ಶಿಕ್ಷಣ ಯಜ್ಞ ಯೋಜನೆ : ಪ್ರಗತಿ ಸಾಧಿಸಿದ ಕಾವುಗೋಳಿ ಶಾಲೆ

ಕಾಸರಗೋಡು: ರಾಜ್ಯ ಸರಕಾರದ ಶಿಕ್ಷಣ ಯಜ್ಞ ಮೂಲಕ ಕಲಿಕೆಯನ್ನು ಉತ್ಸವವಾಗಿಸಿದ ವಿದ್ಯಾಲಯ ಎಂಬ ಹೆಗ್ಗಳಿಕೆಯೊಂದಿಗೆ ಜಿಲ್ಲೆಯ ಕಾವುಗೋಳಿ ಸರಕಾರಿ ಕಿರಿಯ ಪ್ರಾಥಮಿಕ ಶಾಲೆ ಇತರ ಸಂಸ್ಥೆಗಳಿಗೆ ಮಾದರಿಯಾಗಿದೆ.ಸಾರ್ವಜನಿಕ ಶಿಕ್ಷಣಾಲಯ ಸಂರಕ್ಷಣೆ ಚಟುವಟಿಕೆಗಳಿಗೆ ಉತ್ತೇಜನ ನೀಡುವ ನಿಟ್ಟಿನಲ್ಲಿ ಸಾರ್ವಜನಿಕರು, ಶಿಕ್ಷಕರು ಜಂಟಿಯಾಗಿ ಸಹಕರಿಸಿ ಸರಕಾರಿ ಶಾಲೆಯೊಂದು ಉನ್ನತಿ ಪಡೆಯುವ ಯೋಜನೆಯೇ ಶಿಕ್ಷಣ ಯಜ್ಞ ಮೊಗ್ರಾಲ್‌ ಪುತ್ತೂರು ಗ್ರಾಮ ಪಂಚಾಯತ್‌ನ ಎರಿಯಾಲ್‌ನಲ್ಲಿರುವ ಈ ಶಾಲೆ ತನ್ನ ಪ್ರತ್ಯೇಕತೆಗಳೊಂದಿಗೆ ಗಮನ ಸೆಳೆಯುತ್ತಿದೆ. ಕೆಲವು ಖಾಸಗಿ ಶಾಲೆಗಳ ಸ್ಥಾಪನೆ ಮೂಲಕ ಅನೇಕ ದಶಕಗಳ ಹಿಂದಿನ ಈ ಸರಕಾರಿ ಸಂಸ್ಥೆ ದುಃಸ್ಥಿತಿಗೆ ತಲುಪಿದ ವೇಳೆ ಇದರ ಪುನಶ್ಚೇತನ‌ಕ್ಕೆ ನಡೆಸಲಾದ ಜನಪರ ಚಟುವಟಿಕೆಗಳು ನಾಡಿಗೆ ನಿದರ್ಶನವಾಗಿವೆ. ಸಾಧಾರಣ ಗತಿಯಲ್ಲಿ ಸರಕಾರಿ ಶಾಲೆ ಎನ್ನುವಾಗ ಸಾರ್ವಜನಿಕ ವಲಯದಲ್ಲಿ ತೋರುವ ನಿರ್ಲಕ್ಷ ಮನೋಧರ್ಮದಲ್ಲಿ ನಡೆದ ಜನತೆಯ ಮನೋಭಾವವೇ ಈ ಶಾಲೆಯ ಇಂದಿನ ಪ್ರಗತಿಗೆ ಮೂಲ ಕಾರಣ.

ಶಾಲೆಯಿಂದ ಬೆಳೆದವರು ಅನೇಕ : ಅಂತಾರಾಷ್ಟ್ರೀಯ ಮಟ್ಟದ ಪರಿಣತರ ಸಹಿತ ಅನೇಕ ವಿದ್ಯಾಸಂಪನ್ನರು ಈ ಶಾಲೆಯ ಮೂಲಕ ಬಾಲಪಾಠ ಕಲಿತವರು. 1927ರಲ್ಲಿ ಕೇಂದ್ರ ತೋಟ ಮತ್ತು ಬೆಳೆ ಸಂಶೋಧನೆ ಕೇಂದ್ರ (ಸಿ.ಪಿ.ಸಿ.ಆರ್‌.ಐ) ಬಳಿ ಸ್ಥಾಪಿತವಾಗಿರುವ ಈ ಶಾಲೆ ಸ್ವಾತಂತ್ರ್ಯ ಹೋರಾಟಗಾರರ ಸಹಿತ ಅನೇಕ ಸಾಮಾಜಿಕ ಕಾರ್ಯಕರ್ತರನ್ನು, ಸಾಹಿತಿಗಳನ್ನು ಪ್ರಪಂಚಕ್ಕೆ ಕೊಡುಗೆಯಾಗಿ ನೀಡಿದ ಗುರುಕುಲವಾಗಿದೆ.

