Filmfare Awards South;ಅತ್ಯುತ್ತಮ ನಟ ಸೇರಿ ಹಲವು ಪ್ರಶಸ್ತಿ ಬಾಚಿಕೊಂಡ ರಿಷಬ್ ‘ಕಾಂತಾರ’

ಬೆಂಗಳೂರು: 2022 ರಲ್ಲಿ ಬಿಡುಗಡೆಯಾದ ರಿಷಬ್ ಶೆಟ್ಟಿ ನಿರ್ದೇಶಿಸಿ ನಟಿಸಿದ್ದ ‘ಕಾಂತಾರ’ ಚಿತ್ರ ಬ್ಲಾಕ್‌ಬಸ್ಟರ್ ಯಶಸ್ಸಿಗೆ ಇನ್ನೊಂದು ಗರಿ ಎಂಬಂತೆ ಫಿಲ್ಮ್‌ಫೇರ್ ಸೌತ್ ಅವಾರ್ಡ್ಸ್ 2023 ರಲ್ಲಿ( Filmfare Awards South) ಹಲವಾರು ಪುರಸ್ಕಾರಗಳನ್ನು ಬಾಚಿಕೊಂಡಿದೆ.

ನಟ, ನಿರ್ದೇಶಕ ಮತ್ತು ಕಥೆ ಬರೆದ ರಿಷಬ್ ಶೆಟ್ಟಿ ಅವರ ಚಲನಚಿತ್ರ ಪ್ರತಿಷ್ಠಿತ ಫಿಲ್ಮ್‌ಫೇರ್‌ನಲ್ಲಿ ಆರು ಪ್ರಮುಖ ಪ್ರಶಸ್ತಿಗಳನ್ನು ಗಳಿಸುವಲ್ಲಿ ಯಶಸ್ವಿಯಾಗಿದೆ.

ಕನ್ನಡದ ಅತ್ಯುತ್ತಮ ಚಲನಚಿತ್ರ, ಕನ್ನಡದ ಅತ್ಯುತ್ತಮ ನಟ ಪ್ರಶಸ್ತಿ ರಿಷಬ್ ಅವರಿಗೆ, ಅತ್ಯುತ್ತಮ ಸಂಗೀತ ಆಲ್ಬಂ ಬಿ. ಅಜನೀಶ್ ಲೋಕನಾಥ್ ಅವರಿಗೆ , ಅತ್ಯುತ್ತಮ ಪೋಷಕ ನಟ ಅಚ್ಯುತ್ ಕುಮಾರ್ ,ಕನ್ನಡ ಅತ್ಯುತ್ತಮ ನಟಿ ಪ್ರಶಸ್ತಿಯನ್ನು ಸಪ್ತಮಿ ಗೌಡ ಗೆದ್ದಿದ್ದಾರೆ.

‘ವರಾಹ ರೂಪಂ’ ಹಾಡಿಗೆ ಸಾಯಿ ವಿಘ್ನೇಶ್ ಅವರು ಕನ್ನಡ ಅತ್ಯುತ್ತಮ ಹಿನ್ನೆಲೆ ಗಾಯಕ ಪ್ರಶಸ್ತಿ ಗೆದ್ದಿದ್ದಾರೆ. ವಿಜೇತರನ್ನು ಅಭಿನಂದಿಸಿರುವ ಫಿಲ್ಮ್‌ಫೇರ್ ಸಾಮಾಜಿಕ ಜಾಲತಾಣದಲ್ಲಿ ಪೋಸ್ಟ್ ಹಂಚಿಕೊಂಡಿದೆ.