ರಾಜಕೀಯ ಆಟಕ್ಕೆ ಬಳಕೆಯಾಗುತ್ತಿರುವ ಸಾಮಾನ್ಯರ ನಂಬಿಕೆಗಳನ್ನು ಪ್ರತಿಧ್ವನಿಸುವ “ಊರು ಸುಟ್ಟರೂ ಹನುಮಪ್ಪ ಹೊರಗ’ ನಾಟಕ, ಇತ್ತೀಚಿಗೆ ಬೆಂಗಳೂರಿನ ಹನುಮಂತನಗರದ ಕೆ.ಹೆಚ್‌. ಕಲಾಸೌಧದಲ್ಲಿ ಪ್ರದರ್ಶನಗೊಂಡಿತು. ಹನುಮಂತ ಹಾಲಿಗೇರಿಯವರ ರಚನೆಯ, ಭಾಸ್ಕರ್‌ ನಾಗಮಂಗಲರವರ ನಿರ್ದೇಶನದ ಈ ನಾಟಕವನ್ನು ಅಶೋಕ್‌ ಬಿ. ಅವರ ವಿಶ್ವಪಥ ಕಲಾ ಸಂಗಮ ತಂಡದ ಕಲಾವಿದರು ಸಮರ್ಥವಾಗಿ ಅಭಿನಯಿಸಿದರು. ಹಾಸ್ಯದೊಂದಿಗೆ ವೈಚಾರಿಕತೆಯನ್ನು ಬಿತ್ತುವಲ್ಲಿ ನಾಟಕ ಯಶಸ್ವಿಯಾಯಿತು.
ಒಂದು ಕಾಲದಲ್ಲಿ ಒಂದಾಗಿದ್ದ ಧರೆಗಟ್ಟಿ ಮತ್ತು ವಜ್ರಮಟ್ಟಿ ಗ್ರಾಮಗಳು ಪ್ರಾಕೃತಿಕ ಕ್ಷಾಮಗಳ ಕಾರಣಕ್ಕಾಗಿ ಅಕ್ಕಪಕ್ಕದಲ್ಲೇ ಇರುವ ಎರಡು ಗುಡ್ಡಗಳಿಗೆ ಹೋಗಿ ನೆಲೆಗೊಂಡು ಎರಡೂ ಊರುಗಳಾಗಿ ಮಾರ್ಪಟ್ಟಿರುತ್ತವೆ. ಆದರೆ, ಊರಲ್ಲಿ ಜನರನ್ನು ಪೊರೆಯುತ್ತಿದ್ದ ಹನುಮಪ್ಪ ದೇವರು, ಯಾವ ಊರಿಗೆ ಸೇರಬೇಕು ಎಂದು ಎರಡೂ ಊರುಗಳ ನಡುವೆ ಆಗಾಗ ಜಗಳ- ಕಿತ್ತಾಟಗಳು ನಡೆಯುತ್ತಲೇ ಇರುತ್ತವೆ. ಎರಡೂ ಊರಿನವರು ತಮ್ಮ ತಮ್ಮ ಪ್ರತಿಷ್ಠೆಗಾಗಿ ಜಿದ್ದಿಗೆ ಬಿದ್ದು ಹನುಮಪ್ಪನನ್ನು ತಮ್ಮೂರಿಗೆ ತರಲೆತ್ನಿಸುತ್ತಲೇ ಇರುತ್ತಾರೆ. ಕೊನೆಗೊಂದು ದಿನ ಒಂದೂರಿನವರು ಹನುಮಪ್ಪನನ್ನು ರಾತ್ರೋರಾತ್ರಿ ಕಳ್ಳತನ ಮಾಡುವ ಮೂಲಕ ಎರಡು ಊರುಗಳ ನಡುವಿನ ಜಗಳ ತಾರಕಕ್ಕೇರುತ್ತದೆ.
