ಹಂಬಂತೋಟ: ಶ್ರೀಲಂಕಾ ನೆಲದಲ್ಲಿ ಏಕದಿನ ಸರಣಿ ಗೆಲ್ಲುವ ಮೂಲಕ ಜಿಂಬಾಬ್ವೆ ಹೊಸ ಇತಿಹಾಸ ಬರೆದಿದೆ. ಸೋಮವಾರದ 5ನೇ ಹಾಗೂ ನಿರ್ಣಾಯಕ ಪಂದ್ಯವನ್ನು 3 ವಿಕೆಟ್‌ಗಳಿಂದ ಗೆದ್ದ ಜಿಂಬಾಬ್ವೆ 3-2 ಅಂತರದ ವಿಜಯೋತ್ಸವ ಆಚರಿಸಿದೆ.
ಹಂಬಂತೊಟದಲ್ಲಿ ನಡೆದ ಈ ಮುಖಾಮುಖೀಯಲ್ಲಿ ಬ್ಯಾಟಿಂಗಿಗೆ ಇಳಿಸಲ್ಪಟ್ಟ ಶ್ರೀಲಂಕಾದಿಂದ ಗಳಿಸಲು ಸಾಧ್ಯವಾದದ್ದು 8ಕ್ಕೆ 203 ರನ್‌ ಮಾತ್ರ. ಜವಾಬಿತ್ತ ಜಿಂಬಾಬ್ವೆ 38.1 ಓವರ್‌ಗಳಲ್ಲಿ 7 ವಿಕೆಟಿಗೆ 204 ರನ್‌ ಬಾರಿಸಿ ವಿಜಯಿಯಾಯಿತು. ಇದು ಏಕದಿನ ಇತಿಹಾಸದಲ್ಲೇ ಲಂಕಾ ವಿರುದ್ಧ ಜಿಂಬಾಬ್ವೆ ಸಾಧಿಸಿದ ಮೊದಲ ಸರಣಿ ಗೆಲುವು ಕೂಡ ಹೌದು.
ಗಾಲೆಯಲ್ಲಿ 300 ರನ್‌ ಮೊತ್ತವನ್ನು ಯಶಸ್ವಿಯಾಗಿ ಬೆನ್ನಟ್ಟುವ ಮೂಲಕ ದ್ವೀಪ ರಾಷ್ಟ್ರದಲ್ಲಿ ಗೆಲುವಿನ ಬಾವುಟ ಹಾರಿಸಿದ ಜಿಂಬಾಬ್ವೆ, ಅನಂತರ 2-1 ಹಿನ್ನಡೆಗೆ ಸಿಲುಕಿತು. 4ನೇ ಪಂದ್ಯವಲ್ಲಿ ಮತ್ತೆ ಮೇಲುಗೈ ಸಾಧಿಸಿ ಸರಣಿಯನ್ನು ಸಮಬಲಕ್ಕೆ ತಂದು ನಿಲ್ಲಿಸಿತು. ಸೋಮವಾರದ ನಿರ್ಣಾಯಕ ಮುಖಾಮುಖೀಯಲ್ಲಿ ಮ್ಯಾಥ್ಯೂಸ್‌ ಪಡೆಗೆ ನೀರು ಕುಡಿಸಿತು.
ಗೆಲುವಿನ “ರಾಜ’: ಆಲ್‌ರೌಂಡ್‌ ಪ್ರದರ್ಶನವಿತ್ತ ಜಿಂಬಾಬ್ವೆಯ ಸಿಕಂದರ್‌ ರಾಜ ಗೆಲುವಿನ ರೂವಾರಿ ಯಾಗಿ ಮೂಡಿಬಂದರು. 21ಕ್ಕೆ 3 ವಿಕೆಟ್‌ ಕಿತ್ತ ಅವರು, ತಂಡ ತೀವ್ರ ಸಂಕಟದಲ್ಲಿದ್ದಾಗ ಅಜೇಯ 27 ರನ್‌ ಮಾಡಿ ದಡ ಮುಟ್ಟಿಸಿದರು. ಈ ಸಾಧನೆಗಾಗಿ ಅವರಿಗೆ ಪಂದ್ಯಶ್ರೇಷ್ಠ ಪ್ರಶಸ್ತಿ ಒಲಿಯಿತು. ಹ್ಯಾಮಿಲ್ಟನ್‌ ಮಸಕಝ ಸರಣಿಶ್ರೇಷ್ಠರೆನಿಸಿದರು.
