ಥಂಪಿ: ಐಪಿಎಲ್‌ನ ದುಬಾರಿ ಬೌಲರ್‌

ಭಾರತೀಯ ಕ್ರಿಕೆಟಿನ ಭರವಸೆಯ ಯುವ ಬೌಲರ್‌ಗಳಲ್ಲಿ ಕೇರಳದ ಬಾಸಿಲ್‌ ಥಂಪಿ ಹೆಸರು ಇತ್ತೀಚೆಗೆ ಜೋರಾಗಿ ಕೇಳಿಬರುತ್ತಿದೆ. ಆದರೆ ಗುರುವಾರದ ಐಪಿಎಲ್‌ ಪಂದ್ಯ ಈ ಯುವ ಬೌಲರ್‌ ಪಾಲಿಗೆ ಭಾರೀ ಕಹಿಯಾಗಿ ಪರಿಣಮಿಸಿತು. ಐಪಿಎಲ್‌ ಪಂದ್ಯವೊಂದರಲ್ಲಿ ಅತ್ಯಧಿಕ ರನ್‌ ನೀಡಿದ ದುಬಾರಿ ಬೌಲರ್‌ ಎಂಬ ಅನಪೇಕ್ಷಿತ ದಾಖಲೆಯನ್ನು ತಮ್ಮ ಹೆಸರಿಗೆ ಬರೆಸಿಕೊಳ್ಳಬೇಕಾಯಿತು.

ಸನ್‌ರೈಸರ್ ಹೈದರಾಬಾದ್‌ ಪರ ಆಡುತ್ತಿದ್ದ ಬಾಸಿಲ್‌ ಥಂಪಿ ಬೆಂಗಳೂರಿನಲ್ಲಿ ನಡೆದ ರಾಯಲ್‌ ಚಾಲೆಂಜರ್ ಬೆಂಗಳೂರು ವಿರುದ್ಧದ ಪಂದ್ಯದಲ್ಲಿ 4 ಓವರ್‌ ಎಸೆದು 70 ರನ್‌ ಬಿಟ್ಟುಕೊಟ್ಟರು. ಇದು ಐಪಿಎಲ್‌ ಇತಿಹಾಸದಲ್ಲೇ ಬೌಲರ್‌ ಒಬ್ಬ ನೀಡಿದ ಅತ್ಯಧಿಕ ರನ್‌ ಆಗಿದೆ. ಥಂಪಿ ಎಸೆತಗಳಲ್ಲಿ ಆರ್‌ಸಿಬಿ ಬ್ಯಾಟ್ಸ್‌ಮನ್‌ಗಳು 6 ಸಿಕ್ಸರ್‌ ಹಾಗೂ 5 ಬೌಂಡರಿ ಬಾರಿಸಿದರು. ಒಂದೂ ವಿಕೆಟ್‌ ಕೀಳಲು ಅವರಿಂದಾಗಲಿಲ್ಲ. ಪವರ್‌ ಪ್ಲೇ ಅವಧಿಯ ಮೊದಲೆರಡು ಓವರ್‌ಗಳಲ್ಲೇ ಥಂಪಿ 37 ರನ್‌ ನೀಡಿದರು. ಇನ್ನೊಂದು ಸ್ಪೆಲ್‌ನ ಕೊನೆಯ 2 ಓವರ್‌ಗಳಲ್ಲಿ ಮತ್ತೆ 33 ರನ್‌ ಸೋರಿ ಹೋಯಿತು.

ಈ ಸಂದರ್ಭದಲ್ಲಿ ಸನ್‌ರೈಸರ್ ಹೈದರಾಬಾದ್‌ನವರೇ ಆದ ಇಶಾಂತ್‌ ಶರ್ಮ ಅವರ ದಾಖಲೆ ಪತನಗೊಂಡಿತು. ಅವರು 2013ರ ಚೆನ್ನೈ ಪಂದ್ಯದ ವೇಳೆ 4 ಓವರ್‌ಗಳಲ್ಲಿ 64 ರನ್‌ ನೀಡಿದ್ದರು. ಉಳಿದಂತೆ ಉಮೇಶ್‌ ಯಾದವ್‌ (ಡೆಲ್ಲಿ) ಮತ್ತು ಸಂದೀಪ್‌ ಶರ್ಮ (ಪಂಜಾಬ್‌) ತಲಾ 65 ರನ್‌, ಆರೋನ್‌ (ಡೆಲ್ಲಿ) 63 ರನ್‌ ನೀಡಿ ಐಪಿಎಲ್‌ನ ದುಬಾರಿ ಬೌಲರ್‌ಗಳ ಸಾಲಿನಲ್ಲಿ ಕಾಣಿಸಿಕೊಂಡಿದ್ದಾರೆ.