Shivashakti: ಚಂದ್ರನ ಶಿವಶಕ್ತಿ ಪಾಯಿಂಟ್‌ನಲ್ಲಿ ಪ್ರಜ್ಞಾನ್‌ನಿಂದ ಶಿಲೆಗಳ ತುಣುಕು ಪತ್ತೆ!

ನವದೆಹಲಿ: ಚಂದ್ರನ ಕುರಿತ ಅನ್ವೇಷಣೆಯಲ್ಲಿ ಮಹತ್ವದ ಹೆಜ್ಜೆಯೆಂಬಂತೆ, ಭಾರತದ ಚಂದ್ರಯಾನ-3ರ ಪ್ರಜ್ಞಾನ್‌ ರೋವರ್‌ ಪತ್ತೆ ಹಚ್ಚಿದ್ದ ಕೆಲವು ಪ್ರಮುಖ ಅಂಶಗಳು ಇತ್ತೀಚೆಗೆ ಬಹಿರಂಗಗೊಂಡಿವೆ.

ಚಂದಿರನ ಒಂದು ದಿನ (ಭೂಮಿಯ 29.5 ದಿನ)ದಲ್ಲಿ ರೋವರ್‌ ಶಶಾಂಕನ ದಕ್ಷಿಣ ಮೇಲ್ಮೈನಲ್ಲಿ ಸುಮಾರು 103 ಮೀಟರ್‌ನಷ್ಟು ಸುತ್ತಾಡಿದೆ. ವಿಕ್ರಂ ಲ್ಯಾಂಡರ್‌ ಇಳಿದಿದ್ದಂತಹ ಸ್ಥಳದಲ್ಲಿರುವ ಸಣ್ಣ ಕುಳಿಯಲ್ಲಿ ಹಾಗೂ ಆ ಕುಳಿಯ ಗೋಡೆಗಳಲ್ಲಿ ಮತ್ತು ಅಂಚಿನ ಸುತ್ತಲೂ ಸಣ್ಣದಾದ ಶಿಲೆಗಳ ತುಣುಕು (1ರಿಂದ 11.5 ಸೆ.ಮೀ. ಗಾತ್ರದವು) ಗಳನ್ನು ರೋವರ್‌ ಪತ್ತೆಹಚ್ಚಿತ್ತು. ಗ್ರಹದ ತಳಪಾಯವನ್ನು ಆವರಿಸಿರುವ ಘನ ಪದರದಲ್ಲಿನ ಶಿಲೆಗಳು ಕ್ರಮೇಣ ಒರಟಾಗುತ್ತವೆ ಎಂಬ ಈ ಹಿಂದಿನ ಅಧ್ಯಯನಗಳಿಗೆ ಇದು ಪೂರಕವಾಗಿದೆ.

ಶಿವಶಕ್ತಿ ಪಾಯಿಂಟ್‌ನ ಸುಮಾರು 30 ಮೀಟರ್‌ನಷ್ಟು ಪಶ್ಚಿಮಕ್ಕೆ ಹೋದಂತೆ ಶಿಲೆಗಳ ತುಣುಕುಗಳ ಪ್ರಮಾಣ ಹಾಗೂ ಗಾತ್ರವೂ ಹೆಚ್ಚಿರುವುದನ್ನು ರೋವರ್‌ ಗುರುತಿಸಿತ್ತು. ಇವುಗಳ ಪೈಕಿ 2 ಶಿಲೆಗಳು ಅವನತಿಯ ಕುರುಹನ್ನು ಪ್ರದರ್ಶಿಸಿದೆ. ಅಂದರೆ, ಕಾಲಗಳು ಉರುಳಿದಂತೆ ಚಂದಿರನ ಮೇಲ್ಮೈನಲ್ಲಿರುವ ವಸ್ತುಗಳ ಮೇಲೆ ವಾತಾವರಣವು ಹೇಗೆ ಪ್ರಭಾವ ಬೀರುತ್ತವೆ ಎನ್ನುವುದರ ಮಾಹಿತಿಯನ್ನು ಇದು ನೀಡುತ್ತದೆ. ಶಿಲೆಗಳ ತುಣುಕುಗಳ ಹಂಚಿಕೆ ಮತ್ತು ಮೂಲವನ್ನು ತಿಳಿಯಲು ಇದು ಸಹಾಯಕವಾಗಲಿದೆ.