ಯಂತ ಬಿಡುಗಡೆ ಮಾಡುವ ತಯಾರಿಯಲ್ಲಿದ್ದಾರೆ. ಅಂದಹಾಗೆ, “ಖಾಕಿ’ ಕನ್ನಡದ ಜೊತೆಯಲ್ಲಿ ಮಲಯಾಳಂ ಭಾಷೆಯಲ್ಲೂ ಬಿಡುಗಡೆಯಾಗುತ್ತಿದೆ.
ನಂತರದ ದಿನಗಳಲ್ಲಿ ತಮಿಳು ಭಾಷೆಯಲ್ಲಿ ಬಿಡುಗಡೆ ಮಾಡುವ ಕುರಿತು ಮಾತುಕತೆ ನಡೆಯುತ್ತಿದೆ. ಈ ಕುರಿತು ಮಾತನಾಡುವ ನಿರ್ಮಾಪಕ ತರುಣ್‌ ಶಿವಪ್ಪ, “ಜನವರಿ 24 ರಂದು ರಾಜ್ಯಾದ್ಯಂತ ಸುಮಾರು 250 ಕ್ಕೂ ಹೆಚ್ಚು ಚಿತ್ರಮಂದಿರಗಳಲ್ಲಿ “ಖಾಕಿ’ ಚಿತ್ರವನ್ನು ಬಿಡುಗಡೆ ಮಾಡುತ್ತಿದ್ದೇನೆ. ಕನ್ನಡದಲ್ಲಿ ಮೊದಲು ಬಿಡುಗಡೆ ಮಾಡಿ, ಒಂದು ವಾರದ ನಂತರ ಮಲಯಾಳಂ ಭಾಷೆಯಲ್ಲೂ ಚಿತ್ರ ಬಿಡುಗಡೆ ಮಾಡಲಾಗುವುದು.
ಈಗಾಗಲೇ ಚಿತ್ರದ ಟೀಸರ್‌ಗೆ ಸಿಕ್ಕಿರುವ ಉತ್ತಮ ಪ್ರತಿಕ್ರಿಯೆ ನೋಡಿ, ಚಿತ್ರಮಂದಿರಗಳಿಂದಲೂ ಬೇಡಿಕೆ ಬಂದಿದೆ. ಇದೇ ಮೊದಲ ಬಾರಿಗೆ ನವೀನ್‌ ರೆಡ್ಡಿ ಈ ಚಿತ್ರವನ್ನು ನಿರ್ದೇಶಿಸಿದ್ದಾರೆ. ಮೊದಲ ಚಿತ್ರವಾಗಿದ್ದರೂ ಅವರು, ಮೇಕಿಂಗ್‌ ಮೂಲಕ ಗಮನಸೆಳೆಯುತ್ತಾರೆ ಎಂಬ ವಿಶ್ವಾಸ ನಮಗಿದೆ. ಚಿತ್ರಕ್ಕೆ ಯು/ಎ ಪ್ರಮಾಣ ಪತ್ರ ಸಿಕ್ಕಿದೆ. ಚಿತ್ರದ ವಿಶೇಷವೆಂದರೆ, ಜನವರಿಯಲ್ಲಿ ಚಿರಂಜೀವಿ ಸರ್ಜಾ ಹಾಗು ತಾನ್ಯಾ ಹೋಪ್‌ ಅಭಿನಯದ ಈ ಚಿತ್ರ ಬಿಡುಗಡೆ ಆಗುವ ಮೂಲಕ ಇಬ್ಬರಿಗೂ ಹೊಸ ವರ್ಷದಲ್ಲಿ ತಮ್ಮ ಚಿತ್ರದ ಖಾತೆ ಆರಂಭವಾಗಲಿದೆ’ ಎನ್ನುತ್ತಾರೆ ತರುಣ್‌ ಶಿವಪ್ಪ.
ಚಿತ್ರದಲ್ಲಿ ಛಾಯಾಸಿಂಗ್‌ ಕೂಡ ನಟಿಸಿದ್ದಾರೆ. ನಾಯಕ ಚಿತ್ರದಲ್ಲಿ ಕೇಬಲ್‌ ಹುಡುಗನಾಗಿ ಕಾಣಿಸಿಕೊಂಡಿದ್ದಾರೆ. ಚಿತ್ರದಲ್ಲಿ ಮಾಸ್‌ ಅಂಶಗಳು ಹೈಲೈಟ್‌. ಚಿತ್ರದ ಶೀರ್ಷಿಕೆಗೆ “ಪವರ್‌ ಆಫ್ ಕಾಮನ್‌ ಮ್ಯಾನ್‌’ ಎಂಬ ಅಡಿಬರಹವಿದೆ. “ಖಾಕಿ’ ಅಂದಾಕ್ಷಣ, ಎಲ್ಲರಿಗೂ ಪೊಲೀಸ್‌ ನೆನಪಾಗುತ್ತಾರೆ. ಅದು ನಿಜ. ಆದರೆ, “ಖಾಕಿ’ ಹಾಕಿದ ಪೊಲೀಸರಷ್ಟೇ, ಅಲ್ಲ, ಒಬ್ಬ ಕಾಮನ್‌ ಮ್ಯಾನ್‌ ಕೂಡ ಪೊಲೀಸ್‌ ಕೆಲಸಕ್ಕೆ ಸಾಥ್‌ ಕೊಡಬಹುದು. ಅವರೊಂದಿಗೆ ಸಮಾಜದ ಸುಧಾರಣೆಗೆ ಮುಂದಾಗಬಹುದು ಎಂಬ ಒನ್‌ಲೈನ್‌ ಚಿತ್ರಕ್ಕಿದೆ. ಬಾಲು ಛಾಯಾಗ್ರಹಣ, ಋತ್ವಿಕ್‌ ಸಂಗೀತವಿದೆ.
