ಹಾಕಿ ಇಂಡಿಯಾ ಅಧ್ಯಕ್ಷ ಸ್ಥಾನಕ್ಕೆ ದಿಲೀಪ್‌ ಟಿರ್ಕಿ ಸ್ಪರ್ಧೆ

ಹೊಸದಿಲ್ಲಿ: ರಾಷ್ಟ್ರೀಯ ಕ್ರೀಡಾನೀತಿಗೆ ಅನುಸಾರವಾಗಿ ಅ. 9ರಂದು ಹಾಕಿ ಇಂಡಿಯಾ ಚುನಾವಣೆ ನಡೆಯಲಿದೆ. ಇದರ ಅಧ್ಯಕ್ಷ ಸ್ಥಾನಕ್ಕೆ ಭಾರತ ಹಾಕಿ ತಂಡದ ಮಾಜಿ ನಾಯಕ ದಿಲೀಪ್‌ ಟಿರ್ಕಿ ಸ್ಪರ್ಧಿಸಲು ಅರ್ಜಿ ಸಲ್ಲಿಸಿದ್ದಾರೆ.

ಟಿರ್ಕಿ ತಂಡದಲ್ಲಿದ್ದಾಗ ಭಾರತ ಏಷ್ಯಾಡ್‌ನ‌ಲ್ಲಿ ಒಮ್ಮೆ ಚಿನ್ನ, ಇನ್ನೊಮ್ಮೆ ಬೆಳ್ಳಿ ಗೆದ್ದಿತ್ತು. ಹಿಂದೆ ಅವರು ಒಡಿಶಾದಿಂದ ಬಿಜು ಜನತಾದಳದ ಪರವಾಗಿ ರಾಜ್ಯಸಭಾ ಸದಸ್ಯರಾಗಿಯೂ ಸೇವೆ ಸಲ್ಲಿಸಿದ್ದಾರೆ. ಪ್ರಸ್ತುತ ಒಡಿಶಾದಲ್ಲಿ ಹಾಕಿಯ ಉನ್ನತಿಗಾಗಿ ಕರ್ತವ್ಯ ನಿರ್ವಹಿಸುತ್ತಿದ್ದಾರೆ.

ಟಿರ್ಕಿ ಅವರೀಗ ಹಾಕಿ ಇಂಡಿಯಾ ಚುಕ್ಕಾಣಿ ಹಿಡಿದು, ಅದರ ಪರಮೋನ್ನತಿಗೆ ಶ್ರಮಿಸುವ ನಿರ್ಧಾರ ಮಾಡಿದ್ದಾರೆ. ಇದುವರೆಗೆ ಹಾಕಿ ಇಂಡಿಯಾ ರಾಜಕಾರಣಿಗಳು, ಹಾಕಿ ಕ್ರೀಡೆಯ ಪರಿಚಯವಿಲ್ಲದ ಆಡಳಿತಾಧಿಕಾರಿಗಳ ಕೈಯಲ್ಲಿತ್ತು. ಮುಂದಾದರೂ ಸಮರ್ಥ ಹಾಕಿ ಆಟಗಾರರ ಕೈಗೆ ಸಿಕ್ಕಿದರೆ, ಅದರಿಂದ ಆ ಕ್ರೀಡೆ ಬೆಳೆಯಲು ಸಾಧ್ಯವಿದೆ ಎಂಬ ಆಶಾವಾದವೊಂದು ಮೂಡಿದೆ.