ಅಂತೂ ಇಂತೂ ಬಂತಲ್ಲ ಜೋರು ಮಳೆ!

ದಾವಣಗೆರೆ: ಈ ಬಾರಿಯ ಮುಂಗಾರು ಹಂಗಾಮಿನಲ್ಲೇ ಮೊಟ್ಟ ಮೊದಲ ಬಾರಿಗೆ ಒಂದಿಷ್ಟು ಉತ್ತಮ ಮಳೆ ಸುರಿದ ಪರಿಣಾಮ ಮಂಗಳವಾರ ದಾವಣಗೆರೆ ನಗರದ ಭಾಗ ಜಲಾವೃತ್ತಗೊಂಡಿದ್ದವು. ಭಾನುವಾರ ಸಂಜೆಯಿಂದ ಪ್ರಾರಂಭವಾಗಿದ್ದ ಮಳೆ ಸೋಮವಾರ ಆಗಾಗ ಜಿಟಿ ಜಿಟಿಯಾಗಿ ಬಂದಿತ್ತು. ನಿನ್ನೆ ಬೆಳ್ಳಂಬೆಳಗ್ಗೆಯಿಂದಲೇ ಆರಂಭಗೊಂಡ ಮಳೆ, ಮಧ್ಯಾಹ್ನ 12-30ರ ವೇಂಎ ಒಂದೂವರೆ ತಾಸಿಗೂ ಹೆಚ್ಚು ಕಾಲ ನಿರಂತರವಾಗಿ ಸುರಿಯಿತು. ಕೆಲ ಹೊತ್ತು ವಿರಾಮ ನೀಡಿದಾಗ ಬಿಸಿಲ ದರ್ಶನವಾಯಿತು. ಮತ್ತೆ ಸಂಜೆ ಸುಮಾರು ಹೊತ್ತು ಒಂದೇ ಸಮನೆ ಸುರಿಯಿತು.

ಬಹಳ ದಿನಗಳ ಮಾತ್ರವಲ್ಲ ಬಹು ವರ್ಷದಿಂದ ಗಟ್ಟಿ ಮಳೆಯನ್ನೇ ನೋಡದ ಜನರು ಮಳೆ ಕಂಡು ನೆಮ್ಮದಿ ಉಸಿರುಬಿಟ್ಟರು. ಮಳೆಯಿಂದಾಗಿ ರಸ್ತೆಗಳಲ್ಲಿ ನೀರು ನಿಂತಿದ್ದು ಅದರಲ್ಲೇ ದ್ವಿಚಕ್ರ, ಆಟೋ ರಿಕ್ಷಾ, ಬಸ್‌, ಕಾರು ಚಾಲಕರು ಸರ್ಕಸ್‌ ಮಾಡುತ್ತಲೇ ಮುಂದೆ ಸಾಗಿದರು. ಮಹಾನಗರ ಪಾಲಿಕೆ ಮುಂದಿರುವ ರೈಲ್ವೆ ಕೆಳ ಸೇತುವೆ, ಎಪಿಎಂಸಿ ಬಳಿಯ ರೈಲ್ವೆ ಮೇಲ್ಸೇತುವೆ ಇತರೆ ಭಾಗಗಳು ಜಲಾವೃತ್ತಗೊಂಡಿದ್ದವು. ರೈಲ್ವೆ ಕೆಳ ಸೇತುವೆ ದಾಟಲು ವಾಹನ ಸವಾರರು ಎಂದಿನಂತೆ ಸಮಸ್ಯೆ ಅನುಭವಿಸಿದರು. ಅಂತೂ ಇಂತೂ ದಾವಣಗೆರೆಯಲ್ಲಿ ಬಹಳ ದಿನಕ್ಕೆ ಗಟ್ಟಿ ಮಳೆಯಾಯಿತು. ಸಂಜೆ ಕೆಲ ಕಾಲ ವಿರಾಮ ನೀಡಿದ ಮಳೆ ಮತ್ತೆ ಜಿನುಗುಲಾರಂಭಿಸಿತು.