ಇದು ಎನ್‌ಆರ್‌ಐ ಗ್ರಾಮ! ವಿದೇಶದಲ್ಲೇ ಇದ್ದಾರೆ ಹಳ್ಳಿಯ ಅರ್ಧದಷ್ಟು ಜನರು

ಗಾಂಧಿನಗರ: ಈ ಗ್ರಾಮದಲ್ಲಿ ಸಾಧನೆ ಅಂದರೆ “ವಿದೇಶಕ್ಕೆ ಹೋಗಿ ಸೆಟಲ್‌ ಆಗುವುದು’. ಇದು ಬೇರೆ ಯಾವುದೋ ಗ್ರಾಮದ ಕಥೆಯಲ್ಲ, ಇತ್ತೀಚೆಗೆ ಅಮೆರಿಕ-ಕೆನಡಾ ಗಡಿಯಲ್ಲಿ ಹಿಮದಲ್ಲಿ ಮರಗಟ್ಟಿ ಮೃತರಾದ ಭಾರತೀಯ ಕುಟುಂಬದ ಮೂಲ ಊರಾದ ಗುಜರಾತ್‌ನ ಡಿಂಗುಚಾ ಊರಿನ ಕಥೆ!

ಒಟ್ಟು 7000 ಜನ ಸಂಖ್ಯೆಯಿರುವ ಊರು ಡಿಂಗುಚಾ. ಆದರೆ ಈ 7000ದಲ್ಲಿ ಈಗಾಗಲೇ 3200ಕ್ಕೂ ಅಧಿಕ ಜನರು ಅಮೆರಿಕ, ಕೆನಡಾ ಮತ್ತು ಬ್ರಿಟನ್‌ಗೆ ತೆರಳಿ ಅಲ್ಲಿಯೇ ಜೀವನ ನಡೆಸುತ್ತಿದ್ದಾರೆ. ಊರಿನ ಪ್ರತಿ ಬೀದಿಯಲ್ಲೂ ವಿದೇಶಕ್ಕೆ ಸಂಪರ್ಕ ಕಲ್ಪಿಸಿಕೊಡುವ ಏಜೆಂಟರಿದ್ದಾರೆ. ಊರಿನ ಪ್ರತಿ ಮಕ್ಕಳಿಗೆ ವಿದೇಶಕ್ಕೆ ಹೋಗುವ ಆಸೆಯನ್ನೇ ತುಂಬಲಾಗುತ್ತಿದೆ. ವಿದೇಶಕ್ಕೆ ಹೋಗಬೇಕು ಇಲ್ಲವೇ ವಿದೇಶಕ್ಕೆ ಕಳುಹಿಸುವ ಏಜೆಂಟ್‌ ಆಗಬೇಕು ಎನ್ನುವುದೇ ಇಲ್ಲಿನ ಯುವಕರ ಗುರಿಯಂತೆ!

ಈ ರೀತಿ ವಿದೇಶಕ್ಕೆ ಹೋಗಿ ಸೆಟಲ್‌ ಆದವರು ಆಗಾಗ ಊರಿಗೆ ಬಂದು ದೇಣಿಗೆ, ದಾನ ಮಾಡುತ್ತಿರುವುದರಿಂದಾಗಿ ಊರಿನ ಅಭಿವೃದ್ಧಿಯೂ ಆಗುತ್ತಿದೆ ಎನ್ನುತ್ತಾರೆ ಅಲ್ಲಿನ ಗ್ರಾಮ ಪಂಚಾಯಿತಿ ಸದಸ್ಯರು.

ಇದನ್ನೂ ಓದಿ:ಮೆಲಾನಿಯಾ ಟ್ರಂಪ್‌ ಟೋಪಿಗಿಲ್ಲ ಬೆಲೆ

ಕುಟುಂಬದ ಗುರುತು ಪತ್ತೆ

ಜ.19ರಂದು ಅಮೆರಿಕ-ಕೆನಡಾ ಗಡಿಯಾದ ಎಮೆರ್ಸನ್‌ ಬಳಿ ಮರಗಟ್ಟಿದ ಪರಿಸ್ಥಿತಿಯಲ್ಲಿ ಪತ್ತೆಯಾಗಿದ್ದ ಶವಗಳು ಗುಜರಾತ್‌ನ ಇದೇ ಡಿಂಗುಚಾ ಊರಿನ  ಕುಟುಂಬದ್ದು ಎಂದು ಕೆನಡಾದ ಅಧಿಕಾರಿಗಳು ದೃಢಪಡಿಸಿದ್ದಾರೆ.

ಜಗದೀಶ್‌ ಭಾಯ್‌ ಪಟೇಲ್‌(39), ಅವರ ಪತ್ನಿ ವೈಶಾಲಿಬೆನ್‌ ಜಗದೀಶ್‌ ಕುಮಾರ್‌ ಪಟೇಲ್‌(37), ಮಗಳು ವಿಹಾಂಗಿ(11) ಮತ್ತು ಮಗ ಧಾರ್ಮಿಕ್‌(3) ಮೃತ ದುರ್ದೈವಿಗಳು. ಈ ಕುಟುಂಬ ಹಲವು ದಿನಗಳ ಕಾಲ ಕೆನಡಾದಾದ್ಯಂತ ತಿರುಗಾಡಿದ್ದು, ಜ.12ರಂದು ಟೊರೊಂಟೋಗೆ ತೆರಳಿದೆ. ಅಲ್ಲಿಂದ ಜ.18ರಂದು ಎಮೆರ್ಸನ್‌ಗೆ ಹೊರಟಿತ್ತು. ಮಾನವ ಕಳ್ಳಸಾಗಣೆ ಮಾಡುವವರು ಕುಟುಂಬವನ್ನು ಕರೆದೊಯ್ದಿರುವ ಅನುಮಾನವಿದ್ದು, ಈ ಬಗ್ಗೆ ತನಿಖೆ ನಡೆಸಲಾಗುತ್ತಿದೆ.