ಒಂದು ಕಡೆ ಸುದೀಪ್ “ಸಾಗುವ ದಾರಿಯಲ್ಲಿ’ ಚಿತ್ರದ ಟೀಸರ್‌ ಬಿಡುಗಡೆಯಲ್ಲಿ ತಮ್ಮ ಆರಂಭದ ದಿನಗಳನ್ನು ನೆನಪಿಸಿಕೊಂಡು ಫ್ಲ್ಯಾಶ್‌ಬ್ಯಾಕ್‌ಗೆ ಜಾರಿದರೆ, ಅವರ ಅಭಿಮಾನಿಗಳು ಮಾತ್ರ ಫ‌ುಲ್‌ ಖುಷಿಯಾಗಿದ್ದಾರೆ. ಹಾಗಂತ ಸುದೀಪ್ ಫ್ಲ್ಯಾಶ್‌ಬ್ಯಾಕ್‌ಗೂ ಅಭಿಮಾನಿಗಳ ಖುಷಿಗೂ ಯಾವುದೇ ಸಂಬಂಧವಿಲ್ಲ. ಅಭಿಮಾನಿಗಳು ಖುಷಿಯಾಗಿರೋದು ಸುದೀಪ್ ಅವರ ಹೊಸ ಚಿತ್ರ “ದಿ ವಿಲನ್‌’ ಹೇರ್‌ಸ್ಟೈಲ್‌ನಿಂದ. ಹಾಗಾಗಿ ಎರಡೆರಡು ಕಾರಣಗಳಿಗಾಗಿ ಸುದೀಪ್ ಸುದ್ದಿಯಲ್ಲಿದ್ದಾರೆ…
ಇವತ್ತು ಕನ್ನಡ ಚಿತ್ರರಂಗದಲ್ಲಿ ಸ್ಟಾರ್‌ ನಟರಾಗಿ ಮಿಂಚುತ್ತಿರುವ ಅನೇಕರು ಆರಂಭದಲ್ಲಿ ಸಾಕಷ್ಟು ಕಷ್ಟಪಟ್ಟಿದ್ದಾರೆ. ಒಂದೊಂದು ಸಿನಿಮಾಗಳ ಮೂಲಕ ಕನಸು ಕಟ್ಟಿಕೊಂಡು, ಪ್ರೇಕ್ಷಕರ ಪ್ರತಿಕ್ರಿಯೆಗೆ ಅಂದಿನ ಸ್ಟಾರ್‌ ನಟರ ಅಭಿಪ್ರಾಯಕ್ಕೆ, ಪ್ರೋತ್ಸಾಹಕ್ಕೆ ಎದುರು ನೋಡಿದ್ದಾರೆ. ಅದನ್ನು ಸ್ಟಾರ್‌ ನಟರು ಇವತ್ತಿಗೂ ಮರೆತಿಲ್ಲ. ಅದರಲ್ಲಿ ಸುದೀಪ್ ಕೂಡಾ ಒಬ್ಬರು. ಸುದೀಪ್ ಇಂದು ಕನ್ನಡ ಚಿತ್ರರಂಗದ ಸ್ಟಾರ್‌ ನಟ. ಆದರೆ, ಆರಂಭದಲ್ಲಿ ಅವರು ಕೂಡಾ ಹೊಸಬರು, ಗೆಲುವಿಗಾಗಿ, ಪ್ರೋತ್ಸಾಹಕ್ಕಾಗಿ ಎದುರು ನೋಡಿದ್ದಾರೆ.
