ಚೆನ್ನೈ: ಕಾಲಿವುಡ್‌ ನಟ ಕಮಲ್ ಹಾಸನ್ (Kamal Haasan) ಭಾರತೀಯ ಸಿನಿಮಾರಂಗದ ದಿಗ್ಗಜ ನಟರಲ್ಲಿ ಒಬ್ಬರು. ತಮ್ಮ ಸಿನಿಮಾಗಳಿಂದ ಅಪಾರ ಅಭಿಮಾನಿಗಳ ಪ್ರೀತಿ – ಪ್ರೋತ್ಸಾಹವನ್ನು ʼಇಂಡಿಯನ್‌ʼ ನಟ ಪಡೆದುಕೊಂಡಿದ್ದಾರೆ.
ಕಮಲ್ ಹಾಸನ್ ಅವರ ಅಭಿನಯದ ಬಗ್ಗೆ ಎರಡು ಮಾತಿಲ್ಲ. ಅಭಿಮಾನಿಗಳು ನಟನ ಮೇಲಿನ ಪ್ರೀತಿಯಿಂದ ಕಮಲ್ ಹಾಸನ್ ಅವರಿಗೆ ಅನೇಕ ಬಿರುದುಗಳನ್ನು ನೀಡಿದ್ದಾರೆ. ಇದನ್ನು ಪ್ರೀತಿಯಿಂದಲೇ ಕಮಲ್ ಹಾಸನ್ ಸೀಕ್ವರಿಸಿದ್ದಾರೆ. \
ಇದನ್ನೂ ಓದಿ: Kantara1: ಪೇಮೆಂಟ್‌ ನೀಡದ ಆರೋಪ; ಹೊಂಬಾಳೆ ವಿರುದ್ಧ ಬೀದಿಗಿಳಿದ ಜೂನಿಯರ್‌ ಅರ್ಟಿಸ್ಟ್‌ಗಳು
ಅಭಿಮಾನಿಗಳಿಗೆ ಕಮಲ್ ಹಾಸನ್ ತಮಗೆ ನೀಡಿರುವ ಬಿರುದುಗಳ ಬಗ್ಗೆ ವಿಶೇಷ ಮನವಿ ಮಾಡಿದ್ದಾರೆ.
“ನನಗೆ ʼಉಳಗನಾಯಗನ್ʼ ಸೇರಿದಂತೆ ಅನೇಕ ಬಿರುದುಗಳನ್ನು ನೀಡಿದ್ದೀರಿ. ಇದಕ್ಕಾಗಿ ನಾನು ಕೃತಜ್ಞನಾಗಿದ್ದೇನೆ. ಅಭಿಮಾನಿಗಳಿಂದ ನೀಡಲ್ಪಟ್ಟ ಈ ಗೌರವ ಹಾಗೂ ಮೆಚ್ಚುಗೆ ವಿನ್ರಮವಾಗಿದೆ. ಇದರಿಂದ ನಾನು ಪ್ರೇರಿತನಾಗಿದ್ದೇನೆ. ನಾನು ಸಿನಿಮಾವೆಂಬ ಕ್ರಾಫ್ಟ್‌ ನ ವಿದ್ಯಾರ್ಥಿ ಆಗಿದ್ದೇನೆ. ಇದರಲ್ಲಿ ಸದಾ ಕಲಿಯಲು ಮತ್ತು ಬೆಳೆಯಬೇಕೆಂದು ನಾನು ಭಾವಿಸುತ್ತೇನೆ. ಯಾವುದೇ ರೀತಿಯ ಸೃಜನಶೀಲ ಅಭಿವ್ಯಕ್ತಿಯಂತೆ ಸಿನಿಮಾ ಎಲ್ಲರಿಗೂ ಸೇರಿದ್ದು. ಇದು ಅಸಂಖ್ಯಾತ ಕಲಾವಿದರು, ತಂತ್ರಜ್ಞರು ಮತ್ತು ಪ್ರೇಕ್ಷಕರ ಸಹಯೋಗದಿಂದ ಇರುವಂಥದ್ದು” ಎಂದು ಕಮಲ್ ಹೇಳಿದ್ದಾರೆ.
“ಕಲೆಗಿಂತ ಕಲಾವಿದ ಮೇಲೇರಬಾರದು ಎಂಬುದು ನನ್ನ ನಂಬಿಕೆ. ನನ್ನ ಅಪೂರ್ಣತೆಗಳು ಮತ್ತು ಸುಧಾರಿಸಬೇಕಾದ ನನ್ನ ಕರ್ತವ್ಯಕ್ಕೆ ನಾನು ಆಧಾರವಾಗಿರಲು ಬಯಸುತ್ತೇನೆ. ಆದ್ದರಿಂದ ನನ್ನ ಎಲ್ಲಾ ಅಭಿಮಾನಿಗಳು, ಮಾಧ್ಯಮಗಳು, ಚಲನಚಿತ್ರ ಬಂಧುಗಳು, ಪಕ್ಷದ ಕಾರ್ಯಕರ್ತರು ಇನ್ಮುಂದೆ ನನ್ನನ್ನು ಕಮಲ್ ಹಾಸನ್ ಅಥವಾ ಕಮಲ್ ಅಥವಾ ಕೆಹೆಚ್ ಎಂದು ಸಂಬೋಧಿಸಬೇಕೆಂದು ನಾನು ವಿನಮ್ರವಾಗಿ ವಿನಂತಿಸುತ್ತೇನೆ” ಎಂದು ಅವರು ಬರೆದುಕೊಂಡಿದ್ದಾರೆ.
ಈ ಹಿಂದೆ ನಟ ಅಜಿತ್‌ ಕುಮಾರ್ ಕೂಡ ತಮ್ಮನ್ನು ʼಥಲಾʼವೆಂದು ಕರೆಯಬೇಡಿ ಎಂದಿದ್ದರು. ಇದೀಗ ಕಾಲಿವುಡ್‌ನ ಮತ್ತೊಬ್ಬ ನಟ ತಮ್ಮ ಬಿರುದನ್ನು ತಿರಸ್ಕರಿಸಿದ್ದಾರೆ.
ಸದ್ಯ ಕಮಲ್ ಹಾಸನ್ ಮಣಿರತ್ನಂ ಅವರ ʼಥಗ್‌ ಲೈಫ್‌ʼ ಸಿನಿಮಾದಲ್ಲಿ ಬ್ಯುಸಿಯಾಗಿದ್ದಾರೆ.
