ಎ.ಬಿ.ವಿ.ಪಿ.ಯಿಂದ ಶಿಕ್ಷಣ ಸಚಿವರ ಪ್ರತಿಕೃತಿ ದಹನ

ಕಾಸರಗೋಡು: ಮೆಡಿಕಲ್‌ ಶುಲ್ಕ ಹೆಚ್ಚಳ ಹಿಂಪಡೆಯಬೇಕು, ಕೇರಳದ ತಾಂತ್ರಿಕ ಕಾಲೇಜುಗಳ ಸಮಸ್ಯೆ ಗಳನ್ನು ಪರಿಹರಿಸಬೇಕು ಮೊದಲಾದ ಬೇಡಿಕೆಗಳನ್ನು ಮುಂದಿಟ್ಟು ತಿರುವನಂತ ಪುರದಲ್ಲಿ ಸೆಕ್ರೆಟರಿಯೇಟ್‌ ಜಾಥಾ ನಡೆಸಿದ ಎಬಿವಿಪಿ ಕಾರ್ಯಕರ್ತರ ಮೇಲೆ ಪೊಲೀಸ್‌ ಲಾಠಿಪ್ರಹಾರ ಪ್ರತಿಭಟಿಸಿ ಕಾಸರಗೋಡು ಜಿಲ್ಲೆಯಲ್ಲಿ ಪ್ರತಿಭಟನೆ ನಡೆಯಿತು.

ತರಗತಿ ಬಹಿಷ್ಕರಿಸಿದ ವಿದ್ಯಾರ್ಥಿಗಳು ಕಾಸರಗೋಡು, ಕುಂಬಳೆ, ಕಾಂಞಂಗಾಡ್‌ ಮೊದಲಾದೆಡೆಗಳಲ್ಲಿ ಪ್ರತಿಭಟನಾ ಮೆರವಣಿಗೆ ನಡೆಸಲಾಯಿತು. ಕಾಸರಗೋಡು ನಗರದಲ್ಲಿ ಶಿಕ್ಷಣ ಸಚಿವ ಪ್ರೊ| ಎನ್‌. ರವೀಂದ್ರನಾಥ್‌ ಅವರ ಪ್ರತಿಕೃತಿ ದಹಿಸಲಾಯಿತು.

ಕಾಸರಗೋಡಿನಲ್ಲಿ ಪ್ರತಿಭಟನಾ ಮೆರವಣಿಗೆಗೆ ಎಬಿವಿಪಿ ಜಿಲ್ಲಾ ಜತೆ ಸಂಚಾಲಕ ರಾಹುಲ್‌ ಪಾಯಿಚ್ಚಾಲ್‌, ಕಾಸರಗೋಡು ನಗರ ಸಮಿತಿ ಸದಸ್ಯ ಎಂ. ಶ್ರೀಜಿತ್‌, ಸಂಚಾಲಕ ಕೆ.ರಾಹುಲ್‌ ಮೊದಲಾದವರು ನೇತೃತ್ವ ನೀಡಿದರು. ಕುಂಬಳೆಯಲ್ಲಿ ಗುರುಪ್ರಸಾದ್‌, ಕೆ. ಪ್ರಮೋದ್‌, ವಿವೇಕ್‌, ಕಾಂಞಂಗಾಡ್‌ನ‌ಲ್ಲಿ  ಶ್ರೀಹರಿ, ಸನು, ನಿಖೀಲ್‌, ಜಿಷ್ಣುರಾಜ್‌ ಮೊದಲಾದವರು ಪ್ರತಿಭಟನೆಗೆ ನೇತೃತ್ವ ನೀಡಿದರು.