ಕಲಬುರಗಿ: ತಾಯಿ, ಮೂವರು ಮಕ್ಕಳ ಶವ ಬಾವಿಯಲ್ಲಿ ಪತ್ತೆ

ಮಾದನಹಿಪ್ಪರಗಿ: ಮಹಿಳೆ ಹಾಗೂ ಆಕೆಯ ಮೂವರು ಮಕ್ಕಳ ಶವಗಳು ಇಲ್ಲಿನ ಬಾವಿಯೊಂದರಲ್ಲಿ ಪತ್ತೆಯಾಗಿವೆ.

ಅಂಬಿಕಾ ರೇವಪ್ಪ ದುಧಗಿ (38), ಆಕೆಯ ಹಿರಿಯ ಅವಳಿ ಮಕ್ಕಳಾದ ಪುತ್ರ ದಯಾನಂದ (8), ಪುತ್ರಿ ಶಿವಲೀಲಾ (8) ಮತ್ತು ಕಿರಿಯ ಪುತ್ರಿ ಸೃಷ್ಟಿ (6) ಮೃತಪಟ್ಟವರು.

ಈ ನಾಲ್ವರೂ ನಾಪತ್ತೆಯಾಗಿರುವ ಕಾರಣ ಹುಡುಕಾಡಿದಾಗ ಮೊದಲು ಅಂಬಿಕಾರ ಶವ ಬುಧವಾರ ಸಂಜೆ ಬಾವಿಯಲ್ಲಿ ಪತ್ತೆಯಾಗಿತ್ತು. ಮಕ್ಕಳಿಗಾಗಿ ಶೋಧ ಮುಂದುವರಿಸಿದ್ದ ತಂಡಕ್ಕೆ ಗುರುವಾರ ಅವರ ಶವಗಳೂ ಅದೇ ಬಾವಿಯಲ್ಲಿ ಪತ್ತೆಯಾಗಿವೆ.

ಅಂಬಿಕಾ ತನ್ನ ಮೂವರು ಮಕ್ಕಳೊಂದಿಗೆ ಕಲಬುರಗಿ ಜಿಲ್ಲೆಯ ಚಿತ್ತಾಪುರ ರಾವೂರು ಗ್ರಾಮದ ತವರು ಮನೆಯಲ್ಲೇ ಈ ರೀತಿ ಸಾವಿಗೀಡಾಗಿದ್ದಾರೆ. ಕಳೆದ ಮಂಗಳವಾರ ಬೆಳಗ್ಗಿನ ಜಾವ ಅಂಬಿಕಾಳ ಸಂಬಂಧಿ ರಾವೂರಿನ ಬಸವರಾಜ ಯರಗಲ್‌ ಎಂಬಾತ ತಾಯಿ ಮಕ್ಕಳನ್ನು ಗ್ರಾಮದಲ್ಲಿ ಬಿಟ್ಟು ಹೋಗಿದ್ದ. ಈಕೆಯ ಪತಿ ರೇವಪ್ಪ ಶಾಂತಮಲ್ಲ ದುಧಗಿ ಕಲಬುರಗಿ, ಸೊಲ್ಲಾಪುರ, ಅಕ್ಕಲಕೋಟ ನಗರಗಳ ಹೊಟೇಲ್‌ಗ‌ಳಲ್ಲಿ ಕೆಲಸ ಮಾಡುತ್ತಿದ್ದ. ಆಗಾಗ ರಾವೂರ ಗ್ರಾಮಕ್ಕೆ ಬರುತ್ತಿದ್ದ ಎನ್ನಲಾಗಿದೆ. ಸಾವಿನ ರಹಸ್ಯ ಇನ್ನೂ ಬಯಲಾಗಿಲ್ಲ. ಮಾದನಹಿಪ್ಪರಗಿ ಠಾಣೆಯಲ್ಲಿ ಪ್ರಕರಣ ದಾಖಲಾಗಿದೆ.