ವಿಜ್ಞಾನಿಯ ಕೊಲೆಗೆ ಇಸ್ರೇಲ್‌ ಕಾರಣ?

ಟೆಹ್ರಾನ್‌: ಕಳೆದ ಶುಕ್ರವಾರ ದುಷ್ಕರ್ಮಿಗಳ ಗುಂಡಿನ ದಾಳಿಗೆ ಬಲಿಯಾದ ತಮ್ಮ ದೇಶದ ಅಣ್ವಸ್ತ್ರ ವಿಜ್ಞಾನಿ ಮೋಹ್ಸೆನ್‌ ಫ‌ಕೀರ್‌ಜಾದೆ ಸಾವಿಗೆ ಇಸ್ರೇಲ್‌ ಕಾರಣ ಎಂದು ಇರಾನ್‌ ಆಪಾದಿಸಿದೆ. ಇಸ್ರೇಲ್‌ ಅತ್ಯಾಧುನಿಕ “ಎಲೆಕ್ಟ್ರಾನಿಕ್‌ ಡಿವೈಸ್‌ಗಳನ್ನು’ ಬಳಸಿ ಮೋಹ್ಸೆನ್‌ ಕೊಲೆ ಮಾಡಿದೆ ಎನ್ನುತ್ತಾರೆ ಇರಾನ್‌ನ ಭದ್ರತಾಪಡೆಯ ಹಿರಿಯ ಅಧಿಕಾರಿ ಅಲಿ ಶಮ್ಖನಿ.

ಮೋಹ್ಸೆನ್‌ ಫ‌ಕೀರ್‌ಜಾದೆ ತಮ್ಮ ಕಾರಿನಲ್ಲಿ ಟೆಹ್ರಾನ್‌ನ ಹೊರವಲಯದಲ್ಲಿ ಸಂಚರಿಸುತ್ತಿದ್ದಾಗ ಅವರ ಕಾರಿನ ಮೇಲೆ ಗುಂಡಿನ ದಾಳಿ ನಡೆದಿತ್ತು. ಭಾನುವಾರ ಇರಾನ್‌ನ ಆಂಗ್ಲವಾಹಿನಿಗಳು, ಅಣ್ವಸ್ತ್ರ ವಿಜ್ಞಾನಿಯನ್ನು ಕೊಂದ ಅಸ್ತ್ರ ಇಸ್ರೇಲ್‌ನಲ್ಲಿ ತಯಾರಾಗಿದೆ ಎನ್ನುವುದನ್ನು ಅದರ ಮೆಲಿನ ಲೋಗೋ ಹಾಗೂ ಇಸ್ರೇಲ್‌ ಮಿಲಿಟರಿ ಇಂಡಸ್ಟ್ರಿಯಲ್ಲಿ ಉತ್ಪಾದನೆಯಾದ ಕೆಲ ಗುರುತುಗಳೇ ಸಾರುತ್ತಿವೆ ಎಂದಿವೆ.

ನವದೆಹಲಿಯಲ್ಲಿರುವ ಇರಾನ್‌ನ ರಾಯಭಾರ ಕಚೇರಿಯು, ಅಂತಾರಾಷ್ಟ್ರೀಯ ಸಮುದಾಯವು ಈ ಉಗ್ರ ಕೃತ್ಯವನ್ನು ಖಂಡಿಸಬೇಕು ಎಂದು ಆಗ್ರಹಿಸಿದೆ. ಮೋಹ್ಸೆನ್‌ ಫ‌ಕೀರ್‌ಜಾದೇಹ್‌ ಅಂತ್ಯಕ್ರಿಯೆಯಲ್ಲಿ ಭಾಗವಹಿಸಿದ್ದ ಇರಾನ್‌ ಅಧ್ಯಕ್ಷ ಹಸನ್‌ ರೋಹಾನಿ, ಹಿರಿಯ ವಿಜ್ಞಾನಿಯ ಕೊಲೆಗೆ ನಾವು ಪ್ರತೀಕಾರ ತೀರಿಸಿಕೊಳ್ಳುತ್ತೇವೆ. ಈ ಕುಕೃತ್ಯದಲ್ಲಿ ಇಸ್ರೇಲ್‌ನ ಪಾತ್ರ ಕಾಣಿಸುತ್ತಿದ್ದು, ಅದು ಅಶಾಂತಿ ಸೃಷ್ಟಿಸಲು ಪ್ರಯತ್ನಿಸುತ್ತಿದೆ. ಅಂತಾರಾಷ್ಟ್ರೀಯ ಸಮುದಾಯವು ತಮ್ಮ ನಾಚಿಕೆಗೇಡಿನ ಇಬ್ಬಗೆತನ ಬಿಟ್ಟು, ಇಸ್ರೇಲ್‌ ಪ್ರಾಯೋಜಿತ ಈ ಉಗ್ರ ಕೃತ್ಯವನ್ನು ಖಂಡಿಸಬೇಕು ಎಂದಿದ್ದಾರೆ.