‘Jawan’ ಯಶಸ್ಸು: ತಂತ್ರಜ್ಞರೇ ಚಿತ್ರದ ‘ನೈಜ ಹೀರೋ ಮತ್ತು ಹೀರೋಯಿನ್‌ಗಳು’ ಎಂದ SRK

ಮುಂಬಯಿ: “ಜವಾನ್” ಚಿತ್ರ ಈ ವರ್ಷದ ಬ್ಲಾಕ್‌ಬಸ್ಟರ್ ಹಿಟ್ ಮಾಡಿದ ಅಭಿಮಾನಿಗಳಿಗೆ ಸೂಪರ್‌ಸ್ಟಾರ್ ಶಾರುಖ್ ಖಾನ್ ಶುಕ್ರವಾರ ಧನ್ಯವಾದಗಳನ್ನು ಸಲ್ಲಿಸಿದ್ದು, ಯಶಸ್ಸನ್ನು ತಾಂತ್ರಿಕ ತಂಡಕ್ಕೆ ಅರ್ಪಿಸಿ, ಅವರನ್ನು ಚಲನಚಿತ್ರದ “ನಿಜವಾದ ನಾಯಕರು ಮತ್ತು ನಾಯಕಿಯರು” ಎಂದು ಬಣ್ಣಿಸಿದ್ದಾರೆ.

ಚಿತ್ರದ ಯಶಸ್ಸನ್ನು ಆಚರಿಸಿ ಕರೆದ ಪತ್ರಿಕಾಗೋಷ್ಠಿಯಲ್ಲಿ, “ಒಂದು ಚಿತ್ರದೊಂದಿಗೆ ಇಷ್ಟು ವರ್ಷ ಬದುಕುವ ಅವಕಾಶ ನಮಗೆ ಸಿಗುವುದು ಬಹಳ ಅಪರೂಪ. ಕೋವಿಡ್ ಮತ್ತು ಸಮಯದ ಕೊರತೆಯಿಂದಾಗಿ ‘ಜವಾನ್’ ನಾಲ್ಕು ವರ್ಷಗಳಿಂದ ನಮ್ಮೊಂದಿಗಿದೆ. ಈ ಚಿತ್ರದಲ್ಲಿ ಸಾಕಷ್ಟು ಜನರು ತೊಡಗಿಸಿಕೊಂಡಿದ್ದಾರೆ, ವಿಶೇಷವಾಗಿ ದಕ್ಷಿಣದ ಜನರು ಕಳೆದ ನಾಲ್ಕು ವರ್ಷಗಳಿಂದ ಮುಂಬೈಗೆ ಬಂದು ಶಿಫ್ಟ್ ಆಗಿದ್ದಾರೆ, ಈ ಚಿತ್ರಕ್ಕಾಗಿ ಹಗಲಿರುಳು ಶ್ರಮಿಸುತ್ತಿದ್ದಾರೆ” ಎಂದರು.

”ಬಹಳಷ್ಟು ಜನರು ತಮ್ಮ ಮನೆಗಳಿಗೆ ಹಿಂತಿರುಗಲಿಲ್ಲ. ನಿರ್ದೇಶಕ ಅಟ್ಲೀ ಅವರಂತೆ ಇಲ್ಲಿ ತಮ್ಮ ಮಕ್ಕಳನ್ನು ಹೊಂದಿದ್ದವರು ಅನೇಕರಿದ್ದಾರೆ. ಕಳೆದ ನಾಲ್ಕು ವರ್ಷಗಳಿಂದ ಶ್ರಮಿಸಿದ ತಂತ್ರಜ್ಞರೇ ಈ ಚಿತ್ರದ ನಿಜವಾದ ಹೀರೋ ಮತ್ತು ಹೀರೋಯಿನ್‌ಗಳು’ ಎಂದು ಶಾರುಖ್ ಹೇಳಿದರು.

ಅಟ್ಲೀ ನಿರ್ದೇಶಿಸಿದ, ಪ್ಯಾನ್-ಇಂಡಿಯಾ ಚಲನಚಿತ್ರದಲ್ಲಿ ನಯನತಾರಾ ಮತ್ತು ವಿಜಯ್ ಸೇತುಪತಿ ಮತ್ತು ದೀಪಿಕಾ ಪಡುಕೋಣೆ ವಿಶೇಷ ಪಾತ್ರದಲ್ಲಿ ನಟಿಸಿದ್ದಾರೆ. ಇದು ಹಿಂದಿ, ತಮಿಳು ಮತ್ತು ತೆಲುಗು ಭಾಷೆಗಳಲ್ಲಿ ಸೆಪ್ಟೆಂಬರ್ 7 ರಂದು ವಿಶ್ವದಾದ್ಯಂತ ತೆರೆ ಕಂಡು ಗಲ್ಲಾಪೆಟ್ಟಿಗೆ ಸೂರೆಗೈದಿತ್ತು. ಚಿತ್ರವು ಬಾಕ್ಸ್ ಆಫೀಸ್‌ನಲ್ಲಿ ಸುಮಾರು 700 ಕೋಟಿ ರೂ. ಗಳಿಸಿದೆ. ಕೋವಿಡ್‌ನಿಂದಾಗಿ “ಜವಾನ್” ಪೂರ್ಣಗೊಳಿಸಲು ನಾಲ್ಕು ವರ್ಷಗಳನ್ನು ತೆಗೆದುಕೊಳ್ಳಲಾಗಿದೆ.