Sandalwood: ಅರ್ಜುನ್‌ ಜನ್ಯಾ ʼ45ʼ ಚಿತ್ರಕ್ಕೆ ಹಾಲಿವುಡ್‌ ತಂತ್ರಜ್ಞರ ಸಾಥ್

ನಟ ಶಿವರಾಜಕುಮಾರ್‌, ಉಪೇಂದ್ರ ಹಾಗೂ ರಾಜ್‌ ಬಿ. ಶೆಟ್ಟಿ ಒಟ್ಟಾಗಿ ನಟಿಸುತ್ತಿರುವ, “45′ ಚಿತ್ರ ಆರಂಭದಿಂದಲೂ ಹೊಸ ನಿರೀಕ್ಷೆ ಹುಟ್ಟು ಹಾಕುತ್ತಿದೆ. ಇತ್ತೀಚೆಗೆ ಚಿತ್ರದ ಚಿತ್ರೀಕರಣ ಮುಕ್ತಾಯವಾಗಿದ್ದು, ಪೋಸ್ಟ್‌ ಪ್ರೊಡಕ್ಷನ್‌ ಕೆಲಸದಲ್ಲಿ ಚಿತ್ರತಂಡ ನಿರತವಾಗಿದೆ.

ವಿಶೇಷವೆಂದರೆ, ಹಾಲಿವುಡ್‌ನ‌ 150ಕ್ಕೂ ಅಧಿಕ ಚಿತ್ರಗಳಿಗೆ ಗ್ರಾಫಿಕ್ಸ್‌ ಕೆಲಸ ಮಾಡಿ ಆಸ್ಕರ್‌ ಪ್ರಶಸ್ತಿಗೆ ನಾಮಿನೇಟ್‌ ಆಗಿದ್ದ ಟೊರೊಂಟೊದ ಮಾರ್ಜ್‌ ವಿಎಫ್ಎಕ್ಸ್‌ ಕಂಪನಿ, “45′ ಚಿತ್ರಕ್ಕೆ ವಿಎಫ್ಎಕ್ಸ್‌ ಕೆಲಸ ಮಾಡುತ್ತಿದೆ. ಮಾರ್ಜ್‌ ಕಂಪನಿ ಭಾರತದ ಅದರಲ್ಲೂ ಕನ್ನಡ ಚಿತ್ರಕ್ಕೆ ವಿಎಫ್ಎಕ್ಸ್‌ ಮಾಡಿಕೊಡುತ್ತಿರುವುದು ಇದೇ ಮೊದಲು. ಮಾರ್ಜ್‌ ಕಂಪನಿಯ ತಂತ್ರಜ್ಞರಾದ ರಾಫೆಲ್‌ ಹಾಗೂ ಜಸ್ಟಿನ್‌ ಅವರ ನೇತೃತ್ವದಲ್ಲಿ ಗ್ರಾಫಿಕ್ಸ್‌ ಕೆಲಸಗಳು ವೇಗ ಗತಿಯಲ್ಲಿ ಸಾಗುತ್ತಿವೆ.

ಅಂದಹಾಗೆ ಈ ಚಿತ್ರವನ್ನು ಸಂಗೀತ ನಿರ್ದೇಶಕ ಅರ್ಜುನ ಜನ್ಯ ನಿರ್ದೇಶಿಸುತ್ತಿದ್ದಾರೆ. ನಿರ್ದೇಶಕನಾಗಿ ಇದು ಅವರಿಗೆ ಚೊಚ್ಚಲ ಚಿತ್ರ. ಸೂರಜ್‌ ಪ್ರೊಡಕ್ಷನ್ಸ್‌ ಲಾಂಛನದಡಿ ಎಂ. ರಮೇಶ್‌ ರೆಡ್ಡಿ ಚಿತ್ರವನ್ನು ನಿರ್ಮಿಸುತ್ತಿದ್ದಾರೆ.