ಜೈಪುರಕ್ಕೆ ಎರಡನೇ ಪ್ರೊ ಕಬಡ್ಡಿ ಕಿರೀಟ: ಪುನೇರಿ ಪಲ್ಟಾನ್‌ ವಿರುದ್ಧ 33-29 ಗೆಲುವು

ಮುಂಬಯಿ: ಜೈಪುರ್‌ ಪಿಂಕ್‌ ಪ್ಯಾಂಥರ್ 2ನೇ ಬಾರಿಗೆ ಪ್ರೊ ಕಬಡ್ಡಿ ಚಾಂಪಿಯನ್‌ ಆಗಿ ಮೂಡಿಬಂದಿದೆ. ಶನಿವಾರದ ಪ್ರಶಸ್ತಿ ಕಾಳಗದಲ್ಲಿ ಅದು ಮೊದಲ ಸಲ ಫೈನಲ್‌ ಪ್ರವೇಶಿಸಿದ ಪುನೇರಿ ಪಲ್ಟಾನ್‌ ವಿರುದ್ಧ 33-29 ಅಂತರದ ಗೆಲುವು ಸಾಧಿಸಿತು.

ಬಲಿಷ್ಠ ತಂಡಗಳೆರಡರ ನಡುವಿನ ಜಿದ್ದಾಜಿದ್ದಿ ಕದನ ನಿಜವಾದ ಫೈನಲ್‌ ಜೋಶ್‌ಗೆ ಸಾಕ್ಷಿಯಾಯಿತು. ಆದರೆ ಆರಂಭದಿಂದಲೇ ಸಣ್ಣ ಅಂತರದ ಮುನ್ನಡೆ ಕಾಯ್ದು ಕೊಂಡು ಬಂದ ಜೈಪುರ್‌ ಇದನ್ನು ಉಳಿಸಿಕೊಳ್ಳುವಲ್ಲಿ ಯಶಸ್ವಿಯಾ ಯಿತು. ವಿರಾಮದ ವೇಳೆ 14-12 ಲೀಡ್‌ ಹೊಂದಿತ್ತು.

ವಿರಾಮದ ಬಳಿಕವೂ ಜೈಪುರ್‌ ಮುನ್ನಡೆಯನ್ನು ಕಾಯ್ದುಕೊಳ್ಳುತ್ತ ಹೋಯಿತು. ಪುಣೆಗೆ ಓವರ್‌ಟೇಕ್‌ ಸಾಧ್ಯವಾಗಲೇ ಇಲ್ಲ. ರೈಡರ್‌ಗಳಾದ ಅರ್ಜುನ್‌ ದೇಶ್ವಾಲ್‌, ವಿ. ಅಜಿತ್‌, ನಾಯಕ ಹಾಗೂ ಡಿಫೆಂಡರ್‌ ಸುನೀಲ್‌ ಕುಮಾರ್‌ ಜೈಪುರ ಜಯದಲ್ಲಿ ಪ್ರಮುಖ ಪಾತ್ರ ವಹಿಸಿದರು. ಈ ಮೂವರದೂ 6 ಅಂಕಗಳ ಸಾಧನೆ. ಪುನೇರಿ ಪರ ರೈಡರ್‌ ಆಕಾಶ್‌ ಶಿಂಧೆ, ಡಿಫೆಂಡರ್‌ ಅಭಿಷೇಕ್‌ ನಾದರಾಜನ್‌ ಮತ್ತು ಆಲ್‌ರೌಂಡರ್‌ ಮೊಹಮ್ಮದ್‌ ನಬಿಬಕ್‌Ò ತಲಾ 4 ಅಂಕ ಗಳಿಸಿದರು.

2014ರ ಚೊಚ್ಚಲ ಆವೃತ್ತಿಯ ಚಾಂಪಿಯನ್‌ ಆಗಿದ್ದ ಜೈಪುರ್‌, 2016ರಲ್ಲೂ ಫೈನಲ್‌ ಪ್ರವೇಶಿಸಿತ್ತಾದರೂ ಅಲ್ಲಿ ಪಾಟ್ನಾ ಪೈರೆಟ್ಸ್‌ಗೆ ಶರಣಾಗಿತ್ತು.