ಫ್ರೆಂಚ್‌ ಓಪನ್‌: ಸಿಂಧು, ಶ್ರೀಕಾಂತ್‌ ನಿರಾಸೆ

ಪ್ಯಾರಿಸ್‌: ವಿಶ್ವದ ನಂ. 2 ಬ್ಯಾಡ್ಮಿಂಟನ್‌ ಆಟಗಾರ್ತಿ ಪಿ. ವಿ. ಸಿಂಧು ಹಾಗೂ ಹಾಲಿ ಚಾಂಪಿಯನ್‌ ಕೆ. ಶ್ರೀಕಾಂತ್‌ ಫ್ರೆಂಚ್‌ ಓಪನ್‌ ಬ್ಯಾಡ್ಮಿಂಟನ್‌ ಟೂರ್ನಿಯ ಕ್ವಾರ್ಟರ್‌ ಫೈನಲ್‌ನಲ್ಲಿ ಮುಗ್ಗರಿಸಿ ನಿರಾಸೆ ಮೂಡಿಸಿದ್ದಾರೆ. ಈ ಮೂಲಕ ಸಿಂಗಲ್ಸ್‌ ವಿಭಾಗದಲ್ಲಿ ಭಾರತೀಯರ ಆಟ ಕೊನೆಗೊಂಡಿದೆ. 

ಸಿಂಧುಗೆ ಸತತ 2ನೇ ಸೋಲು
ಪಿ.ವಿ. ಸಿಂಧು ವಿಶ್ವದ 7ನೇ ಶ್ರೇಯಾಂಕಿತೆ ಚೀನದ ಹಿ ಬಿಂಗ್‌ಜಿವೊ ವಿರುದ್ಧ 13-21, 16-21 ನೇರ ಗೇಮ್‌ಗಳಿಂದ ಸೋಲನುಭವಿಸಿ ಹೊರ ನಡೆದಿದ್ದಾರೆ. ಚೀನದ ಆಟಗಾರ್ತಿಯ ವಿರುದ್ಧ ಸಿಂಧುಗೆ ಇದು ಸತತ 2ನೇ ಸೋಲು. ಜುಲೈನಲ್ಲಿ ನಡೆದ ಇಂಡೋನೇಶ್ಯ ಓಪನ್‌ ಕೂಟದಲ್ಲಿ ನೇರ ಗೇಮ್‌ಗಳಿಂದ ಸೋತಿದ್ದರು.  ಬಿಂಗ್‌ಜಿವೊ ಈ ಗೆಲುವಿನೊಂದಿಗೆ ಸಿಂಧು ವಿರುದ್ಧ 7-5 ಗೆಲುವಿನ ಅಂತರ ಹೊಂದಿದ್ದಾರೆ. ಆರಂಭದಲ್ಲೆ ಪಂದ್ಯದ ಮೇಲೆ ಹಿಡಿತ ಸಾಧಿಸಿಕೊಂಡ ಬಿಂಗ್‌ಜಿವೊ ಅವರು ಸಿಂಧು ಹೆಚ್ಚು ಅಂಕಗಳನ್ನು ಗಳಿಸಲು ಬಿಡದೆ 8 ಅಂಕಗಳ ಮುನ್ನಡೆಯಿಂದ ಮೊದಲ ಗೇಮ್‌ಗೆದ್ದರು.  

ಶ್ರೀ ಕಾಂತ್‌ಗೂ ಸೋಲು
ಹಾಲಿ ಚಾಂಪಿಯನ್‌ ಶ್ರೀಕಾಂತ್‌ ಈ ಬಾರಿ ಕ್ವಾರ್ಟರ್‌ ಫೈನಲ್‌ನಲ್ಲೇ ಸೋತು ಅಘಾತ ಅನುಭವಿಸಿದ್ದಾರೆ. ಅವರು ಅಗ್ರ ಶ್ರೇಯಾಂಕಿತ ಕೆಂಟೊ ಮೊಮೊಟಾ ವಿರುದ್ಧ 16-21, 19-21 ನೇರ ಗೇಮ್‌ಗಳಿಂದ ಸೋತರು. ಕೆಂಟೊ ವಿರುದ್ಧ ಶ್ರೀಕಾಂತ್‌ಗೆ ಪ್ರಸಕ್ತ ಋತುವಿನಲ್ಲಿ ಸತತ 5ನೇ ಸೋಲಾಗಿದೆ. ಡೆನ್ಮಾರ್ಕ್‌ ಓಪನ್‌ ಟೂರ್ನಿಯ ಸೆಮಿಫೈನಲ್‌ನಲ್ಲಿ ಶ್ರೀಕಾಂತ್‌ ಕೆಂಟೊಗೆ ಶರಣಾಗಿದ್ದರು.