ಕೋವಿಡ್ ಅಮ್ಮನಿಗೆ ಎಡೆ ಪೂಜೆ!

ಜಗಳೂರು: ಕೋವಿಡ್ ನಿರ್ಮೂಲನೆಯಾಗಲೆಂದು ಪ್ರಾರ್ಥಿಸಿ ತಾಲೂಕಿನ ಸಿದ್ದಮ್ಮನಹಳ್ಳಿ ಗ್ರಾಮದ ಗ್ರಾಮಸ್ಥರು ಕೋವಿಡ್ ಅಮ್ಮನ ಮೂರ್ತಿ ಮಾಡಿ ಪೂಜೆ ಸಲ್ಲಿಸಿದರು.

ಹೋಳಿಗೆ ಎಡೆ ಮಾಡಿ ನಮ್ಮ ನಾಡು ಬಿಟ್ಟು ಹೋಗುವಂತೆ ಪ್ರಾರ್ಥಿಸಿದರು. ಗ್ರಾಮದ ಪ್ರತಿ ಮನೆಯಿಂದ ಹೋಳಿಗೆ ಮಾಡಿ ತರಲಾಗಿತ್ತು. ಬೇವಿನಸೊಪ್ಪು ತಂದು ಬಾಳೆ ಎಲೆಯಲ್ಲಿ ಮಣ್ಣಿನ ಮಡಿಕೆಯನ್ನಿಟ್ಟು ಅದರೊಳಗೆ ನೀರು ತುಂಬಿಸಲಾಯಿತು. ಹಸಿರು ಬಳೆ, ಕುಂಕುಮ ಹಾಗೂ ಹೋಳಿಗೆಯ ಎಡೆಯನ್ನು ಇಟ್ಟುಕೊಂಡು ಊರ ಹೊರಗಿರುವ ಬೇವಿನ ಮರದಡಿ ಪ್ರತಿಷ್ಠಾಪಿಸಲ್ಪಟ್ಟಿದ್ದ ಕೋವಿಡ್ ಅಮ್ಮನ ಮೂರ್ತಿ ಮುಂಭಾಗದಲ್ಲಿ ಇಡಲಾಯಿತು. ಹೋಳಿಗೆಯ ಎಡೆ ಅರ್ಪಿಸಿ ಯಾರಿಗೂ ಹರಡದೆ ಈ ನಾಡನ್ನು ಬಿಟ್ಟು ಹೋಗು ತಾಯಿ ಎಂದು ಪ್ರಾರ್ಥಿಸಲಾಯಿತು.