ಆಲಮಟ್ಟಿ: ರಾಜ್ಯದ ಪ್ರಮುಖ ನೀರಾವರಿ ಯೋಜನೆಗಳನ್ನು ಕಾಲಮಿತಿಯಲ್ಲಿ ಪೂರ್ಣಗೊಳಿಸುವ ಮಹದಾಶೆಯೊಂದಿಗೆ ಜೆಡಿಎಸ್‌ ಪಕ್ಷದ ವತಿಯಿಂದ ಜನತಾ ಜಲಧಾರೆ ಯಾತ್ರೆ ಹಮ್ಮಿಕೊಳ್ಳಲಾಗಿದೆ ಎಂದು ಜೆಡಿಎಸ್‌ ಬಾಗಲಕೋಟ ಜಿಲ್ಲಾಧ್ಯಕ್ಷ ಹನಮಂತ ಮಾವಿನಮರದ ಹೇಳಿದರು.
ಸ್ಥಳೀಯ ಪ್ರವಾಸಿ ಮಂದಿರದಲ್ಲಿ ಸೋಮವಾರ ನಡೆದ ಜೆಡಿಎಸ್‌ ಪಕ್ಷದ ವಿಜಯಪುರ-ಬಾಗಲಕೋಟೆ ಜಿಲ್ಲಾ ಘಟಕಗಳ ಜಂಟಿ ಸುದ್ದಿಗೋಷ್ಠಿಯನ್ನುದ್ದೇಶಿಸಿ ಮಾತನಾಡಿದ ಅವರು ಮಾಜಿ ಪ್ರಧಾನಿ ದೇವೇಗೌಡ ಅವರು ರಾಜ್ಯದಲ್ಲಿ ನೀರಾವರಿ ಮಂತ್ರಿ ಹಾಗೂ ಮುಖ್ಯಮಂತ್ರಿಯಾಗಿರುವ ವೇಳೆ ರಾಜ್ಯದ ಪ್ರಮುಖ ನೀರಾವರಿ ಯೋಜನೆಗಳಲ್ಲೊಂದಾಗಿರುವ ಕೃಷ್ಣಾ ಮೇಲ್ದಂಡೆ ಯೋಜನೆಯ ಸಾಕಾರಕ್ಕೆ ಶ್ರಮಿಸಿದ್ದಾರೆಂಬುದು ಈ ಭಾಗದ ಜನರಿಗೆ ತಿಳಿದಿದೆ ಎಂದರು.
ಜೆಡಿಎಸ್‌ ವರಿಷ್ಠ ಪ್ರಧಾನಿಯಾಗಿರುವ ವೇಳೆ ಎಐಬಿಪಿ ಅನುದಾನ ಸೇರಿದಂತೆ ಪ್ರಮುಖವಾಗಿ ನೀರಾವರಿಯಾಗಿ ವಿಶೇಷ ಆದ್ಯತೆ ನೀಡಿದ್ದರು. ರಾಜ್ಯದಲ್ಲಿ ಕುಮಾರಸ್ವಾಮಿಯವರು ಮುಖ್ಯಮಂತ್ರಿಯಾಗಿರುವ ವೇಳೆ ನೀರಾವರಿ ಯೋಜನೆಗಳ ಅನುಷ್ಠಾನ ಮತ್ತು ರೈತರ ಏಳ್ಗೆಗೆ ಹಲವಾರು ಯೋಜನೆಗಳನ್ನು ಜಾರಿಗೊಳಿಸಿರುವ ಸಂಗತಿ ನಾಡಿನ ಜನರು ಅರಿತಿದ್ದಾರೆ ಎಂದರು.
