ಹೊಸ ನೇಮಕಾತಿಗೆ ರೈಲ್ವೆ ರೆಡ್‌ಸಿಗ್ನಲ್‌

ಹೊಸದಿಲ್ಲಿ: ಕೋವಿಡ್ 19 ಸೃಷ್ಟಿಸಿರುವ ಆರ್ಥಿಕ ಬಿಕ್ಕಟ್ಟಿನ ಬಿಸಿ ರೈಲ್ವೇ ಇಲಾಖೆಗೂ ತಟ್ಟಿದೆ. ವೆಚ್ಚಗಳಿಗೆ ನಿಯಂತ್ರಣ ಹೇರಿ, ಗಳಿಕೆಯ ವರ್ಧನೆಗೆ ಹೊಸ ದಾರಿ ಕಂಡುಕೊಳ್ಳಲು ರೈಲ್ವೆ ಇಲಾಖೆ ಹಲವು ಕಠಿನ ಕ್ರಮಗಳಿಗೆ ಮುಂದಾಗಿದೆ.

ಹೊಸ ಹುದ್ದೆಗಳ ರಚನೆ ಹಾಗೂ ನೇಮಕಾತಿಯನ್ನು ಸದ್ಯದ ಮಟ್ಟಿಗೆ ನಿಲ್ಲಿಸಿ, ಲಭ್ಯವಿರುವ ಸಿಬ್ಬಂದಿಯಿಂದಲೇ ಕೆಲಸ ಮಾಡಿಸಿಕೊಳ್ಳುವಂತೆ ಸೂಚಿಸಿ ರೈಲ್ವೆ ಹಣಕಾಸು ಆಯುಕ್ತರು ಎಲ್ಲ ವಲಯಗಳ ಪ್ರಧಾನ ವ್ಯವಸ್ಥಾಪಕರಿಗೆ ಪತ್ರ ಬರೆದಿದ್ದಾರೆ.

‘ಹಿಂದಿನ ವರ್ಷಕ್ಕೆ ಹೋಲಿಸಿದರೆ ಈ ವರ್ಷದ ಮೇ ಅಂತ್ಯದ ಸಾರಿಗೆ ಆದಾಯ ಶೇ.58ರಷ್ಟು ಕುಸಿದಿದೆ. ಮಾನವ ಶಕ್ತಿಯ ಸದ್ಬಳಕೆಗೆ ಕಾರ್ಯಾಗಾರ, ಹೊರಗುತ್ತಿಗೆಯ ಕೆಲಸ ಸಿಎಸ್‌ಆರ್‌ಗೆ ವರ್ಗಾವಣೆ, ಎಲ್ಲ ದಾಖಲೆಗಳ ಡಿಜಿಟಲೀಕರಣ ಮುಂತಾದ ಕಾರ್ಯತಂತ್ರಗಳನ್ನು ರೂಪಿಸಬೇಕಿದೆ.

ಸುರಕ್ಷಿತ ಸಂಬಂಧಿತ ಹುದ್ದೆಗಳನ್ನು ಹೊರತುಪಡಿಸಿ, ಬೇರಾವುದೇ ನೇಮಕಾತಿ ಮಾಡಿಕೊಳ್ಳುವಂತಿಲ್ಲ. ಇಂಧನ ಬಳಕೆ ಕಡಿಮೆ ಮಾಡಲು ಸೂಕ್ತ ಕ್ರಮ ಕೈಗೊಳ್ಳಬೇಕು’ ಎಂದು ಪತ್ರದಲ್ಲಿ ಸೂಚಿಸಿದ್ದಾರೆ.