ಮೈಸೂರು: ಅಸಂಘಟಿತ ವಲಯ ಬ್ಯಾಂಕಿಂಗ್‌ ಕ್ಷೇತ್ರದ ವ್ಯಾಪ್ತಿಗೆ ಒಳಪಡಲು ಪ್ರಧಾನ ಮಂತ್ರಿ ಜನ್‌ಧನ್‌ ಯೋಜನೆ ಪೂರಕವಾಗಿದೆ ಎಂದು ಮೈಸೂರು ವಿವಿ ಕುಲಸಚಿವ ಪ್ರೊ. ಆರ್‌. ಶಿವಪ್ಪ ಹೇಳಿದರು. ಮೈಸೂರು ವಿ.ವಿ.ಯ ಸ್ಟೇಟ್‌ ಬ್ಯಾಂಕ್‌ ಆಫ್ ಮೈಸೂರು ಪೀಠ, ಅರ್ಥಶಾಸ್ತ್ರ ಮತ್ತು ಸಹಕಾರ ವಿಭಾಗದ ಸಹಯೋಗದಲ್ಲಿ ಮಾನಸ ಗಂಗೋತ್ರಿಯ ವಿಜ್ಞಾನಭವನದಲ್ಲಿ ಶುಕ್ರವಾರ ಆಯೋಜಿಸಿದ್ದ ಆರ್ಥಿಕ ಒಳಗೊಳ್ಳುವಿಕೆ ಮತ್ತು ಪಿಎಂಜೆಡಿವೈ ಪಾಲ್ಗೊಳ್ಳುವಿಕೆ ಕುರಿತ ಉಪನ್ಯಾಸ ಕಾರ್ಯಕ್ರಮವನ್ನು ಉದ್ಘಾಟಿಸಿ ಅವರು ಮಾತನಾಡಿದರು.
ಭಾರತದ ಆರ್ಥಿಕ ಶಿಸ್ತು ಹಳಿ ತಪ್ಪಿದ್ದು, ಇದೇ ಪರಿಸ್ಥಿತಿಯನ್ನು ಜಗತ್ತಿನ ಹಲವು ದೇಶಗಳು ಅನುಭವಿಸುತ್ತಿವೆ. ಇಂತಹ ಸಂದರ್ಭದಲ್ಲಿ ಪ್ರಧಾನ್‌ ಮಂತ್ರಿ ಜನ್‌ಧನ್‌ ಯೋಜನೆ (ಪಿಎಂಜೆಡಿವೈ) ರೀತಿಯ ಕೆಲವು ಯೋಜನೆಗಳು ಆರ್ಥಿಕ ಪ್ರಗತಿಗೆ ಪೂರಕವಾಗಲಿವೆ. ಉದ್ಯೋಗ ಖಾತ್ರಿ ಯೋಜನೆಯ ಹಣ ನೇರವಾಗಿ ಕಾರ್ಮಿಕರ ಖಾತೆಗೆ ಜಮಾ ಆಗುತ್ತಿದೆ. ಇದರಿಂದ ಪಾರದರ್ಶಕತೆ ಸಾಧ್ಯವಾಗಿದೆ. ಈ ಬೆಳವಣಿಗೆಗೆ ಜನ್‌ಧನ್‌ ಯೋಜನೆ ಕಾರಣ. ಬ್ಯಾಂಕಿಂಗ್‌ ಕ್ಷೇತ್ರ ಹಲವು ಸಮಸ್ಯೆಗಳನ್ನು ಎದುರಿಸುತ್ತಿದೆ. ಇಂತಹ ಸಂದರ್ಭದಲ್ಲಿ ಜಾರಿಯಾದ ಜನ್‌ಧನ್‌ ಯೋಜನೆಯಿಂದ ಪ್ರತಿ ವಯಸ್ಕನೂ ಬ್ಯಾಂಕ್‌ ಖಾತೆಯನ್ನು ಹೊಂದುವಂತಾಯಿತು. ಗ್ರಾಮೀಣ, ಆದಿವಾಸಿ, ಅಸಂಘಟಿತ ವಲಯದ ಜನರೂ ಬ್ಯಾಂಕ್‌ಗಳಿಗೆ ಕಾಲಿಡುವಂತಾಯಿತು ಎಂದು ತಿಳಿಸಿದರು.
