55 ಕ್ರಿಕೆಟಿಗರ ಅಭ್ಯಾಸಕ್ಕೆ ಇಸಿಬಿ ಅನುಮತಿ

ಲಂಡನ್‌: ಲಾಕ್‌ಡೌನ್‌ನಿಂದಾಗಿ ಒಳಗೇ ಉಳಿದಿದ್ದ ಇಂಗ್ಲೆಂಡ್‌ ಕ್ರಿಕೆಟಿಗರಿಗೆ ದೊಡ್ಡ ರಿಲೀಫ್ ಸಿಕ್ಕಿದೆ. ಒಟ್ಟು 55 ಮಂದಿ ಆಟಗಾರರಿಗೆ ಹೊರಾಂಗಣದಲ್ಲಿ ಅಭ್ಯಾಸ ನಡೆಸಲು ಇಸಿಬಿ ಅನುಮತಿ ನೀಡಿದೆ.

ಕಳೆದ ವಾರ 18 ಮಂದಿ ಬೌಲರ್‌ಗಳಿಗೆ ಅಭ್ಯಾಸ ನಡೆಸಲು ಇಸಿಬಿ ಅನುಮತಿ ನೀಡಿತ್ತು. ಇದಕ್ಕೀಗ ಹೆಚ್ಚುವರಿಯಾಗಿ 37 ಕ್ರಿಕೆಟಿಗರನ್ನು ಸೇರಿಸಲಾಗಿದೆ. ವಿಶ್ವಕಪ್‌ ವಿಜೇತ ತಂಡದ ನಾಯಕ ಇಯಾನ್‌ ಮಾರ್ಗನ್‌, ವೇಗಿಗಳಾದ ಜೇಮ್ಸ್‌ ಆ್ಯಂಡರ್ಸನ್‌ ಮತ್ತು ಆರ್ಚರ್‌ ಈ ಯಾದಿಯಲ್ಲಿದ್ದಾರೆ. ಆದರೆ ಅಲೆಕ್ಸ್‌ ಹೇಲ್ಸ್‌, ಲಿಯಮ್‌ ಪ್ಲಂಕೆಟ್‌, ಜೋ ಕ್ಲಾರ್ಕ್‌ ಮೊದಲಾದ ಕೆಲವು ಪ್ರಮುಖ ಆಟಗಾರರ ಹೆಸರು ಇಲ್ಲಿ ಕಾಣಿಸಿಕೊಂಡಿಲ್ಲ.

ಸರಕಾರದ ನಿಯಮಾವಳಿಯಂತೆ ಎಲ್ಲ ಸುರಕ್ಷಾ ನಿಯಮಗಳನ್ನು ಅನುಸರಿಸಿ ಮುಚ್ಚಿದ ಸ್ಟೇಡಿಯಂಗಳಲ್ಲಿ ಕ್ರಿಕೆಟಿಗರ ಅಭ್ಯಾಸ ಸಾಗಲಿದೆ.

ಮೊಯಿನ್‌ ಅಲಿ, ಜಾನಿ ಬೇರ್‌ಸ್ಟೊ, ಸ್ಟುವರ್ಟ್‌ ಬ್ರಾಡ್‌, ಜಾಸ್‌ ಬಟ್ಲರ್‌, ಆದಿಲ್‌ ರಶೀದ್‌, ಟಾಮ್‌ ಕರನ್‌, ಡೇವಿಡ್‌ ವಿಲ್ಲಿ, ಸ್ಯಾಮ್‌ ಬಿಲ್ಲಿಂಗ್ಸ್‌ ಕೂಡ ಅಭ್ಯಾಸ ನಡೆಸುವ ಪ್ರಮುಖ ಕ್ರಿಕೆಟಿಗರಾಗಿದ್ದಾರೆ. ಇದರಿಂದ ತಂಡದ ಆಯ್ಕೆಗೆ ವಿಪುಲ ಅವಕಾಶ ಲಭಿಸಲಿದೆ ಎಂಬುದು ಇಸಿಬಿ ಅಧಿಕಾರಿ ಮೋ ಬೊಬಾಟ್‌ ಅಭಿಪ್ರಾಯ.