“ಪ್ರಾಕೃತಿಕ ವಿಕೋಪ ಸಂದರ್ಭ ಜಾತಿ, ಮತ ಭೇದ ಮರೆತು ಸಹಕರಿಸಿ’​​​​​​​

ಕಾಪು:  ಪ್ರಾಕೃತಿಕ ವಿಕೋಪ ತಡೆಯುವುದು ಯಾರಿಂದಲೂ ಸಾಧ್ಯವಿಲ್ಲ. ಆದರೆ ಇಂತಹ ಸಂದರ್ಭ ಗಳಲ್ಲಿ ನಾವು ಎಚ್ಚರಿಕೆ  ವಹಿಸಿ ಜಾತಿ, ಮತ ಭೇದ ಮರೆತು ಮತ್ತೂಬ್ಬರ ಪ್ರಾಣ, ಸೊತ್ತು ರಕ್ಷಣೆಗೆ ಮುಂದಾಗುವುದು ನಮ್ಮ ಕರ್ತವ್ಯ. 

ತಾಲೂಕಿನಾದ್ಯಂತ ಕಳೆದ ಮೂರು ತಿಂಗಳ ಅವಧಿಯಲ್ಲಿ ಭಾರೀ ಹಾನಿಯುಂಟಾಗಿದ್ದು, ಈ ಬಗ್ಗೆ ಸವಿಸ್ತಾರ ವರದಿ ಪಡೆದುಕೊಂಡು, ಎಲ್ಲ  ಸಂತ್ರಸ್ತ ಫಲಾನುಭವಿಗಳಿಗೂ ಸಹಾಯಧನ ದೊರಕಿಸಿಕೊಡಲು ಪ್ರಯತ್ನಿಸುವುದಾಗಿ ಶಾಸಕ ಲಾಲಾಜಿ ಆರ್‌ ಮೆಂಡನ್‌ ಭರವಸೆ ನೀಡಿದರು.

ಕಳೆದ ಮೂರು ತಿಂಗಳ ಅವಧಿಯಲ್ಲಿ ಕಾಪು ತಾಲೂಕಿನ ವಿವಿಧೆಡೆ ಗಾಳಿ, ಮಳೆ, ಸಿಡಿಲಿನ ಆಘಾತದಿಂದಾಗಿ ಉಂಟಾಗಿದ್ದ ಹಾನಿ ಪೀಡಿತ ಸಂತ್ರಸ್ತರಿಗೆ ಕಂದಾಯ ಇಲಾಖೆ ಮೂಲಕ ಒದಗಿಸಲಾದ ಸಹಾಯಧನದ ಚೆಕ್‌ನ್ನು  ಅವರು  ವಿತರಿಸಿ ಮಾತನಾಡಿದರು.
ಕಾಪು ತಾಲೂಕಿನಲ್ಲಿ ವಿವಿಧೆಡೆ ಹಾನಿ ಸಂಭವಿಸಿದ, ನೆರೆ ಪೀಡಿತ ಪ್ರದೆಶಗಳಲ್ಲಿ ಪರಿಹಾರ ಕಾರ್ಯಾಚರಣೆಯಲ್ಲಿ ಹಲವು 
ಮಂದಿ ಅಧಿಕಾರಿಗಳು ಸ್ವಯಂಪ್ರೇರಿತ ರಾಗಿ ಉತ್ತಮ ರೀತಿಯಲ್ಲಿ ಶ್ರಮ ವಹಿಸಿದ್ದಾರೆ. ಶಮದಾನದ ಮೂಲಕ ತಮ್ಮನ್ನು ತಾವು ತೊಡಗಿಸಿಕೊಂಡ ನಾಗರಿಕರು, ಸಂಘ – ಸಂಸ್ಥೆಗಳ ಪ್ರತಿನಿಧಿಗಳು, ರಾಜಕೀಯ ಕಾರ್ಯಕರ್ತರು  ಅಭಿನಂದನಾರ್ಹರು ಎಂದರು.

