ಇಂಗಾಲ ಮಾಲಿನ್ಯದಲ್ಲಿ ಭಾರತಕ್ಕೆ 4ನೇ ಸ್ಥಾನ!

ಹೊಸದಿಲ್ಲಿ: ಅತೀ ಹೆಚ್ಚು ಇಂಗಾಲದ ಡೈ ಆಕ್ಸೈಡ್ ಅನ್ನು ವಾತಾವರಣಕ್ಕೆ ಸೇರಿಸಿದ ದೇಶಗಳ ಪೈಕಿ ಭಾರತ 4ನೇ ಸ್ಥಾನದಲ್ಲಿದೆ! ಗ್ಲೋಬಲ್‌ ಕಾರ್ಬನ್‌ ಪ್ರಾಜೆಕ್ಟ್ ಎಂಬ ಸಂಸ್ಥೆ ನಡೆಸಿರುವ ಅಧ್ಯಯನ ವರದಿಯಲ್ಲಿ ಇದು ಉಲ್ಲೇಖವಾಗಿದೆ. ವಾಯುಮಾಲಿನ್ಯಕ್ಕೆ ಕಾರಣವಾಗುತ್ತಿರುವ ಇಂಗಾಲ ನಿಯಂತ್ರಣಕ್ಕೆ ವಿಶ್ವ ನಾಯಕರು ಪ್ರಯತ್ನಿಸುತ್ತಿರುವುದರ ನಡುವೆಯೇ ಇಂಥದ್ದೊಂದು ವರದಿ ಅಚ್ಚರಿ ಮೂಡಿಸಿದೆ. 2017ರಲ್ಲಿ ಭಾರತದಿಂದಲೇ ಶೇ.7ರಷ್ಟು ಇಂಗಾಲ ಪರಿಸರ ಸೇರಿದೆ.

ಮೊದಲ 3 ಸ್ಥಾನಗಳಲ್ಲಿ ಕ್ರಮವಾಗಿ ಚೀನ (ಶೇ. 27), ಅಮೆರಿಕ (ಶೇ. 15), ಐರೋಪ್ಯ ಒಕ್ಕೂಟ (ಶೇ. 10) ಇವೆ. 2017ರಲ್ಲಿ ವಿಶ್ವದ ಇತರ ರಾಷ್ಟ್ರಗಳು ಒಟ್ಟಾರೆಯಾಗಿ ಬಿಡುಗಡೆಗೊಳಿಸಿದ ಇಂಗಾಲದ ಡೈ ಆಕ್ಸೆ„ಡ್‌ ಪ್ರಮಾಣ ಶೇ. 41ರಷ್ಟಿದ್ದರೆ, ಭಾರತ, ಅಮೆರಿಕ, ಚೀನ, ಯೂರೋಪ್‌ನ ಕಾಣಿಕೆಯೇ ಶೇ. 59ರಷ್ಟಿದೆ. ಈ ನಾಲ್ಕು ದೇಶಗಳನ್ನು ಹೊರತು ಪಡಿಸಿದರೆ, ಟಾಪ್‌ 10ರಲ್ಲಿ ರಷ್ಯಾ, ಜಪಾನ್‌, ಜರ್ಮನಿ, ಇರಾನ್‌ ಹಾಗೂ ಸೌದಿ ಅರೇಬಿಯಾ ಇವೆ.

ಭಾರತದ ಇಂಗಾಲ ಉಗುಳುವಿಕೆ 2018ರಲ್ಲಿ ಶೇ. 6.3ರಷ್ಟಿತ್ತಾದರೂ ಕಲ್ಲಿದ್ದಲು, ತೈಲ, ಅನಿಲ ಮೂಲಗಳಿಂದ ಹೊರಬರುತ್ತಿರುವ ಇಂಗಾಲದ ಪ್ರಮಾಣ ಕ್ರಮವಾಗಿ ಶೇ. 7.1, ಶೇ. 2.9, ಶೇ. 6ರಷ್ಟು ಹೆಚ್ಚಳವಾಗಿದೆ.