Jobs; ಕಳೆದ 3-4 ವರ್ಷದಲ್ಲಿ 8 ಕೋಟಿ ಉದ್ಯೋಗ ಸೃಷ್ಟಿ: ಪ್ರಧಾನಿ ಮೋದಿ

ಮುಂಬೈ: ಭಾರತೀಯ ರಿಸರ್ವ್‌ ಬ್ಯಾಂಕ್‌ (RBI) ದೇಶದಲ್ಲಾದ ಉದ್ಯೋಗ ಸೃಷ್ಟಿ ಬಗ್ಗೆ ಇತ್ತೀಚೆಗೆ ವರದಿ ಬಿಡುಗಡೆಗೊಳಿಸಿದೆ. ಆ ಪ್ರಕಾರ, ಕಳೆದ 3-4 ವರ್ಷದಲ್ಲಿ ಬರೋಬ್ಬರಿ 8 ಕೋಟಿ ಉದ್ಯೋಗ ಸೃಷ್ಟಿಯಾಗಿದೆ. ನಿರುದ್ಯೋಗದ ಹೆಸರಿನಲ್ಲಿ ಬರೀ ವದಂತಿಗಳನ್ನೇ ಹಬ್ಬಿಸುತ್ತಿದ್ದವರ ಬಾಯಿಗೆ ಈಗ ಬೀಗ ಬಿದ್ದಿದೆ ಎಂದು ಪ್ರಧಾನಿ ಮೋದಿ ಶನಿವಾರ ಹೇಳಿದ್ದಾರೆ. ಲೋಕಸಭೆಯಲ್ಲಿ ನಿರುದ್ಯೋಗ ವಿಚಾರ ಪ್ರಸ್ತಾವಿಸಿದ್ದ ವಿಪಕ್ಷಗಳಿಗೆ ಮೋದಿ ಈ ರೀತಿ ಚಾಟಿ ಬೀಸಿದ್ದಾರೆ.

ಮುಂಬಯಿಯಲ್ಲಿ ರಸ್ತೆ, ರೈಲ್ವೇ, ನಗರಾಭಿವೃದ್ಧಿ, ಬಂದರು ಕ್ಷೇತ್ರಗಳಿಗೆ ಸಂಬಂಧಿಸಿದ 29,000 ಕೋಟಿ ರೂ. ವೆಚ್ಚದ ಯೋಜನೆಗಳಿಗೆ ಶಿಲಾನ್ಯಾಸ ನೆರವೇರಿಸಿ ಅವರು ಮಾತನಾಡಿ, “ದೇಶಕ್ಕೆ ಕೌಶಲ ಅಭಿವೃದ್ಧಿ, ಉದ್ಯೋಗ ಸೃಷ್ಟಿಯ ಅಗತ್ಯವಿದೆ. ಇದೇ ಹಾದಿಯಲ್ಲಿ ಸರಕಾರ ಶ್ರಮಿಸುತ್ತಿದೆ. ಆದರೂ ಈ ಬಗ್ಗೆ ಕೆಲವರು ವದಂತಿ ಹಬ್ಬಿಸು ತ್ತಿದ್ದಾರೆ. ಅವರ ಉದ್ದೇಶ ಅಭಿವೃದ್ಧಿಯನ್ನು ವಿರೋಧಿಸುವುದೇ ಆಗಿದೆ. ಅವರ ನೀತಿಗಳೆಲ್ಲವೂ ಯುವಜನತೆಗೆ ದ್ರೋಹ ಬಗೆದು, ಉದ್ಯೋಗ ಸೃಷ್ಟಿಯನ್ನು ನಿಲ್ಲಿಸುವಂಥವಾಗಿವೆ. ಈಗ ಜನರು ಅವರ ಸುಳ್ಳುಗಳನ್ನು ನಿರಾಕರಿಸಿದ ಬಳಿಕ ಅವರ ಬಂಡವಾಳ ಬಯಲಾಗುತ್ತಿದೆ ಎಂದು ಹೇಳಿದ್ದಾರೆ.