ಇಂಡಿಯನ್‌ ವೆಲ್ಸ್‌ ಟೆನಿಸ್‌: ರಫೆಲ್‌ ನಡಾಲ್‌-ಫ್ರಿಟ್ಜ್ ಪ್ರಶಸ್ತಿ ಪೈಪೋಟಿ

ಇಂಡಿಯನ್‌ ವೆಲ್ಸ್‌: ರಫೆಲ್‌ ನಡಾಲ್‌ ಮತ್ತು ಅಮೆರಿಕದ ಟೇಲರ್‌ ಫ್ರಿಟ್ಜ್ “ಇಂಡಿಯನ್‌ ವೆಲ್ಸ್‌ ಟೆನಿಸ್‌’ ಟೂರ್ನಿಯ ಫೈನಲ್‌ನಲ್ಲಿ ಸೆಣಸಾಡಲಿದ್ದಾರೆ.

21 ಗ್ರ್ಯಾನ್‌ಸ್ಲಾಮ್‌ ಪ್ರಶಸ್ತಿಗಳ ಒಡೆಯ ರಫೆಲ್‌ ನಡಾಲ್‌ ಸೆಮಿಫೈನಲ್‌ನಲ್ಲಿ ತಮ್ಮದೇ ದೇಶದ ಯುವ ಆಟಗಾರ ಕಾರ್ಲೋಸ್‌ ಅಲ್ಕರಾಜ್‌ ವಿರುದ್ಧ 3 ಸೆಟ್‌ಗಳ ಕದನದಲ್ಲಿ ಗೆದ್ದು ಬಂದರು. ಅಂತರ 6-4, 4-6, 6-3. ಇದರೊಂದಿಗೆ ನಡಾಲ್‌ 2022ರ ತಮ್ಮ ಅಜೇಯ ಗೆಲುವಿನ ಓಟವನ್ನು 20 ಪಂದ್ಯಗಳಿಗೆ ವಿಸ್ತರಿಸಿದರು.

“ಅಲ್ಕರಾಜ್‌ ಅವರನ್ನು ನಾನು ಯುವ ಆಟಗಾರನೆಂದು ಪರಿಗಣಿಸಲೇ ಇಲ್ಲ. ವಿಶ್ವ ರ್‍ಯಾಂಕಿಂಗ್‌ನಲ್ಲಿ ಈಗಾಗಲೇ ಅಗ್ರ ನೂರರಲ್ಲಿದ್ದಾರೆ. ಅವರೋರ್ವ ಟಾಪ್‌ ಪ್ಲೇಯರ್‌ ಎಂದು ಭಾವಿಸಿಯೇ ಈ ಪಂದ್ಯವನ್ನು ಆಡಲಿಳಿದೆ. ವಿಶ್ವದ ಅತ್ಯುತ್ತಮ ಆಟಗಾರನೊಬ್ಬನ ವಿರುದ್ಧ ಆಡಿದ ಅನುಭವ ನನ್ನದಾಗಿತ್ತು. ಅವರಿಗೆ ಉತ್ತಮ ಭವಿಷ್ಯವಿದೆ’ ಎಂದು ನಡಾಲ್‌ ಪ್ರತಿಕ್ರಿಯಿಸಿದರು.

ಇನ್ನೊಂದು ಸೆಮಿಫೈನಲ್‌ನಲ್ಲಿ ಟೇಲರ್‌ ಫ್ರಿಟ್ಜ್ 7-5, 6-4 ಅಂತರದಿಂದ ರಷ್ಯಾದ 7ನೇ ಶ್ರೇಯಾಂಕದ ಆಟಗಾರ ಆ್ಯಂಡ್ರೆ ರುಬ್ಲೇವ್‌ ಅವರನ್ನು ಮಣಿಸಿದರು. ಫ್ರಿಟ್ಜ್ ಫೈನಲ್‌ನಲ್ಲಿ ಗೆದ್ದರೆ 2001ರ ಬಳಿಕ ಅಮೆರಿಕನ್‌ ಆಟಗಾರನಿಗೆ ಇಂಡಿಯನ್‌ ವೆಲ್ಸ್‌ ಪ್ರಶಸ್ತಿ ಒಲಿದಂತಾಗುತ್ತದೆ. ಅಂದು ಆ್ಯಂಡ್ರೆ ಅಗಾಸ್ಸಿ ಚಾಂಪಿಯನ್‌ ಆಗಿದ್ದರು.