ಈ ಶಾಲೆಯ ಮೊದಲ ಗುರುವಾಗಿ ಬಂದವರು ಮಮ್ಮುಂಞಿ ಮಾಸ್ಟರ್‌ ಅವರು. 1950ರಲ್ಲಿ ಒಂದನೇ ತರಗತಿ ಯಿಂದ 5ನೇ ತರಗತಿ ವರೆಗೆ ಇಲ್ಲಿ ಕಲಿಕೆ ನಡೆಸಲಾಗುತ್ತಿದ್ದರೂ, ಕಾಲಕ್ರಮೇಣ ಇದು 4ನೇ ತರಗತಿ ವರೆಗಿನ (ಕಿರಿಯ ಪ್ರಾಥಮಿಕ) ಶಾಲೆ ಆಗಿತ್ತು. 1951ರಲ್ಲಿ ಗ್ರಾಮಾ ಧಿಕಾರಿ ಮತ್ತು ಸ್ಥಳೀಯ ನಿವಾಸಿಯಾಗಿದ್ದ ಪಟ್ಟೇಲಿ ಅವರ ಖಾಸಗಿ ಜಾಗದಲ್ಲಿ ಈ ಶಿಕ್ಷಣಾಲಯ ಚಟುವಟಿಕೆ ನಡೆಸಿತ್ತು. ಜಾಗದ ಕೊರತೆ ಮತ್ತು ಇತರ ಸೌಕರ್ಯಗಳ ಹಿನ್ನೆಲೆಯಲ್ಲಿ ಪಟ್ಟೇಲಿ ಅವರ ಪುತ್ರ ಶಂಕರ ನಾೖಕ್‌ ಉಚಿತವಾಗಿ ನೀಡಿದ 17 ಸೆಂಟ್ಸ್‌ ಜಾಗದಲ್ಲಿ ಇಂದಿನ ಶಿಕ್ಷಣಾಲಯ ಸ್ಥಾಪನೆಗೊಂಡಿತ್ತು.  ಇಂದಿಗೂ ಈ ಶಾಲೆಯ ಪ್ರಗತಿಗಾಗಿ  ಹಿರಿಯ ಗಾಂಧಿ ವಾದಿ ಮತ್ತು ವಯೋವೃದ್ಧರಾದ ಶಂಕರ ನಾೖಕ್‌ ಅವರು ನವಯುವಕರಂತೆ ಓಡಾಡುತ್ತಾ ಅಚ್ಚರಿಗೆ ಕಾರಣರಾಗುತ್ತಾರೆ. ಕನ್ನಡ ಮತ್ತು ಮಲಯಾಳ ಮಾಧ್ಯಮಗಳಲ್ಲಿ ಇಲ್ಲಿ ಕಲಿಕೆ ನಡೆಸಲಾಗುತ್ತಿದೆ.

ಒಂದೊಮ್ಮೆ ಇಲ್ಲಿ ಮಕ್ಕಳ ಸಂಖ್ಯೆ ಕಡಿಮೆಯಾಗಿ ಶಾಲೆ ಮುಚ್ಚುಗಡೆಯ ಭೀತಿ ಅನುಭವಿಸಬೇಕಾಗಿ ಬಂದಿದ್ದವು. ಇದೇ ವೇಳೆ ರಾಜ್ಯ ಸರಕಾರ ಜಾರಿಗೊಳಿಸಿದ ಶಿಕ್ಷಣ ಯಜ್ಞ ಯೋಜನೆಯ ಪ್ರಬಲ ಪ್ರಭಾವ ಈ ಶಾಲೆಗೆ ಹೊಸಜೀವನ ನೀಡುವಲ್ಲಿ ಸಫಲವಾಯಿತು. ಶಾಲೆಯ ಶಿಕ್ಷಕರು, ಸಾರ್ವಜನಿಕರು ಮತ್ತು ಗ್ರಾಮ ಪಂಚಾಯತ್‌ ಜಂಟಿಯಾಗಿ ವಿದ್ಯಾಲಯವನ್ನು ಆಧುನೀಕರಣಗೊಳಿಸುವ ಮತ್ತು ಅಭಿವೃದ್ಧಿಗೊಳಿಸುವ ಸಂಕಲ್ಪದೊಂದಿಗೆ ರಂಗಕ್ಕಿಳಿದುದು ಚಿತ್ರಣವನ್ನೇ ಬದಲಿಸಿತ್ತು.