ಅದನ್ನು ಸುದೀಪ್ ಮರೆತಿಲ್ಲ. ಇತ್ತೀಚೆಗೆ ಸುದೀಪ್ ಫ್ಲ್ಯಾಶ್‌ಬ್ಯಾಕ್‌ ಜಾರಿದರು. ಅದಕ್ಕೆ ಕಾರಣವಾಗಿದ್ದು, ರೇಣುಕಾಂಬ ಪ್ರಿವ್ಯೂ ಥಿಯೇಟರ್‌. ಅನೂಪ್‌ ಸಾ.ರಾ.ಗೋವಿಂದು ನಾಯಕರಾಗಿರುವ “ಸಾಗುವ ದಾರಿಯಲ್ಲಿ’ ಚಿತ್ರದ ಟೀಸರ್‌ ಬಿಡುಗಡೆಗೆ ಸುದೀಪ್ ಅವರನ್ನು ಅತಿಥಿಯಾಗಿ ಆಹ್ವಾನಿಸಲಾಗಿತ್ತು. ಸುದೀಪ್‌ಗಾಗಿ ಇಡೀ ಚಿತ್ರತಂಡ ಎದುರು ನೋಡುತ್ತಿತ್ತು. ಸುದೀಪ್ ವೇದಿಕೆ ಎಂಟ್ರಿಕೊಟ್ಟರು.
ಚಿತ್ರತಂಡಕ್ಕೆ ಶುಭ ಹಾರೈಸುತ್ತಲೇ ಸುದೀಪ್ ಫ್ಲ್ಯಾಶ್‌ಬ್ಯಾಕ್‌ಗೆ ಜಾರಿದರು. “ಈ ವೇದಿಕೆ ಸಣ್ಣದಿರಬಹುದು. ಆದರೆ ಈ ವೇದಿಕೆಯ ಮಹತ್ವ ಮಾತ್ರ ದೊಡ್ಡದಿದೆ. ನಾನು ಕೂಡಾ ನನ್ನ ಸಿನಿಮಾ ತೋರಿಸಲು ಇದೇ ವೇದಿಕೆಯಲ್ಲಿ ಅಂದು ಅನೇಕ ನಟರಿಗಾಗಿ ಕಾದಿದ್ದೇನೆ. ಅನೇಕರು ಬಂದು ಸಿನಿಮಾ ನೋಡಿ ಪ್ರೋತ್ಸಾಹಿಸಿದ್ದಾರೆ. ಅವರೆಲ್ಲರ ಪ್ರೋತ್ಸಾಹ, ಜನರ ಪ್ರೀತಿಯಿಂದ ಇವತ್ತು ಚಿತ್ರರಂಗದಲ್ಲಿದ್ದೇನೆ. ಇದು ಸಾಮಾನ್ಯ ವೇದಿಕೆಯಲ್ಲ, ಅನೇಕರನ್ನು ಬೆಳೆಸಿದ ವೇದಿಕೆ,
ಸಾಕಷ್ಟು ದೊಡ್ಡ ದೊಡ್ಡ ಸಿನಿಮಾಗಳ ಪ್ರದರ್ಶನ ನಡೆದಿದೆ, ಸಿನಿಮಾಗಳ ಬಿಝಿನೆಸ್‌ ಕೂಡಾ ಆಗಿದೆ’ ಎನ್ನುತ್ತಾ ತಮ್ಮ ಆರಂಭದ ದಿನಗಳಿಗೆ ಜಾರಿದರು ಸುದೀಪ್. ಇನ್ನು, ಅನೂಪ್‌ ಸಾ.ರಾ.ಗೋವಿಂದುಗೆ ಶುಭ ಹಾರೈಸಿದ ಸುದೀಪ್, “ಇವತ್ತು ನೀವು ಈ ವೇದಿಕೆಯಲ್ಲಿ ನಿಂತಿದ್ದೀರಿ. ನಿಮಗೂ ಒಳ್ಳೆಯದಾಗುತ್ತದೆ’ ಎಂದರು. ಜೊತೆಗೆ “ಸಾಗುವ ದಾರಿಯಲ್ಲಿ’ ಟೀಸರ್‌ಗೂ ಸುದೀಪ್ ಮೆಚ್ಚುಗೆ ವ್ಯಕ್ತಪಡಿಸಿದರು.