ರಾಜ್ಯದ 15 ಕಡೆಯಿಂದ ಯಾತ್ರೆ: ರಾಜ್ಯದ ಒಟ್ಟು 15 ಕಡೆಯಿಂದ ಜನತಾ ಜಲಧಾರೆ ಯಾತ್ರೆ ಹೊರಡಲಿದ್ದು, ಕೊನೆಗೆ ಬೆಂಗಳೂರಿನಲ್ಲಿ ಬೃಹತ್‌ ಸಮಾವೇಶ ಜರುಗಲಿದೆ. ಮಾಜಿ ಮುಖ್ಯಮಂತ್ರಿ ಕುಮಾರಸ್ವಾಮಿ ಅವರ ನೇತೃತ್ವದಲ್ಲಿ ಏ.16ರಂದು ಕೃಷ್ಣೆಯ ದಡದಲ್ಲಿರುವ ಯಲಗೂರ ಗ್ರಾಮದ ಯಲಗೂರೇಶ್ವರ ದೇವಸ್ಥಾನಕ್ಕೆ ತೆರಳಿ ಪವನಸುತನ ದರ್ಶನ ಪಡೆದು ನಂತರ ಆಲಮಟ್ಟಿಯಲ್ಲಿ ಕೃಷ್ಣೆಯ ಜಲವನ್ನು ಕಳಶದಲ್ಲಿ ಸಂಗ್ರಹಿಸಿಕೊಂಡು ಜನತಾ ಜಲಧಾರೆ ಸಂಕಲ್ಪ ಯಾತ್ರೆಯ ಬೃಹತ್‌ ಸಮಾವೇಶ ನಡೆಸಲಾಗುವುದು ಎಂದರು.
ರಾಜ್ಯದಲ್ಲಿ ಕೃಷ್ಣಾ, ಘಟಪ್ರಭಾ, ಮಲಪ್ರಭಾ, ಮಹಾದಾಯಿ, ತುಂಗಭದ್ರೆ, ಭೀಮಾ, ಕಾವೇರಿ, ಗೋದಾವರಿ, ಕಾರಂಜಾ, ಮುಲ್ಲಾಮಾರಿ, ಅಮರ್ಜಾ, ಅಘನಾಶಿನಿ, ಶರಾವತಿ, ಚಕ್ರ, ವಾರಾಹಿ, ನೇತ್ರಾವತಿ ನದಿಗಳು ಹರಿದಿದ್ದರೂ ಇನ್ನೂವರೆಗೆ ಸಮಗ್ರ ನೀರಾವರಿಯಾಗಿಲ್ಲ. ಇನ್ನು ಕೆಲ ಜಲಾಶಯಗಳನ್ನು ನಿರ್ಮಿಸಿ 3-4ದಶಕಗಳು ಗತಿಸಿದ್ದರೂ ರೈತರ ಜಮೀನಿಗೆ ನೀರುಣಿಸಲು ಸಾಧ್ಯವಾಗಿಲ್ಲ ಎಂದು ಹೇಳಿದರು.
ಕೆಲ ಜಲ ವಿವಾದಗಳು ನೆರೆ ರಾಜ್ಯಗಳ ತಕರಾರಿನಿಂದ ಸರ್ವೋತ್ಛ ನ್ಯಾಯಾಲಯದಲ್ಲಿ ನನೆಗುದಿಗೆ ಬಿದ್ದಿವೆ. ಕೆಲ ಜಲಾಶಯಗಳ ವ್ಯಾಪ್ತಿಯಲ್ಲಿ ನಿರ್ಮಿಸಿರುವ ಕಾಲುವೆಗಳು, ವಿತರಣಾ ಕಾಲುವೆಗಳನ್ನು ಪುನಃ ಶ್ಚೇತನ ಮತ್ತು ಆಧುನೀಕರಣಗೊಳಿಸದಿರುವುದರಿಂದ ರೈತರಿಗೆ ಸಮರ್ಪಕವಾಗಿ ತಲುಪುತ್ತಿಲ್ಲ. ಈ ಎಲ್ಲ ಯೋಜನೆಗಳಿಗೆ ಕಾಯಕಲ್ಪ ಕಲ್ಪಿಸಿ ರಾಜ್ಯದ ನದಿಗಳ ನೀರು ಸದ್ಬಳಕೆ ಮಾಡಿ ರಾಜ್ಯದ ಜನತೆಗೆ ಜಲಶ್ಯಾಮಲ- ಸಸ್ಯಶ್ಯಾಮಲ ವಾಗಿಸಲು ಜಾತ್ಯತೀತ ಜನತಾದಳ ಕಟಿಬದ್ಧವಾಗಿದೆ ಎಂದರು. ನಾಗಠಾಣ ಕ್ಷೇತ್ರದ ಶಾಸಕ ದೇವಾನಂದ ಚವ್ಹಾಣ, ಬಿ.ಡಿ.ಪಾಟೀಲ, ಬಸನಗೌಡ ಮಾರಡಗಿ, ಸಿದ್ದು ಬಂಡಿ, ಮಂಗಳಾದೇವಿ ಬಿರಾದಾರ, ಸಲೀಂ ಮೋಮಿನ್‌ ಮತ್ತಿತರರಿದ್ದರು