ಅನೇಕ ಯೋಜನೆಗಳ ಜಾರಿ 
ಇಲ್ಲಿ ನಡೆಸಲಾಗುವ ಕಲಿಕೆಯ ಗುಣಮಟ್ಟ ಹೆಚ್ಚಿಸುವ ನಿಟ್ಟಿನಲ್ಲಿ ರಾಜ್ಯ ಶಿಕ್ಷಣ ಇಲಾಖೆ ಜಾರಿಗೊಳಿಸುವ ಅನೇಕ ಯೋಜನೆಗಳನ್ನು ಇಲ್ಲಿ ಜಾರಿಗೊಳಿಸಲು ಆರಂಭಿಸಲಾಗಿತ್ತು. ಮಾತೃ ಭಾಷಾ ಕಲಿಕೆಗಾಗಿ ಮೂರು, ನಾಲ್ಕು ತರಗತಿಗಳನ್ನು ರಚಿಸಿ ಮಧುರ ಕನ್ನಡ, ಮಲೆಯಾಳ ತಿಳಕ್ಕಂ ಇತ್ಯಾದಿ ಯೋಜನೆಗಳನ್ನು ಯಶಸ್ವಿಯಾಗಿ ಜಾರಿಗೊಳಿಸಲಾಯಿತು. ಇವುಗಳಿಗೆ ಉತ್ತಮ ಪ್ರತಿಕ್ರಿಯೆ ಲಭಿಸಿವೆ ಎಂದು ಮುಖ್ಯಶಿಕ್ಷಕಿ ಎಂ.ಸುಮತಿ ಅಭಿಪ್ರಾಯಪಡುತ್ತಾರೆ.

ಇಂಗ್ಲಿಷ್‌ ಭಾಷೆ ಕಲಿಕೆಯನ್ನು ಸುಧಾರಿಸುವ “ಹಲೋ ಇಂಗ್ಲಿಷ್‌’ ಯೋಜನೆ, ವಿಜ್ಞಾನ-ಗಣಿತದಲ್ಲಿ ಪರಿಣತಿ ಒದಗಿಸುವ “ಶ್ರದ್ಧೆ’ ಕಲಿಕಾ ಯೋಜನೆ, ಇತ್ಯಾದಿಗಳು ಇಲ್ಲಿ ಫಲದಾಯಕವಾಗಿವೆ ಎಂದವರು ನುಡಿದರು.

ಶಿಕ್ಷಣ ಮರ್ಮವರಿತ ಶಿಕ್ಷಕರು  
ಶಿಕ್ಷಣ ಚಟುವಟಿಕೆಗಳ ಮರ್ಮವರಿತ ಶಿಕ್ಷಕರು ಇಲ್ಲಿರುವುದೂ ಶಿಕ್ಷಣಾಲಯದ ಪ್ರಗತಿಗೆ ಪ್ರಧಾನ ಕಾರಣವಾಗಿದೆ. ಸಾರ್ವಜನಿಕರ ನಡುವೆ ಲಾಲು ಮಾಸ್ಟರ್‌ ಎಂದೇ ಖ್ಯಾತರಾಗಿರುವ ಡಿ.ಅಮೃತಲಾಲ್‌, ಪಿ.ಕೆ. ಮೊಯ್ದಿàನ್‌ ಕುಟ್ಟಿ,ಕೆ.ಶ್ರೀಜಾ,ಎನ್‌.ವಿ. ಪ್ರೇಮ ಕುಮಾರ್‌, ಎಂ.ಎ. ಮೊಹಸೀನಾ, ಸ್ವಾತಿ,ಕೆ.ವಿಜಯಾ ಎಂಬ ಶಿಕ್ಷಕ ವೃಂದ ಇಲ್ಲಿನ ಅಭಿವೃದ್ಧಿಗೆ ಹೆಗಲು ನೀಡುತ್ತಿದ್ದಾರೆ. ಮಕ್ಕಳ ಮನೋಧರ್ಮವನ್ನು ಚೆನ್ನಾಗಿ ಅರಿತಿರುವ ಪೇದೆ ಸುಂದರ ಅವರು, ಅಡುಗೆಯಾಳು ಪದ್ಮಿನಿ ಅವರು ಶಾಲೆಯ ಕುಟುಂಬದ ಸದಸ್ಯರೇ ಆಗಿದ್ದಾರೆ.

