ಕೋವಿಡ್ ಮಹಾಮಾರಿಗೆ ಮದ್ದರೆಯಲು ಪ್ಲಾಸ್ಮಾ ಥೆರಪಿ ಸಂಶೋಧನೆಗೆ ಒಪ್ಪಿಗೆ

ನವದೆಹಲಿ: ಕೋವಿಡ್ 19 ವೈರಸ್ ಸೋಂಕಿತರಿಗಾಗಿ ಬಳಸಲಾಗುವ ‘ಕನ್ವಲೆಸೆಂಟ್‌ ಪ್ಲಾಸ್ಮಾ ಥೆರಪಿ’ ಎಂಬ ಚಿಕಿತ್ಸಾ ಕ್ರಮದ ಬಗ್ಗೆ ಮತ್ತಷ್ಟು ಅಧ್ಯಯನ ಮತ್ತು ಸಂಶೋಧನೆ ನಡೆಸಲು ಕೇರಳ ಸರಕಾರದಿಂದ ರಚನೆಯಾಗಿದ್ದ ವೈದ್ಯರು ಹಾಗೂ ಸಂಶೋಧಕರ ತಂಡ ಮುಂದಾಗಿದೆ. ಇದಕ್ಕೆ, ಭಾರತೀಯ ವೈದ್ಯಕೀಯ ಸಂಶೋಧನಾ ಕೌನ್ಸಿಲ್‌ (ಐಸಿಎಂಆರ್‌) ಒಪ್ಪಿಗೆ ನೀಡಿದೆ.

ಏನಿದು ಚಿಕಿತ್ಸೆ?
ಕೋವಿಡ್ 19 ವೈರಸ್ ಸೋಂಕಿನಿಂದ ಪಾರಾಗಿರುವ ವ್ಯಕ್ತಿಗಳಲ್ಲಿನ ರಕ್ತವನ್ನು ಪಡೆದು ಅದರಲ್ಲಿನ ಪ್ಲಾಸ್ಮಾವನ್ನು ಬೇರ್ಪಡಿಸಿ, ಅದನ್ನು ನಾನಾ ಕ್ಲಿನಿಕಲ್‌ ಕ್ರಮಗಳ ಮೂಲಕ ಔಷಧಿಯನ್ನಾಗಿ ಬಳಸುವ ಒಂದು ಪದ್ಧತಿ ರೂಢಿಯಲ್ಲಿದೆ. ಈ ಪದ್ಧತಿಯನ್ನು 1918ರಲ್ಲಿ ಮೊದಲ ಬಾರಿಗೆ ಫ್ಲ್ಯೂ ಚಿಕಿತ್ಸೆಯಲ್ಲಿ ಬಳಸಲಾಗಿತ್ತು.

ಹೇಗೆ ಕೆಲಸ ಮಾಡುತ್ತೆ?
ಸೋಂಕಿನಿಂದ ಪಾರಾಗಿರುವ ವ್ಯಕ್ತಿಗಳಲ್ಲಿ ಅಗತ್ಯ ಪ್ರಮಾಣದ ಪ್ರತಿಜೀವಕಗಳು ಸೃಷ್ಟಿಯಾಗಿರುತ್ತವೆ. ಹಾಗಾಗಿ, ಅವರ ರಕ್ತದಲ್ಲಿನ ಪ್ಲಾಸ್ಮಾವನ್ನು ತೆಗೆದು, ಸೋಂಕಿತರಿಗೆ ನೀಡಿದಾಗ ಅವರಲ್ಲಿ ರೋಗ ನಿರೋಧಕ ಶಕ್ತಿ ಹೆಚ್ಚಾಗಿ ಸೋಂಕಿನಿಂದ ಪಾರಾಗಲು ಸಾಧ್ಯವಾಗುತ್ತದೆ.

ಚಿಕಿತ್ಸೆ ಬಗ್ಗೆ ಆತಂಕವೇನು?
ವೈರಾಣು, ಬ್ಯಾಕ್ಟೀರಿಯಾ ತೀವ್ರ ಬಾಧಿತರಿಗೆ ಪರಿಣಾಮಕಾರಿ ಚಿಕಿತ್ಸೆ ಇದಾಗಿದ್ದರೂ, ರೋಗಿಗಳ ಮೇಲೆ ಅಡ್ಡಪರಿಣಾಮ ಬೀರುವ ಬಗ್ಗೆ ಅಮೆರಿಕದ ಆಹಾರ ಮತ್ತು ಔಷಧ ಆಡಳಿತ (ಎಫ್ಡಿಎ) ಈ ಹಿಂದೆಯೇ ಎಚ್ಚರಿಸಿದೆ. ಹಾಗಾಗಿಯೇ, ಈ ಚಿಕಿತ್ಸೆ ಬಗ್ಗೆ ಹೆಚ್ಚಿನ ಸಂಶೋಧನೆ ನಡೆಸಲು ಕೇರಳ ವೈದ್ಯರು, ತಜ್ಞರು ಮುಂದಾಗಿದ್ದಾರೆ.