Copa America ಫುಟ್‌ಬಾಲ್‌ ಕ್ವಾರ್ಟರ್‌ ಫೈನಲ್‌ಗೆ ಈಕ್ವಡಾರ್‌

ಗ್ಲೆಂಡೇಲ್‌ (ಅರಿಜೋನಾ): ಮೆಕ್ಸಿಕೊ ವಿರುದ್ಧ ಗೋಲಿಲ್ಲದ ಡ್ರಾ ಸಾಧಿಸುವ ಮೂಲಕ ಈಕ್ವಡಾರ್‌ ಕೊಪಾ ಅಮೆರಿಕ ಫುಟ್‌ಬಾಲ್‌ ಪಂದ್ಯಾವಳಿಯ ಕ್ವಾರ್ಟರ್‌ ಫೈನಲ್‌ ಪ್ರವೇಶಿಸಿದೆ. ಇಲ್ಲಿ ಹಾಲಿ ಚಾಂಪಿಯನ್‌ ಆರ್ಜೆಂಟೀನಾದ ಸವಾಲು ಎದುರಾಗಿದೆ.

“ಬಿ’ ವಿಭಾಗದಲ್ಲಿದ್ದ ಈಕ್ವಡಾರ್‌ 4 ಅಂಕಗಳೊಂದಿಗೆ ದ್ವಿತೀಯ ಸ್ಥಾನಿಯಾಯಿತು. 3 ಪಂದ್ಯಗಳಲ್ಲಿ ಒಂದನ್ನು ಗೆದ್ದು, ಒಂದನ್ನು ಸೋತು, ಇನ್ನೊಂದನ್ನು ಡ್ರಾ ಮಾಡಿಕೊಂಡಿತು. ಮೆಕ್ಸಿಕೊ ಕೂಡ 4 ಅಂಕ ಸಂಪಾದಿಸಿತಾದರೂ ಗೋಲು ಗಳಿಕೆಯಲ್ಲಿ ಅದು ಈಕ್ವಡಾರ್‌ಗಿಂತ ಹಿಂದುಳಿಯಿತು.

ಎಲ್ಲ 3 ಪಂದ್ಯಗಳನ್ನು ಗೆದ್ದು 9 ಅಂಕ ಸಂಪಾದಿಸಿದ ವೆನಿಜುವೆಲಾ “ಬಿ’ ವಿಭಾಗದ ಅಗ್ರಸ್ಥಾನಿಯಾಯಿತು. ಟೆಕ್ಸಾಸ್‌ನಲ್ಲಿ ನಡೆದ ತನ್ನ ಕೊನೆಯ ಲೀಗ್‌ ಪಂದ್ಯದಲ್ಲಿ ವೆನಿಜುವೆಲಾ 3-0 ಅಂತರದಿಂದ ಜಮೈಕಾವನ್ನು ಕೆಡವಿತು. ವೆನಿಜುವೆಲಾದ ಕ್ವಾರ್ಟರ್‌ ಫೈನಲ್‌ ಎದುರಾಳಿ ಕೆನಡಾ.

ವೆನಿಜುವೆಲಾ ಪರ ಎಡ್ವರ್ಡ್‌ ಬೆಲ್ಲೊ, ಸಾಲೋಮನ್‌ ರಾಂಡನ್‌ ಮತ್ತು ಎರಿಕ್‌ ರಮಿರೆಝ್ ಗೋಲು ಹೊಡೆದರು. ಈಕ್ವಡಾರ್‌ ಮತ್ತು ಮೆಕ್ಸಿಕೊ ವಿರುದ್ಧ ಗೆದ್ದಾಗಲೇ ವೆನಿಜುವೆಲಾ ಕ್ವಾರ್ಟರ್‌ ಫೈನಲ್‌ಗೆ ಲಗ್ಗೆ ಹಾಕಿತ್ತು.