ಗ್ರೂಪ್‌ ಬಿ, ಸಿ ಹುದ್ದೆಗಳಿಗೆ ಇನ್ನು ಒಂದೇ ಸಿಇಟಿ?

ಹೊಸದಿಲ್ಲಿ: ಕೇಂದ್ರ ಸರಕಾರದ ವಿವಿಧ ಇಲಾಖೆಗಳ ಗ್ರೂಪ್‌ ಬಿ ಮತ್ತು ಸಿ ಹುದ್ದೆಗಳ ನೇಮಕಾತಿಗೆ ಹಲವಾರು ಅರ್ಹತಾ ಪರೀಕ್ಷೆಗಳನ್ನು ನಡೆಸುವುದನ್ನು ಕೈಬಿಟ್ಟು, ಆ ಎಲ್ಲ ಹುದ್ದೆಗಳಿಗೂ ಒಂದೇ ಸಿಇಟಿ (ಸಾಮಾನ್ಯ ಅರ್ಹತಾ ಪರೀಕ್ಷೆ) ನಡೆಸುವ ಮಹತ್ವದ ಪ್ರಸ್ತಾವನೆಯೊಂದನ್ನು ಕೇಂದ್ರ ಸಿಬಂದಿ ಸಚಿವಾಲಯ ರೂಪಿಸಿದೆ.

ಕೇಂದ್ರ ಸರಕಾರದ ಅಧೀನದಲ್ಲಿರುವ “ಸಿಬಂದಿ ಆಯ್ಕೆ ಆಯೋಗ’ (ಎಸ್‌ಎಸ್‌ಸಿ) ಕೇಂದ್ರ ಸರಕಾರದ ವಿವಿಧ ಇಲಾಖೆಗಳ ಗ್ರೂಪ್‌ ಬಿ ಹುದ್ದೆಗಳ ನೇಮಕಾತಿಗಾಗಿ ಹಲವಾರು ಪರೀಕ್ಷೆಗಳನ್ನು ನಡೆಸಿ ಆಯಾ ಇಲಾಖೆಗೆ ಬೇಕಾದ ಅಭ್ಯರ್ಥಿಗಳನ್ನು ಪ್ರತ್ಯೇಕ ವಾಗಿ ಆಯ್ಕೆ ಮಾಡುತ್ತಿದೆ. ಆ ಎಲ್ಲ ಪರೀಕ್ಷೆಗಳನ್ನು ಕೈಬಿಟ್ಟು, ಗ್ರೂಪ್‌ ಬಿ (ಪತ್ರಾಂಕಿತಯೇತರ) ಮತ್ತು ಗ್ರೂಪ್‌ ಸಿ ಹುದ್ದೆಗಳಿಗೆ ಒಂದೇ ಸಿಇಟಿ ಮೂಲಕ ಅಭ್ಯರ್ಥಿಗಳನ್ನು ಆಯ್ಕೆ ಮಾಡಬೇಕು ಹಾಗೂ ಆ ಸಿಇಟಿ ಹೊಣೆಯನ್ನು ಹೊಸದಾಗಿ ಸ್ಥಾಪಿಸಲಾಗುವ ವಿಶೇಷ ಪ್ರಾಧಿಕಾರಕ್ಕೆ ನೀಡಬೇಕು ಎಂಬುದು ಪ್ರಸ್ತಾವನೆಯ ಮೂಲ ತಿರುಳು.

ಉಪಯೋಗಗಳೇನು?
– ಒಂದೇ ಸಿಇಟಿಯಿಂದ ಪ್ರತಿ ಇಲಾಖೆಗೂ ಪ್ರತ್ಯೇಕ ಪರೀಕ್ಷೆ ನಡೆಸುವ ಕಿರಿಕಿರಿಯಿಂದ ಮುಕ್ತಿ.
– ಹಲವು ಪರೀಕ್ಷೆಗಳ ಬದಲು ಒಂದೇ ಪರೀಕ್ಷೆ ಜಾರಿಯಾದರೆ ಖರ್ಚಿಗೆ ಕಡಿವಾಣ.
– ಒಂದು ಪರೀಕ್ಷೆಗೆ ಮಾತ್ರ ಸಿದ್ಧತೆ ಬೇಕಿರುವುದರಿಂದ ಅಭ್ಯರ್ಥಿಗಳೂ ನಿರಾಳ.