ನಮ್ಮಲ್ಲಿ ಇಂದಿಗೂ ಸಾಕಷ್ಟು ಅಸಂಘಟಿತ ವಲಯಗಳಿದ್ದು, ಅವು ಬ್ಯಾಂಕುಗಳಿಂದ ದೂರ ಉಳಿದಿವೆ. ಜೊತೆಗೆ ಆದಿವಾಸಿ ಸಮುದಾಯವು ಇದಕ್ಕೆ ಹೊರತಾಗಿಲ್ಲ. ಇದರಿಂದಾಗಿ ಗ್ರಾಮೀಣ ಪ್ರದೇಶದಲ್ಲಿ ಅಭಿವೃದ್ಧಿ ಮರೀಚಿಕೆಯಾಗಿದೆ. ಜೊತೆಗೆ ಉಳಿತಾಯ, ನರೇಗದಂತಹ ಯೋಜನೆಗಳು ವಿಫ‌ಲವಾಗುತ್ತಿವೆ. ಕೇಂದ್ರ ಸರ್ಕಾರ ಪ್ರಧಾನಿ ಮಂತ್ರಿ ಜನ್‌ಧನ್‌ ಯೋಜನೆ ಜಾರಿಯಾದ ಬಳಿಕ ದೇಶದೆಲ್ಲೆಡೆ ಇದ್ದ ಅಸಂಘಟಿತ ವಲಯ ಹಾಗೂ ಬುಡಕಟ್ಟು ಸಮುದಾಯ ಬ್ಯಾಂಕಿಂಗ್‌ ಕ್ಷೇತ್ರಕ್ಕೆ ಒಳಪಟ್ಟು, ಬ್ಯಾಂಕಿನ ಮೂಲಕವೆ ಹಣಕಾಸಿನ ವ್ಯವಹಾರ ಮಾಡುತ್ತಿವೆ. ಇದರಿಂದ ದೇಶದ ಪ್ರಗತಿಗೆ ಸಹಕಾರಿಯಾಗಲಿದ್ದು, ಉಳಿತಾಯ, ಸಾಲಸೌಲಭ್ಯ ಮೊದಲಾದ ಯೋಜನೆಗಳನ್ನು ರೂಪಿಸಲು ಸಹಕಾರಿಯಾಗಿದೆ ಎಂದು ಮೆಚ್ಚುಗೆ ವ್ಯಕ್ತಪಡಿಸಿದರು.
ಎಸ್‌ಬಿಎಂ ಪೀಠದ ಸಂದರ್ಶಕ ಪ್ರಾಧ್ಯಾಪಕ ಟಿ.ಆರ್‌.ಮಂಜುನಾಥ್‌ ಮಾತನಾಡಿ, ದೇಶದಲ್ಲಿ ಆರ್ಥಿಕ ಒಳಗೊಳ್ಳುವಿಕೆ ಯೋಜನೆಗಳು ಮೂರು ಹಂತದಲ್ಲಿ ಜಾರಿಯಾಗಿವೆ. ವಿವಿಧ ಸಮಿತಿಗಳನ್ನು ರಚಿಸುವ ಮೂಲಕ 2010-13ರ ಅವಧಿಯಲ್ಲಿ ಮೊದಲ ಹಂತದ ಯೋಜನೆಗಳು ಜಾರಿಯಾದವು. ಎರಡನೇ ಹಂತದಲ್ಲಿ ಆಗಸ್ಟ್‌ 24, 2014ರಂದು ಪಿಎಂಜೆಡಿವೈ ಜಾರಿಗೆ ತರಲಾಯಿತು. 2016-19ರ ಆರ್ಥಿಕ ಅವಧಿಯ ಯೋಜನೆಗಳು ಈಗ ಚಾಲ್ತಿಯಲ್ಲಿವೆ ಎಂದು ವಿವರಿಸಿದರು. ಕಾರ್ಯಕ್ರಮದಲ್ಲಿ ಅರ್ಥಶಾಸ್ತ್ರ ವಿಭಾಗದ ಮುಖ್ಯಸ್ಥ ಪ್ರೊ.ಎಸ್‌.ಮಹೇಂದ್ರಕುಮಾರ್‌, ಮೈಸೂರು ಎಸ್‌ಬಿಐ ಆಡಳಿತ ಕಚೇರಿ-4ರ ಉಪವ್ಯವಸ್ಥಾಪಕ ಎಂ.ಅರುಣಗಿರಿ ಇದ್ದರು.