10.36 ಲ.ರೂ. ಪರಿಹಾರ ಧನ ವಿತರಣೆ 
ಕಳೆದ ಎಪ್ರಿಲ್‌ ತಿಂಗಳಿನಿಂದ ಜುಲೈ ತಿಂಗಳವರೆಗೆ ಕಾಪು ತಾಲೂಕಿನ ವಿವಿಧೆಡೆ ಮಳೆ ಮತ್ತಿತರ ಪ್ರಾಕೃತಿಕ ವಿಕೋಪದ ಕಾರಣದಿಂದಾಗಿ 38.49 ಲ. ರೂ. ನಷ್ಟ ಅಂದಾಜಿಸಲಾಗಿದೆ. ಈ ಬಗ್ಗೆ ಸಂಬಂಧಪಟ್ಟ ಇಲಾಖೆಗಳಿಗೆ ವರದಿ ನೀಡಲಾಗಿದ್ದು, ಅಲ್ಲಿಂದ ತಾಂತ್ರಿಕ ಅಭಿಪ್ರಾಯ ದೊರಕಿದ ಬಳಿಕ ಪ್ರಾಕೃತಿಕ ವಿಕೋಪ ನಿಧಿಯಡಿ ಸರಕಾರೀ ಮಾರ್ಗದರ್ಶನವನ್ನು ಪಾಲನೆ ಮಾಡಿ, ಪರಿಹಾರ ಧನ ವಿತರಿಸಲಾಗುತ್ತಿದ್ದು, ಈವರೆಗೆ 10.36 ಲ.ರೂ. ಪರಿಹಾರ ವಿತರಿಸಲಾಗಿದೆ ಎಂದು ಕಾಪು ಕಂದಾಯ ನಿರೀಕ್ಷಕ ರವಿಶಂಕರ್‌ ಕೆ. ತಿಳಿಸಿದ್ದಾರೆ.

ಪ್ರಾಕೃತಿಕ ವಿಕೋಪ ನಿಧಿಯಡಿ ಕಾಪು ತಾಲೂಕಿನ 36 ಮಂದಿ ಫಲಾನುಭವಿಗಳಿಗೆ 3.52 ಲಕ್ಷ ರೂ. ಪರಿಹಾರ ಧನ ಪ್ರಾಥಮಿಕ ಹಂತದ ಚೆಕ್‌ಗಳನ್ನು ಹಸ್ತಾಂತರಿಸಲಾಯಿತು.ಉಡುಪಿ ಜಿ.ಪಂ. ಸ್ಥಾಯೀ ಸಮಿತಿ ಅಧ್ಯಕ್ಷ ಶಶಿಕಾಂತ್‌ ಪಡುಬಿದ್ರಿ, ಜಿ.ಪಂ. ಸದಸ್ಯೆ ಶಿಲ್ಪಾ ಜಿ. ಸುವರ್ಣ, ಕಾಪು ಕಂದಾಯ ನಿರೀಕ್ಷಕ ರವಿಶಂಕರ್‌ ಕೆ., ಗ್ರಾಮ ಲೆಕ್ಕಿಗರಾದ ಕಾರ್ತಿಕೇಯ ಭಟ್‌, ವಿಜಯ್‌, ಶ್ಯಾಮ ಸುಂದರ್‌, ಡೇನಿಯಲ್‌, ಲೋಕನಾಥ್‌, ಪ್ರದೀಪ್‌, ಮಥಾಯಿ, ಬಿಜೆಪಿ ಕ್ಷೇತ್ರಾಧ್ಯಕ್ಷ ಪ್ರಕಾಶ್‌ ಶೆಟ್ಟಿ ಪಾದೆಬೆಟ್ಟು, ಶ್ಯಾಮಲಾ ಕುಂದರ್‌, ಸಂದೀಪ್‌ ಶೆಟ್ಟಿ  ಉಪಸ್ಥಿತರಿದ್ದರು.