ಜಮ್ಮು : ಜೆಇಎಂನ 2 ಉಗ್ರ ಘಟಕ ಪತ್ತೆ; ಹತ್ತು ಮಂದಿ ಸೆರೆ

ಜಮ್ಮು : ಜಮ್ಮು ಕಾಶ್ಮೀರ ಪೊಲೀಸರು ಇಂದು ಸೋಮವಾರ ನಿಷೇಧಿತ ಜೈಶ್‌ ಎ ಮೊಹಮ್ಮದ್‌ (ಜೆಇಎಂ) ಉಗ್ರ ಸಂಘಟನೆಯೊಂದಿಗೆ ನಂಟು ಹೊಂದಿರುವ ಉಗ್ರರ ಎರಡು ಘಟಕಗಳನ್ನು ಭೇದಿಸಿದ್ದಾರೆ. 

ಆವಂತಿಪುರದ ತ್ರಾಲ್‌ ಮತ್ತು ಪಾಂಪೋರ್‌ ನ ಕ್ರೀವ್‌ ಪ್ರದೇಶದಲ್ಲಿ  ಕಾರ್ಯಾಚರಿಸುತ್ತಿದ್ದ ಈ ಎರಡು ಉಗ್ರ ಘಟಕಗಳೊಂದಿಗೆ ನಿಕಟ ಸಂಪರ್ಕ ಹೊಂದಿದ್ದ ಹತ್ತು ಮಂದಿಯನ್ನು ಪೊಲೀಸ್‌ ಅಧಿಕಾರಿಗಳು ಸೆರೆ ಹಿಡಿದಿರುವುದಾಗಿ ತಿಳಿದು ಬಂದಿದೆ.

ತ್ರಾಲ್‌ ಪ್ರದೇಶದಲ್ಲಿ ಜಮ್ಮು ಕಾಶ್ಮೀರ ಪೊಲೀಸರು ಬಂಧಿಸಿರುವ ನಾಲ್ವರನ್ನು ಯೂನಿಸ್‌ ನಬೀ ನಾಯ್ಕ (ಪಿಂಗ್ಲಿಷ್‌ ನಿವಾಸಿ) ಫ‌ಯಾಜ್‌ ಅಹ್ಮದ್‌ ವಾನಿ (ರೇಶೀಪೋರಾ ನಿವಾಸಿ) ರಿಯಾಜ್‌ ಅಹ್ಮದ್‌ ಗನಾಯೀ (ನಿಗೀನ್‌ಪೋರಾ ನಿವಾಸಿ) ಮತ್ತು ಬಿಲಾಲ್‌ ಅಹ್ಮದ್‌ ರಾಥರ್‌ (ಹಾಫ‌ೂ ನಿಗೀನ್‌ ಪೋರಾ ನಿವಾಸಿ) ಎಂದು ಗುರುತಿಸಲಾಗಿದೆ.