ಎರಡೂ ಊರುಗಳ ಜನ ಪರಸ್ಪರ ಹೊಡೆದಾಟ- ಬಡಿದಾಟ ಮಾಡಿ ಹನುಮಪ್ಪನೊಂದಿಗೆ ಜೈಲು ಸೇರುತ್ತಾರೆ. ಮುಂದೆ ಪ್ರಕರಣ ಕೋರ್ಟು ಮೆಟ್ಟಿಲೇರುವುದರೊಂದಿಗೆ ಮತ್ತೂಂದು ತಿರುವು ಪಡೆಯುತ್ತದೆ. ಕೋರ್ಟು- ಕಚೇರಿಗಳ ಅಲೆದಾಟದಲ್ಲಿ ಹನುಮಪ್ಪ ಮರಳಿ ಸಿಗುವ ಹೊತ್ತಿಗೆ ಊರ ಜನ ಏನಾಗಿರುತ್ತಾರೆ? ಹನುಮಪ್ಪ ತನ್ನ ಭಕ್ತನನ್ನು ನಿಜವಾಗಿಯೂ ಕಾಪಾಡುತ್ತಾನೆಯೇ ಎನ್ನುವುದನ್ನೆಲ್ಲ ರಂಗದ ಮೇಲೆ ನೋಡಿಯೇ ಆನಂದಿಸಬೇಕು.
ಪ್ರಸ್ತುತ ಕಾಲದಲ್ಲಿ ಧರ್ಮ, ದೇವರಿಗಾಗಿ ಮಾನವೀಯ ಗುಣಗಳನ್ನೇ ಮರೆಯುವ ಜನರು ನೋಡಲೇಬೇಕಾದ ನಾಟಕವಿದು. ಸಂಪೂರ್ಣ ಹಾಸ್ಯರಸವಿದ್ದರೂ, ನಾಟಕದ ಕೊನೆಯಲ್ಲಿ ಬದುಕಿನ ಸಶಕ್ತ ವಿಚಾರವನ್ನು ನೋಡುಗರ ಮನಕ್ಕೆ ದಾಟಿಸುತ್ತದೆ. ನಾಟಕ ಮುಗಿದ ಮೇಲೂ ವೈಚಾರಿಕ ಸಂಭಾಷಣೆಗಳು ಕಾಡುತ್ತವೆ. ಈ ಸಂಗತಿಯಲ್ಲೇ ನಾಟಕ ಗೆದ್ದುಬಿಟ್ಟಿದೆ.
ವೈಚಾರಿಕ ನಾಟಕಗಳು ಬೋರು ಹೊಡೆಸುತ್ತವೆ ಎಂಬ ಅಪವಾದವನ್ನು ನಿರ್ದೇಶಕ ಭಾಸ್ಕರ್‌ ನಾಗಮಂಗಲ ಸುಳ್ಳು ಮಾಡಿದ್ದಾರೆ. ಪ್ರತಿ ದೃಶ್ಯಗಳೂ ಕಣ್ಣಿಗೆ ಕಟ್ಟುವಂತಿವೆ. ಸರಳವಾದ ರಂಗಸಜ್ಜಿಕೆಯೊಂದಿಗೆ ಪ್ರತಿ ಕಲಾವಿದನ ಚಲನೆ, ಮಾತು, ಏರಿಳಿತಗಳನ್ನು ಬಹಳ ಚೆನ್ನಾಗಿ ತಿದ್ದಿದ್ದಾರೆ, ನಿರ್ದೇಶಕರು. ಸಂಗೀತವೂ ಈ ನಾಟಕದ ಇನ್ನೊಂದು ಶಕ್ತಿ. ರವಿ ಮುರೂರು ಸಂಯೋಜಿಸಿರುವ ಎಲ್ಲಾ ಹಾಡುಗಳೂ ನಾಟಕಕ್ಕೆ ಪೂರಕ, ಕಿವಿಗೂ ಇಂಪು.
ಹುಚ್ಚಮಲ್ಲ ಪಾತ್ರಧಾರಿ ಅಶೋಕ್‌ ಬಿ. ಅವರ ಪಾತ್ರ ನೆನಪಿನಲ್ಲಿ ಉಳಿಯುವಂಥದ್ದು. ಪೋಲಿಸ್‌ ಪೇದೆಗಳಾಗಿ ಅಭಿನಯಿಸಿದ ಹರ್ಷವರ್ಧನ್‌, ರಕ್ಷಾ ಕಶ್ಯಪ್‌ ಮತ್ತು ಪೂಜಾರಿ ಪಾತ್ರದಲ್ಲಿ ಅಭಿನಯಿಸಿದ ಮಧುಕರ್‌ ತಮ್ಮ ಅದ್ಭುತ ಹಾಸ್ಯಪ್ರಜ್ಞೆಗಳಿಂದ ಪ್ರೇಕ್ಷಕರನ್ನು ನಗೆಗಡಲಲ್ಲಿ ತೇಲಿಸಿದರು.
— ಸುರೇಶ ಕೆ. 