ಶಾಲೆಯಲ್ಲಿ ಈಗ ಒಟ್ಟು 72 ವಿದ್ಯಾರ್ಥಿಗಳಿದ್ದಾರೆ. ವರ್ಷದಿಂದ ವರ್ಷಕ್ಕೆ ಮಕ್ಕಳ ಸಂಖ್ಯೆ ಅಧಿಕಗೊಳ್ಳುತ್ತಿದೆ. ಈ ಬೆಳವಣಿಗೆ ಇತರ ಸರಕಾರಿ ಶಾಲೆಗಳ ಅಭಿವೃದ್ಧಿಪಡಿಸುವ ಪ್ರಯತ್ನಕ್ಕೆ  ಉತ್ತಮ ಉದಾಹರಣೆಯಾಗಿದೆ.

ಪಠ್ಯೇತರ ಚಟುವಟಿಕೆಗಳಲ್ಲೂ ಸೈ 
ಪಠ್ಯೇತರ  ಚಟುವಟಿಕೆಗಳೂ ಇಲ್ಲಿ ಅತ್ಯುತ್ತಮ ರೀತಿ ನಡೆಯುತ್ತಿವೆ. ಕಲೋತ್ಸವಗಳು,ವಿಜ್ಞಾನ ಮೇಳಗಳು, ಕ್ರೀಡಾ ಸ್ಪರ್ಧೆಗಳು ಸಾರ್ವಜನಿಕ  ಸಹಭಾಗಿತ್ವದೊಂದಿಗೆ     ಇಲ್ಲಿ   ಯಶಸ್ವಿಯಾಗಿ  ನಡೆದಿವೆ.ಶಿಕ್ಷಕರ ದಕ್ಷತೆಯ   ನೇತೃತ್ವದೊಂದಿಗೆ ಗಣಿತ ಮೇಳ,ಶಿಬಿರಗಳು, ಸಿನಿಮಾ  ಪ್ರದರ್ಶನ,ಸಾಕ್ಷ Âಚಿತ್ರಗಳ ಪ್ರದರ್ಶನ,ಅಧ್ಯಯನ ಪ್ರವಾಸ ಇತ್ಯಾದಿಗಳೂ  ಇಲ್ಲಿ ಮಕ್ಕಳ ಪ್ರೋತ್ಸಾಹಕ್ಕಾಗಿ ನಡೆಯುತ್ತಿವೆ.ಇವೆಲ್ಲದಕ್ಕೂ ಹೆತ್ತವರು  ಮತ್ತು    ಸಾರ್ವಜನಿಕರ   ಸಕ್ರಿಯ ಬೆಂಬಲವೇ ಕಾರಣ.

ಸ್ಮಾರ್ಟ್‌-ಹೈಟೆಕ್‌ ಕ್ಲಾಸ್‌ ರೂಂಗಳು 
ಸ್ಥಳೀಯ ಯುವಜನ ಒಕ್ಕೂಟವಾಗಿರುವ ಎರಿಯಾಲ್‌ ಯೂತ್‌ ಕಲ್ಚರ್‌ ಸೆಂಟರ್‌(ಇ.ವೈ.ಸಿ.ಸಿ.) ನೇತೃತ್ವದಲ್ಲಿ ಸಾರ್ವಜನಿಕ ಸಹಭಾಗಿತ್ವದಲ್ಲಿ ವಿದ್ಯಾಲಯದಲ್ಲಿ ಒಂದು ಸ್ಮಾರ್ಟ್‌ ಕ್ಲಾಸ್‌ ರೂಂ ನಿರ್ಮಿಸಿರುವುದು ಕಲಿಕಾ ವಲಯದಲ್ಲಿ ಹೊಸ ಉತ್ಸಾಹಕ್ಕೆ ಕಾರಣವಾಗಿದೆ. ಗ್ರಾಮ ಪಂಚಾಯತ್‌ನ ಸಹಭಾಗಿತ್ವದೊಂದಿಗೆ ಹೈಟೆಕ್‌ ಕ್ಲಾಸ್‌ ರೂಂ ಒಂದನ್ನೂ ಇಲ್ಲಿ ನಿರ್ಮಿಸಲಾಗಿದೆ.