ಪಾಶ್ಚಾತ್ಯರ ಟೀಕೆ: ಡಿ.1ರ ಕ್ಷಿಪಣಿ ಪರೀಕ್ಷೆ ದೃಢೀಕರಿಸಿದ ಇರಾನ್‌

ಟೆಹರಾನ್‌ : ಪಾಶ್ಚಾತ್ಯ ದೇಶಗಳು ಮಾಡಿರುವ ಕಟುವಾದ ಟೀಕೆಯನ್ನು ಅನುಸರಿಸಿ ಇರಾನ್‌ ತಾನು ಕಳೆದ ಡಿ.1ರಂದು ಮಧ್ಯಮ ವ್ಯಾಪ್ತಿಯ ಬ್ಯಾಲಿಸ್ಟಿಕ್‌ ಮಿಸೈಲ್‌ ಅನ್ನು  ಪರೀಕ್ಷಾರ್ಥ ಉಡಾಯಿಸಿರುವುದನ್ನು ಇಂದು ದೃಢಪಡಿಸಿತು.

“ನಾವು ನಮ್ಮ ಕ್ಷಿಪಣಿ ಪರೀಕ್ಷೆಗಳನ್ನು ಮುಂದುವರಿಸುತ್ತಿದ್ದೇವೆ ಮತ್ತು ಕಳೆದ ಡಿ.1ರಂದು ನಡೆಸಲಾಗಿರುವುದು ಮಹತ್ವದ ಪರೀಕ್ಷೆಯಾಗಿದೆ’ ಎಂದು ರೆವಲ್ಯೂಶನರಿ ಗಾರ್ಡ್‌ಸ್‌ ಏರೋಸ್ಪೇಸ್‌ ಕಮಾಂಡರ್‌ ಬ್ರಿಗೇಡಿಯರ್‌ ಜನರಲ್‌ ಅಮೀರಾಲಿ ಹಜೀಜ್‌ದೇ  ಹೇಳಿರುವುದನ್ನು ಫಾರ್ಸ್‌ ನ್ಯೂಸ್‌ ವರದಿ ಮಾಡಿದೆ. 

‘ಅಮೆರಿಕದ ಪ್ರತಿಕ್ರಿಯೆಯನ್ನು ಕಂಡರೆ ಇದೇನೋ ಭಾರೀ ದೊಡ್ಡ ಸಂಗತಿ ಎಂದು ಅದು ಪರಿಗಣಿಸಿರುವಂತಿದೆ ಮತ್ತು ನಮ್ಮ ಈ ಮಿಸೈಲ್‌ ಪರೀಕ್ಷೆಯು ಅವರನ್ನು ದಿಗಿಲುಗೊಳಿಸಿರುವಂತಿದೆ; ಇರಾನ್‌ ವರ್ಷಂಪ್ರತಿ 40ರಿಂದ 50 ಕ್ಷಿಪಣಿ ಪರೀಕ್ಷೆಗಳನ್ನು ನಡೆಸುತ್ತದೆ’ ಎಂದು ಜನರಲ್‌ ಅಮೀರಾಲಿ ಹಜೀಜ್‌ದೇ  ಹೇಳಿದ್ದಾರೆ.