ಮಸಕಝ (73), ಮೈರ್‌ (43) ಮತ್ತು ಮುಸಕಂಡ (37) ಲಂಕಾ ದಾಳಿಯನ್ನು ಸಲೀಸಾಗಿ ಎದುರಿಸುತ್ತ ಹೋಗಿದ್ದರು. 24ನೇ ಓವರ್‌ ವೇಳೆ ಒಂದೇ ವಿಕೆಟಿಗೆ 137 ರನ್‌ ಮಾಡಿದ ಜಿಂಬಾಬ್ವೆ ಬಹಳ ಸುಲಭದಲ್ಲಿ ಗೆಲ್ಲುವ ಸೂಚನೆ ನೀಡಿತ್ತು. ಆದರೆ ಸ್ಕೋರ್‌ 175ಕ್ಕೆ ತಲುಪುವಾಗ 7 ವಿಕೆಟ್‌ ಉರುಳಿತು. ಹತ್ತೇ ಓವರ್‌ಗಳಲ್ಲಿ ಪಂದ್ಯದ ಚಿತ್ರಣವೇ ಬದಲಾಯಿತು. ಲಂಕೆಯ ಮುಂದೆ ಗೆಲುವಿನ ಅವಕಾಶ ತೆರೆಯಲ್ಪಟ್ಟಿತು. ಆದರೆ ರಾಜ (ಔಟಾಗದೆ 27) ಮತ್ತು ನಾಯಕ ಕ್ರೆಮರ್‌ (ಔಟಾಗದೆ 11) ಸೇರಿಕೊಂಡು ಮುರಿಯದ 8ನೇ ವಿಕೆಟಿಗೆ 29 ರನ್‌ ಒಟ್ಟುಗೂಡಿಸಿದರು; ಕೈತಪ್ಪಲಿದ್ದ ಗೆಲುವನ್ನು ಒಲಿಸಿಕೊಂಡೇ ಬಿಟ್ಟರು.
ಲಂಕಾದ ಸಣ್ಣ ಮೊತ್ತದಲ್ಲೂ ಇಬ್ಬರಿಂದ ಅರ್ಧ ಶತಕ ದಾಖಲಾಯಿತು. ಗುಣತಿಲಕ 52 ಹಾಗೂ ಗುಣರತ್ನೆ ಅಜೇಯ 59 ರನ್‌ ಬಾರಿಸಿದರು. 28 ರನ್‌ ಎಕ್ಸ್‌ಟ್ರಾ ರೂಪದಲ್ಲಿ ಬಂತು!
ಸಂಕ್ಷಿಪ್ತ ಸ್ಕೋರ್‌: ಶ್ರೀಲಂಕಾ-8 ವಿಕೆಟಿಗೆ 203 (ಗುಣರತ್ನೆ ಔಟಾಗದೆ 59, ಗುಣತಿಲಕ 52, ರಾಜ 21ಕ್ಕೆ 3, ಕ್ರೆಮರ್‌ 23ಕ್ಕೆ 2). ಜಿಂಬಾಬ್ವೆ-38.1 ಓವರ್‌ಗಳಲ್ಲಿ 7 ವಿಕೆಟಿಗೆ 204 (ಮಸಕಝ 73, ಮೈರ್‌ 43, ಮುಸಕಂಡ 37, ರಾಜ ಔಟಾಗದೆ 27, ಧನಂಜಯ 47ಕ್ಕೆ 4). ಪಂದ್ಯಶ್ರೇಷ್ಠ: ಸಿಕಂದರ್‌ ರಾಜ. ಸರಣಿಶ್ರೇಷ್ಠ: ಹ್ಯಾಮಿಲ್ಟನ್‌ ಮಸಕಝ.
